《低俗》笑足九十分鐘 彭浩翔：內容全屬真人真事
2012/08/06 08:41:09 網誌分類: 娛樂
| 港產片之所以令我着迷，除了那貼近港人的抵死幽默對白外，還有那種同一屋簷下的共鳴感。在怨聲載道的社會下，短短的九十分鐘能令觀眾們暫時忘卻煩憂笑餐飽，試問有誰會拒絕﹖由鬼才彭浩翔執導的《低俗喜劇》玩盡香港觀眾底線，與杜汶澤再度攜手合作，將香港獨有的車輪式粗口搬上銀幕，發放笑彈讓觀眾笑到痛哭流涕，加上宅男界女神陳靜（DaDa）破格演出，一部完全屬於香港人的電影，你們又豈可錯過﹖在此，我先要預祝電影票房節節上升。 主持﹕黃柏高 統籌﹕林永匡 協力﹕袁東亮、龍婉琪 實在很佩服導演彭浩翔的腦筋及魄力，由他執導的電影一向獲得高度評價，今次更大膽將杜汶澤的親身經歷幻化成電影情節，再配以無限量笑彈搬上大銀幕娛樂觀眾。 杜汶澤親身經歷 彭浩翔：「其實呢套電影嘅靈感來自杜汶澤，一件關於以前發生喺佢身上嘅親身經歷，我聽到之後一直都好想將佢嘅奇遇拍成一套電影，可惜苦無機會，直至去年太陽娛樂文化願意出錢投資時，我就決意將佢嘅經歷幻化成電影。」 杜汶澤：「喺我未入行之前，我做過唔同嘅工作，當我仍然係一位收數佬時，我成功咁幫老闆收咗一條數，咁佢就請我去廣西食飯。大家都知道通常請客者，都會請佢哋最鍾意食嘅食物去款待嘉賓，而眾所周知內地專食珍饈百味，結果當晚佢就宴請牛嘅非一般器官我食，我仲好詫異﹕『原來呢度都食得！』食，已經不在話下，食完飯，佢話要一盡地主之誼，帶我去餘興節目，而所謂嘅節目原來係『操驢仔』！佢仲話唔識食先會揀『女仔』，識食一定係揀『驢仔』！結果，我最後當然係發晒爛渣。」 重現港產片風光 八十年代是港產片最輝煌的日子，可惜隨香港電影工業不斷萎縮，人人開始進軍內地巿場，眾多限制下，港產片頓失昔日靈魂，難怪本土導演彭浩翔揸緊宗旨決定豁出去，拍一齣香港味濃的本土電影。 彭浩翔：「我之前睇過一個網，其中一個Post係話啲小朋友講依家嘅港產片回咗塘，覺得港產片唔好笑！我受唔住，所以決意拍番一齣好瘋狂嘅電影，回歸以前風光時代，令佢哋知道依家嘅港產片仍然係好好笑。以前嘅香港電影之所以好笑，係因為夠瘋狂，而一套港產片除咗夠瘋狂外，粵語最大嘅精神就係粗口！記得其中一幕叫杜汶澤搵邵音音拍三級片，音音姐仲話我句對白唔夠好，佢話粗口都有分年代，結果一Roll機，佢講返自己嗰個年代嘅粗口時，我哋即時笑晒，杜汶澤更笑到不停NG。」 杜汶澤：「其實開心根本無分貴賤，佢係一套好低俗嘅電影，但只要夠好笑夠開心，就已經好足夠，我哋根本唔需要高雅嘅喜劇，每個地方都有擅長拍攝嘅電影，好似印度最擅長拍歌舞片一樣。」 首要啱Feel 能夠擔大旗的香港明星為數不少，不過彭導演一向感覺行頭，喜用能全面配合電影角色的演員，或許他始終認為，知名度與角色之間的氣質，並非每一套電影都能完全配合。 彭浩翔：「我覺得DaDa嘅氣質有別於其他年輕嘅模特兒，佢性感之餘亦有一種純情嘅感覺喺內心深處，所以我覺得佢好適合飾演『爆炸糖』呢個角色，表面上好大膽，咩都敢做敢試，但其實骨子裏好純潔。」 DaDa：「當我知道導演搵我飾演呢個角色時，我覺得好開心，甚至好好奇點解佢會搵我去演繹。其實一直我都喜歡呢位導演，睇過好多由佢執導嘅電影，完全無諗過入行只係咁短時間，已經有機會參演屬於佢嘅電影，所以我覺得好開心之餘，亦好緊張，甚至有壓力。喺呢套戲入面我學識好多嘢，當中更學識揸筷子﹗」 杜汶澤：「DaDa拍攝口交戲份時完全無尷尬，拍攝得非常順利，殊不知拍攝一場講述佢、我同埋一個小朋友喺大排檔食飯時，竟然遇上好大嘅阻礙，原來佢係唔識揸筷子，一場短短嘅一幕，竟然拍咗好長時間。」 惺惺相惜 不說不知道，原來導演與杜汶澤早在多年前已認識，而且更有君子協定，難怪他們彼此默契十足，互相充滿信心。 杜汶澤：「其實我同彭浩翔識咗好耐，我哋以前喺ATV年代已經認識，當時我哋喺Canteen見到面都會一齊傾吓電影，記得某一次我屋企爆水喉，我由片場仆返去屋企處理，就係呢個時間，佢打電話（嚟）同我講有套殺人喜劇想搵我拍，問我有無興趣，我同佢講：『我好感激你搵我拍，不過我依家屋企爆緊水喉，樓下又嘈晒，你可唔可以唔好騷擾我﹖我呢啲二奶台嘅茄喱啡，你搵我，無人會肯畀錢你拍㗎。』之後佢話：『咁好啦，你紅咗我再搵你。』結果，佢真係搵我拍《大丈夫》、《伊沙貝拉》。其實我真係好感激佢，芸芸咁多演員入面，個個都爭相拍佢嘅電影，但佢從來唔會因為邊個紅而搵邊個拍，一家要啱Feel先搵，證明佢個人唔會用人唯親，我真係好多謝佢。」 |
 | |
| |
 | |
| |
 | |
| |
 | |
 | |
| |
 | |
| |
 | |
| |
| |
謝謝你的資訊 !