死亡筆記 - 第20話

操控著田亮與田心的老人本名叫阿添，年輕時是個沒人喜歡的孤獨少年。

因為他長得很醜，所以自細就沒有人願意和他做朋友。他的一雙眼長得很少，又分得很開，兩個鼻孔大得如一枚五角硬幣，牙齒不只長得歪歪斜斜，更呈三角形，整體看起來，頭部活像深海的一尾怪魚！

他的同學都叫他鬼添。

唔怕生壞命，最怕改壞名，這句老生常談，一點也沒錯。就是這個不祥的名字，為他帶來與魔鬼為伍的一生。

很多年前的一個晚上，阿添獨個兒在公園球場的長椅上呆坐。冷不防球場上飛來一記波餅，阿添在毫無反應下吃個正著。他的鼻孔立即滴出深紅色的鮮血。

可能因為鼻孔過大，流下來的鼻血都比常人為多。

球場內的少年看見阿添木無表情的醜陋容貌，加上兩行鼻血，一時間也不敢上前討回皮球。

阿添一手按著鼻樑，一手拾起皮球，善意地將球拋回場中。少年走前兩步，像見鬼一樣接過皮球就急急走開。

不遠處一個身穿黑色西裝，戴著黑色太陽眼鏡的男人正看著鬼仔添的一舉一動。雖然太陽早已西下，黑衣人卻仍頑固地架起太陽眼鏡，向阿添走去。

阿添覺得奇怪，自懂事以來，從未試過有人向他主動行近。阿添禮貌地向黑衣人點點頭。黑衣人先開口，「你是否覺得很孤獨？」

阿添給黑衣人這樣一問，突然間不知怎樣回答。

黑衣人續說，「其實我係陰間派來嘅『枉死人口處理組』高級督察黄啟發，據資料顯示，你嘅命格係天煞孤星，注定一世孤獨終老，而且但凡與你有關係嘅人都會死於非命。不過因為你前世並非壞人，所以為了減少你今世嘅罪孽，於是『人口出生設計所』嘅設計師刻意將你嘅面孔扭曲，有咁核突設計得咁核突，等你身邊嘅人唔敢同你接近。咁樣你就唔會連累他人，所以孤獨係你嘅宿命，也是上天注定。」

如果是平常人聽見黑衣人這番鬼話，反應一係問候他的娘親，一係當他是儍佬。但這番話聽進阿添的耳朵裡，卻令他茅塞頓開。他問黄啟發，「咁我呢一世人係唔係唔可以一嘗戀愛嘅滋味？」畢竟少年人最渴望的還是愛情。

黄啟發托了托太陽眼鏡，「咁又未必一定唔得。我今次來就係要幫你一嘗拍拖嘅樂趣！」

「係真唔係呀？」阿添的眼神射出從未試過的光彩。

「但對象一定要係半隻腳已經踏進鬼門關嘅『準枉死人』！」黄啟發咀角露出神秘的笑容。

「甚麼是準枉死人？」阿添好奇。

「『準枉死人』就係命中注定要死於非命嘅人，因為佢哋注定會死於非命，所以同你嘅命格最夾。你同呢種女仔拍拖，就唔算害咗佢哋，因為反正佢哋最終都係難逃一死，你明唔明？」黄啟發努力解釋。

「我明，但係要點樣先可以揾到呢種女仔呢？」阿添心急地問。

黄啟發不語，只是把手伸進西裝的內袋，並拿出一本「死亡筆記」。

這本硬皮精裝的「死亡筆記」，封面以黑色人皮製造，呈長方形，面積約是『我們的博客城』的一半。

「嗱，你睇呢份就係即將枉死女孩子嘅名單，而且仲個個有相睇。呢個十八歲，都幾靚，但距離枉死嘅間得八個鐘，你都係唔夠時間去結識佢架嘞！」黄啟發翻開其中一頁。

他們逐個人名查閱，直至看見韓雪的資料。

「呢個都幾啱你喎，十九歲，中等身材，個樣有啲似陳寶珠，斯斯文文，距離枉死仲有三個月，不如就試吓呢個啦！」

「我咁大個仔都未追過女仔，加上我呢副尊容，點追呀？」阿添焦急地問。

「你大可以放心，我可以喺韓雪呢頁上面寫低你嘅資料，同埋你同韓雪之間嘅愛情故事，咁你哋就自動會結識到架嘞，而且每個細節都會依足劇本進行，嘿嘿嘿！」黄啟發拍著阿添的膊頭。

黄啟發拿出一支墨水筆，當起作家，寫下阿添與韓雪的愛情故事。  (待續)