又到深秋

2012/11/03 12:32:19 網誌分類: 未分類
03 Nov

 

聚舊見下舊友。有位多年朋友十多年前同我住同一屋苑,恰巧他在我現在住的屋苑又有兩個單位,一個已經出售,現想賣埋另一個,所以上星期日我地一齊落地產舖。他的單位大概可成交$5-5.5m,我問他,你賣左層樓D錢做,他說我想在我現在住的大廈買多個750尺單位。我問,放租嗎?他答,唔係,太多雜物想用來擺野。嘩,唔係嗎,750尺單位用來擺野?我個單位得680尺咋。但此君在馬鞍山還有2000尺相連單位。他們夫婦完全體現夫妻同心其利斷金的道理,大家都搵到錢又毫無猶豫努力買磚頭。另一些同我年齡相若的朋友,一係就住緊千尺大單位,一係手頭有兩三個單位。而我,一子錯,滿盤皆落索。其實也不是沒機會翻身,但我沒有把握,不自覺有種失落。現在工作又有危機,人生路好多危機,覺得好難前進。真係好彩冇細路,唔好累人累己。蕃茄講得好好,醫療費好貴,除非死得好快,如果慢慢病,真係冇一千萬儲蓄都唔好諗退休。

 

星期天晚上同這位朋友去譽港灣商場食飯,順便去對面地產睇下,我見有41校網樓走去看看,原本係九龍城舊區一坐單棟樓,兩年樓花,賣一萬多蚊一尺。我話咁貴,政府出招樓市應有回調,個代理好寸,話一定唔會,仲問我知唔知麵粉價幾錢,我話理得你麵粉價幾錢,樓市看供求。我朋友笑笑口拉我走,個代理系我地身後大聲講,你地甘心態我真係擔心你地永冇辦法上樓。嘩,這個有眼無珠之人,火都黎!朋友又笑住講,你嬲黎做乜?此人唔會開到單。跟住我地去隔離美X,有位師奶樣子的代理同我地傾計,話買樓吾同買菜,梗要格下價,搵又平又靚的樓。她話搵到荀盤可以通知我地,結果得到朋友肯首下星期看現崇山。格離個哥仔,聽食風啦。你話勒,我個朋友竟可以無窮無盡繼續買樓,成日話,人地幫我供者嗎。我話,我唔太想住黃大仙,他說,邊個叫你住,搵人供,層壓式,你有首期隨時都做得,明嗎?

 

這位朋友手上的單位都大致供滿,所以他又興起搵人供樓的念頭。見到朋友好,我替他們高興,但也許近日中年危機,人生低迷,情緒低落。在人比人下覺得自己表現很差。

 

星期二晚早約好陪母親看中醫,打算最遲6.30pm離開公司。六時許,格離部門的鬼佬無端端走過來,說,can I borrow your computer skillsI need to merge a few presentations and documents。我話,對唔住,我今晚趕住走。他好意外,當然也有些少不快,但當晚落雨絲濕,我應承陪母親不想失約。我自己老闆有cocktail party,我是專等揀他不在office的日子才早走。於是我事後八下幫格離部門鬼佬做該份東西的同事去左邊?原來說因為子女考試,要請幾天下午的假 (pm leave)。我漸漸對這些「仔女」假有點反感。當晚我自己老闆又來電,他只是當我是他的notepad,有野講我聽一齊記住。母親問,他是這樣晚晚都找你?我說,也不一定,有事才找。可能她意想不到我仍在接電話,Yes boss, OK OK OK 的階段。她也許以為我該是在打電話發號司令的階段。第二朝一早我自動出現幫格離部門那位老闆touch up他份presentation,費事他覺得我待慢了他。

 

忽然很難受,好像呼吸不到的感覺。人世間走一趟該怎走?實在該好好的走,努力的走,不要白活。但忽然發現自己正在白活,怎算?不知,真的不知。人在年輕時可以放肆賭下,我押重注賭了,輸晒,是錯得很交關,不可原諒嗎?

 

我們一生在追求甚麼?如果知道自己所求是甚麼,所走的路會到甚麼終點,那是沒問題的,前進,就是了。錦衣美食固然好,但清茶淡飯也可自得其樂,只要自己知道自己的方向,自己的生活過得安心。但如果仍在迷失,甚至感到無路可走,人生就會過得很辛苦。

 

對火燎森認識不多,除了知道他碌卡買#857中石油。在大廳見到這篇文,但覺得年輕人真的應該這樣拼一拼才會無憾。他口中的YT,就是Winnie Yu 余琤 ,跟余有數面之緣,十二年前我還是稱呼他為Winnie,但好像怪怪的,幸好後來他的友人通知我們改口叫YT (Yu Tsang),就舒服得多。

 

年少多好,要努力,珍惜。

 

 

投資日記 -火燎森

 

再見了

   

2012/10/19 上午 01:05:58

 

 

六年前執筆寫blog 之日是我入股中石油之後的另一個轉捩點, 你們令我在極短時間內瀏覽突破一百萬, 不久有幸得到出版商支持, 出了 一書, 又幸好有天時之合, 銷量出乎意料的好。

 

及後又因為這本拙作承蒙黄永錯愛, 將我推薦给章濤, 章先生再帶我見了YT, 就這樣, 就將我的聲音帶给大家4年。

 

多謝黄永發掘, 多謝章濤, 一直是我學習對象, 多謝YT , 沒你就沒SNB

 

, 真的得到很多! 孫柏文這個好拍擋沒有他相信節目兩年前就消失了。老孫亦令自己眼界大開, 哈哈, 三十歲人能拉頭馬相信不多吧! 說實話, 在有人需要幫手時, 孫兄是最熱心赤誠地盡力幫助朋友, 十分難得! 除了用天才及大情大性去形容他之外, 用好好先生去描寫他的性情亦不過份。

 

多謝Eric, 不經不覺與你經歷不少風風雨雨, 一切盡在不言中, 多謝你一直對SNB不離不棄, 多謝你令節目易入耳度大增!

 

多謝君姐, 多謝Paul, 多謝時昌的時先生, 多謝759 主席林先生, 沒有你們的啟發, 我現在所經營的這盤生意要多走5年灣路。

 

多謝陳志雲, 有通知期是對DJ最大的信任!

 

多謝SNB所有會員, 希望沒有浪費你們付出的努力!

 

說回自己…………….

 

其實在深圳打拼了一年, 由一手包辦寫文拍攝銷售入貨包裝, 到現在已有四個比較獨立的部門, 由一間辦公室打通到九間, 不知通宵了多少個晚上, 不知忘記了多少餐飯, 當中付出血與汗非筆墨能容。

 

收到通知當日, 正好是香港區第3間實體店的開幕, 可能是命運要我好好將自己的公司發展吧!

 

SNB會員說: “如果你肯將近況寫成書, 肯定比之前的精采!” , 可惜, 我想就讓這一切隨風。

 

多謝大家。

回應 (85)
我要發表
Persie
Persie 2012/12/03 08:03:23 回覆

pplo:謝謝您,您年紀輕輕,但我好欣賞您做人的態度!

Persie
Persie 2012/12/03 00:49:41 回覆

主席:本來無一物,何處惹塵埃。

慳妹
慳妹 2012/12/02 22:41:26 回覆

能忘過去曾經事,便是當今自在身。

2012/12/02 11:48:51 回覆

persie :早晨,好高興見到你留言,我都經常問傻問題,把心中不快講出來,抒發後便沒事,不好收埋鬱住鬱住會生病的

2012/12/02 08:16:36 回覆

hahahah 認同巴要再上一層樓,他要離開熱刺。唔殘酷丫, 摩廸同佢走都好正常, 足球員生涯短, 我係好明白事理的球迷. {#icons_cat2}就算當年蘇甘寶過阿仙奴我都OK同理解架.

可惜佢又傷左要休息2weeks.

Defoe 勁呀!!!! 3:0 {#icons_cat1}

 

hohohoho 你退休後咪來找我囉~~~~

Persie
Persie 2012/12/02 06:56:52 回覆

馬德理市打比,皇馬合理勝出,C朗演出優異,遠勝被凍結的法卡奧。至於我的愛隊,今晚演出不值一提,今屆也幾乎可肯定會跌出前四。

Persie
Persie 2012/12/02 04:51:29 回覆

今晚對畢爾包美斯究竟入左一球定兩球? 

暫未有定案,因為其中一球可能計own goal

Persie
Persie 2012/12/02 04:48:24 回覆

我終於同Cable TV達成續約協議。 

英超播映至明年五月,月費 $299 - 高清($219) + 足球($80)。五月後只剩歐聯歐霸,月費 $259 --高清($219) + 足球 ($40)

浪子,我退休後請帶我去投注站睇波,同埋去旺角街市吃美食,謝謝您!

Persie
Persie 2012/12/02 04:41:26 回覆

浪子,巴爾絕對係顆明星,兩年前狂爆馬干已令舉世震驚,難得他年少曾有很大傷患但可以完全康復,但要再上一層樓,他要離開熱刺。這是很殘酷的現實,像雲佩斯離開阿仙奴一樣。Now TV班講波佬,成日話巴塞簽艾巴簽得好,在他歐國杯爆紅前已經簽左,而不用貴簽巴爾。大佬,巴爾正宗左翼,唔該唔好成日話他係閘。艾巴係好喜歡出擊的左閘,而艾比度是非常正宗的左閘,各擅勝場,就是如此。

Persie
Persie 2012/12/02 04:39:06 回覆

世界足球先生大熱選出三名候選球員: 

C -- 帶領皇馬破紀錄分數西甲奪冠。

美斯 -- 今年 (calendar year) 挑戰埋梅拿的入球紀錄。

恩尼斯達 -- 歐國杯盟主骨幹成員兼最佳球員 (雖然我認為整個賽事表現最好的是派路) 

近幾場看Barca,真的覺得恩尼斯達好鬼好波,又好鬼好品。

 

美斯,我覺得他今屆變左,大佬左,會發脾氣,會罵人,但球技一再精進,尤其罰球處理,所以我都仍會投他一票。

Persie
Persie 2012/12/02 04:34:17 回覆

soho,多謝,我可以的,不過上周英國鬼來港,把我折騰得半死。有天還要7.30am返到公司。要命在之前一晚是Everton vs Arsenal,所以我3.45am醒來波,完場就返工,直踩到當晚8pm

我都不會去看相問卜,但有個人會在我身邊拿出龜殼,塔羅牌等等來算。今年年頭阿妹同我講,咦,你今年驛馬星動喎。我話,我都唔會出trip或旅行。阿妹話,搬屋都算架,你搬屋嗎?我話沒這打算。結果我剛搬左office

Persie
Persie 2012/12/02 04:29:25 回覆

多謝bobofox與蕃茄的分享。我再唔會問這些傻問題。人世間悲歡離合,陰晴圓缺是平常。見到小兄妹命喪黑夜深海,我覺得好難接受。你告訴我因果,惡有惡報,他們做錯了什麼死得這麼慘?我冇答案。唯有說,是他們上世種的孽罷! 

我只知道,從現在開始我要忘記我是誰,不要與任何人比較,只要自己身體還可以,就不要再抱怨。 就算有錢定錢,我覺得我都會是這樣的人,很難改變。

 

上次去朋友家,我帶左兩張餅卡買餅做手信。跟朋友去選餅,他好想食但看了良久結果沒有買,因為我膽固醇高他血糖高,係應該戒甜。有錢嗎?但你身體唔食得。好簡單的幾件餅,可望而不可即,好笑嗎?而這,就是人生。

幪面馬仔
幪面馬仔 2012/11/30 23:19:10 回覆

又一星期喇,希望大家過一個開心週末

soho*
soho* 2012/11/29 21:09:56 回覆

Persie 的狀態返來未呀? 

{#803325tg1avcx6li.gif}

2012/11/29 06:24:21 回覆

Bale 狀態返來了 yeah~~~~ {#icons_cat2}

2012/11/25 21:24:45 回覆

 網友們,請告訴我,你們快樂嗎?"

PP, 真巧, 上半年有舊情人問過我這問題, 老友從美回來參加死黨婚禮, 也問了同一問題, 你是第3個.

答案是一樣: 我追求的不是快樂, 得不到也是應該的.

狐媽中秋後住院2 次, 上星期又入院了, 這幾天才出來, 昨晚方方土去了台灣, 我第一次陪狐媽訓, 但習慣了一個人睡的我, 實在不慣有人在旁, 轉身又怕吵醒她, 腰骨痛得僵直難當, 但聽她呼呼鼻息, 我心滿意足.

2000年後我幾近破產, 車仔屋仔老公仔, 連老豆都失去, 至今仍然3 失, 但我心滿意足.

心如知足則是福.  

蕃茄
蕃茄 2012/11/25 19:10:53 回覆

" 網友們,請告訴我,你們快樂嗎?"

日常生活中, 我亦會有時感到焦慮/擔心/寂寞/遺憾, 但我 "快樂+平和" 的時間遠比不快樂的時間多, 我應該是個快樂的人吧.

soho, 我都是由細到大都不會主動去睇相/算命, 理由亦同你一樣, 免得心掛掛, 但試過有某場合,有個"高人"走埋來好禪咁贈我幾句, 基於禮貌, 我無得即閃唔聽, 唯有硬受左阿高人大師幾句啦. {#icons_dog9}

 

soho*
soho* 2012/11/25 16:12:40 回覆

Persie, 21/12/2012 世界末日論, 伯母話今年要同你提早做冬, 唔理係講笑定係講真, 傳言的確係影響到一些人

就好似當上證綜指再次跌穿2000點見1995點, 創45個月低位, 市場就傳內地本周末減 RRR 0.5%, 其後查出源頭係微博, 可信程度不高, 大家都唔係幾信, 但已經影響左港股, 屋仔.金融股急升, 呢D就係傳言的威力, 美國報章指溫家寶家族牽涉平保醜聞, 唔理是真是假, 亦令平保有壓力, 大鱷借消息舞高弄低發大財真係好容易

有朋友去睇相, 相士話佢暑假期間會在現在的住所附近遇上交通意外, 她是教師, 佢話唔理是真是假, 避左先, 結果去左大陸住左兩個月

我從來唔去算命, 就係怕相士的說話影響我的生活, 就算好理性地拒絕迷信, 但點都會心掛掛, 如果係預測有不幸的言論就更加會周身唔安樂

Persie
Persie 2012/11/25 04:27:20 回覆

人怕出名

// 潛入投資學堂 揭炒樓「秘」招

這個名為「 FCI小本地產投資.財技實戰課程」的課堂,包五個課堂加一個睇樓團,學員約七十人,當中以三十歲的年輕上班族及師奶為主。上堂前一眾學員充滿期盼;「我想好似 Anthony咁,上到車之餘仲有樓收吓租。」「我見有學員成功咗,話同人夾錢買鋪,我都想試吓呀!」

課程的「頭炮」第一堂,由被形容為重量級投資者的「財叔」開始。財叔在網上的「財務自由同學會」群組,已突破一千人,被封為「宅男樓神」。上堂前 FCI負責人提醒學員:「千祈唔好打開財叔個稅務月光寶盒,呢個寶盒打開咗,多一堂都講唔晒!」愛吹水的財叔,不負眾望,由廿年前以四萬元置業開始講起,並教了一些炒樓蠱惑招,如:「如何摸到最好價?想賣樓,梗係扮買家探行情;想買樓,扮賣家放盤啦!」又如「唔好自認係真正用家,炒家唔怕認,筍盤先會益你!」

說到凌晨十二點,部分學員離開,財叔才步入戲肉。他大爆曾有幾層灣仔物業被稅局追稅,靠「出糧」予家人作公司開支扣稅,才得以解決,「咁我阿媽喺我公司做清潔,都要出份糧俾佢㗎!稅局問我,點解清潔工咁高人工,係囉,我都想知點解佢成日話要加人工!」他還笑言,現時朋友多了,可以「交換啲老豆老母用」。 //

Persie
Persie 2012/11/25 04:21:02 回覆

非常乏善足陳的一場球賽,阿仙奴唔輸算偷笑。

Persie
Persie 2012/11/24 12:49:45 回覆

世界末日,我都想,有冇咁著數? 

其實我媽媽很有趣,聽到世界末日,說今年要同我提早做,免得末日死鬼左沒得吃冬至飯。

Persie
Persie 2012/11/24 12:49:28 回覆

李聯廣,你真知我心,戲劇人生,是我的愛碟! 

 

GF,好高興你得到信仰的幫助。我都要去天涯海角,靈修,靜靜的思考一下人生的道理。

 

天佑,你隻手製二胡成功嗎? 

ka kawishing you all the best!

Persie
Persie 2012/11/24 12:48:22 回覆

多謝各位的回應,我會再認真思考。   

pplo,如我的年紀,不會有人因為愛而跟我跳,只因每人都有他的困難,可能是解決不到的困局,錢都解決唔到的事情,或是手上的錢解決不到的事情。

我現在的生活,已經非常舒適,沒有什麼好抱怨,但每當夜深,總感到那種深深的痛苦,亦好難在此一一細表。 

星期一英國團隊來港,我都預知不會有好事,昨天已揭盅,有個明明是他們在英國的project,移師來港進行,我老闆仲做埋team head,我今次死梗。或說,唔通你日日唔洗做咩?非也,每日工作不少,有些是固定要做的事,我可以接受開新project,公平公正去做事,但這班鬼,不用咩起件事但又可以指指點點,才最討厭。

Persie
Persie 2012/11/24 12:47:35 回覆

soho:免息免手續費貸款係萬中無一,我手上30多張卡,也只是大新做到。我朋友salary係我兩倍,打去大新,銀行說他不是特選客戶,做唔到給他,把他氣得紮紮跳。  

浪子:東亞同Citibank好狼,只憑一張卡,就下下要借五六十萬給我,但當然要收息,我就多多都唔要。

浪子:都是Adebayor的錯!

2012/11/24 12:08:47 回覆

網友們,  我會努力!加油! {#icono_85} {#icono_85} {#icono_85}

2012/11/24 12:04:00 回覆

//21/12/2012 係末日就好了//  {#iconb_391}  You are dreaming !

//每小時五舊水//  {#iconb_3131}You are dreaming ! X 2

2012/11/24 11:58:52 回覆

戲劇人生

Good !  {#iconb_364}

 

李聯廣
李聯廣 2012/11/24 11:47:33 回覆

Persie, 人生不是簡單的零和遊戲,付出多少便肯定會收獲多少。種下的善因,收獲到的可能是惡果!在這個戲劇人生裡,所謂“好人有好報”、“吃得苦中苦方為人上人”不是絕對的。在現實生活裡,我們不難發現,你付出了,依照遊戲規則,是有收獲;不過收獲可能是我們認為好的,也可能是不好的、消極的。

人生定有快樂,亦有痛苦。GF說得對,不用太執著,放下自我,得快樂時且快樂吧。送給你《戲劇人生》http://www.youtube.com/watch?v=HEU9CtcoTQ4

李聯廣
李聯廣 2012/11/24 11:06:47 回覆

Persie, 隻778因未夠貨所以仍然持有,而且只有升了約60%(雖然已遠超我的目標),如升幅有80%以上,或會考慮。其實當初都有諗過將全數405換入778,當時只估計778會跑贏405,完全估不到會贏咁多。

真正令我眼癱癱其實係隻823,短倉已係39.x全部出晒,估唔到除淨後最高可以升到43.1,賺少左成20k。還好仍持有包括IPO時買入的長倉,不過隻823始終係我近兩年賺得最多的股票。

2012/11/24 00:20:56 回覆

網友們,請告訴我,你們快樂嗎?

從前很不快樂,因為對自己要求高,但無奈眼高手低,總覺得事與願違。

過去大半年想通了很多道理,加上信仰的幫助,如今是過去十多年來心裡感到最平安喜樂的日子。想通了的東西包括:

1. 事物發展不會隨人的意志轉移,時機條件成熟,自然水到渠成。強求只會令自己不快樂,根本於事無補。

2. 放下自我,打破自己驕傲自大的心態。接受人非無所不能,也會有失敗受挫的時候。

3. 時刻心懷感恩。一鳥在手,遠勝百鳥在林。細心思索手上擁有的,會發現上天待你已不簿,畢竟幸福非必然。

4. 別迷信金錢萬能。世上有很多東西,十億美金都買不到,例如健康和親情。在下的經驗是,陪父母飲茶聊天,較送錢孝敬他們,更能令老人家歡喜。

人生難關重重,很多時只能靠自己頂硬上克服。闖過難關者,在我眼中,都是真丈夫、大英雄。

 

soho*
soho* 2012/11/23 23:45:11 回覆

我不喜歡欠債的感覺, 所以銀行向我推銷免息免手續費貸款, 我都一一拒絕

soho*
soho* 2012/11/23 23:43:00 回覆

網友們,請告訴我,你們快樂嗎? 

我好肯定的回答你: 我不快樂

以10分 論不快樂指數, 我俾自己10分滿分

有好多難題無法解決, 有好多不如意的事無法釋懷, 可以做到的是不去想, 不去處理, 暫時逃避以獲得片刻安寧

有好多野放唔低, 所以我不能一走了之

我喜歡世界末日論, 21/12/2012 係末日就好了

2012/11/23 20:11:51 回覆

"大新銀行又免息免手續費借左廿一萬給我"

我好後悔cut左大新的信用卡. 渣打借41萬給我但收2.7%年利率. 試過話借100萬添, 我都唔知佢點批幾十倍月薪借俾我. 當然去到7-8%.

 

2012/11/23 20:01:01 回覆

意興闌珊的是我才對!!!! 又一次領先後倒輸, 真係無癮 {#icons_cat4}

快唔快樂好難答, 因為我一向追求的還未實現, 也離目標越來越遠. 不過我學懂了珍惜現在所有的, 活在當下.

"我永遠都只會在不應沽出時沽出,應沽時就不沽" 我經常都係咁, 我們只係凡人, 買低沽頂呢D是神人先做到. 偶爾成功係運氣. 823我在未除淨前沽了兩手, 嘔血中!!!!

中電#2換成長江基建, 我一定會. 不過近排長江基建真係好鬼弱!!!! $46以下買應該好些. 我由八月開始收集到現在, 還是坐艇中. 但若歐債不爆美國唔跳崖, 世界無大戰 22/12唔係未日的話 個人相信明年應該可到$50-55.  {#icons_cat1}

無膽在$58下買多手2318... 返家鄉的路又遠了~~~ {#icons_cat5}

人車合一 I like it!!!! hahahahah {#icons_cat2}

 

2012/11/23 19:23:56 回覆

//月圓之夜//

煩配西 加 月夜

= 春江 花 月夜 ? 

2012/11/23 14:40:58 回覆

網友們,請告訴我,你們快樂嗎?

Persie :我未試過在聖誕、新年出外旅行,未食過聖誕、新年大餐,學識唔高,職位低微,工作上規距越來越嚴,每天工作常身水身汗,買野要等減價 (通常買食物,很少買衫),但我喜歡返工,雖然人工很少,平日娛樂也少,但我想我還是快樂多一些

p.s. 你和另一半相約一齊離開,是她自願,還是因為深愛你?可否退一步想,為深愛的對方,大家努力愉快地生活下去 (能遇到心愛的人是一種幸福,有今生未必有來世,多想開心的事,有困惑在這裡傾下講下,抒發一下,多言了),希望你早日走出陰暗面

幪面馬仔
幪面馬仔 2012/11/23 10:00:06 回覆

舅父仔

你是辛苦命,個天唔會咁益你,做多幾年人啦細路。 {#iconb_530}

仲有,你不在,邊個同我傾心事啊 {#iconb_223}

Persie
Persie 2012/11/23 04:09:00 回覆

大新銀行又免息免手續費借左廿一萬給我,只需$5000信用卡簽賬。等我想下用來買什麼。最傷的一年係前年,$24買入領匯,$29沽左冇再買返。去年的貸款買入左中華煤氣,表現很好。我的#435升左70%,在練試我的耐性。還有些零星股票,都有少少執。如果把這些股票沽出,今年的十萬指標已達。  

 

不過,我永遠都只會在不應沽出時沽出,應沽時就不沽。

浪子,我在想,好不好把中電#2換成長江基建?

李聯廣,隻#778令我眼癱癱。你被它試到心癢難熬嗎?

Persie
Persie 2012/11/23 03:46:25 回覆

//有人話, 月光都會 有影響.//

 

天佑,心有靈犀! 

正想寫一篇關於月圓之夜的blog,不過提不起勁。

Persie
Persie 2012/11/23 03:39:40 回覆

cashin,如果我走,會同另一半一齊走,我們說好了。

 

不過,父母在,不遠遊,遊必有方。 

要待雙方家長都不在才想。

Persie
Persie 2012/11/23 03:36:46 回覆

Gazza有去看拉素對熱刺,他消瘦了許多。 

看盡球員冒起,成長,大勇大熟,老退,退隱。我想唔認老都唔得。

Persie
Persie 2012/11/23 03:31:44 回覆

做人要感恩,珍惜所有。我每日都唸多遍,提醒自己。 

網友們,請告訴我,你們快樂嗎?

Persie
Persie 2012/11/23 03:31:01 回覆

ka ka:我以下說的話可能唔啱你聽。我認為,去到某階段,就係把老人送進老人院的時候。你同工人捱到入院,已表示是體力不支,你們已盡所能。如果是為愛而令自己的生活都冇曬,每天只是照顧人,做厭惡性的工作,我不認為這是善待自己的方法。如循住我的人生去想,我有天都會入住老人院,給人漠視甚至疏忽照顧,會生不如死,這是人生必經階段。如果我有個女,我不會想她每天幫我洗澡換片。我希望她有正常的人生,我希望她開心。只要她有空來探我,跟我說話就可。看到她快樂,會是我最大安慰。

Persie
Persie 2012/11/23 03:28:40 回覆

多謝各位。我在意興闌珊的階段。昨晚見到普度精彩的入球,心中是喝了聲彩,阿仙奴演出了一場成熟的球賽,好多球員表現很好,Wilshere的演出與入球尤其令我安慰,其實我是頗高興的,但但卻連留個言的mood都沒有。現在看熱刺,也只是隨意看看,一點都不投入。

 

現在無法放假,因為正是是如火如荼的annual operating plan時間,做明年budget,在衝刺。下週又有英國團隊來港,我的腦已經拒絕去想下個禮拜的事情。如果每天起床都不想上班,返工已變成苦差,只是為份人工。不過我的內心並沒有想轉工,因為這會更複雜,更困難。

 

買了星期六的票同小B去海洋公園,但他卻病了。前個星期因高燒入院住左幾天。每次都是耳鼻喉的事,中耳炎,喉嚨發炎,發燒,咳嗽,照肺。我都不知怎麼一個小兒可以有這麼多病。上星期六小B學校要他賣旗,好多姐姐嬸嬸幫他買,逗他說話。BPSY跳馬舞的videocute爆。 

上星期五被捉快車,被影相時我已知道。人車合一的快感,現換來告票一張。

2012/11/22 23:02:04 回覆

Persie,

一念天堂,一念地獄,想吓你媽咪,你另一半吧

不過以你性格(我懶醒),你係講左唔會做既 {#iconb_513}

不過呢, 搵個心理醫生睇下真係好啲喎

ka ka,

願一齊順利

 

2012/11/22 22:59:11 回覆

//竟然覺得跳下去都無妨//

哀莫大於心死 ?

我諗, 揾個 心理醫生 睇下好啲喎.

憂鬱有如  傷風感冒, 好普通, 還會 傳染.

男生 會唔會有 更年期 嘅呢 ?

有人話, 月光都會 有影響.

過咗就無事.

 

或者, 物質富足之餘, 試下 信主,  或  做義工.

女生最怕無人愛.

男生最怕 無新鮮 感. 

soho*
soho* 2012/11/22 21:07:39 回覆

kaka, 有冇請鐘點女傭幫手? 如果搵唔到, 我都可以咖! 每小時五舊水, 唔包抹大小便

舅父仔, 取大假出外去散心如何? 沒時間的話, 短程去澳門住兩日也好, 情緒低落唔講得笑, 一定要諗辦法減壓

你覺得跳下去都無妨, 說得對呀! 當事人梗係無妨啦! 但失去了你, 身邊的至親活在世上會係生不如死, 你就一走了之, 卻害了你的至親至愛, 不負責任呢噢! 難道這是你希望的結果嗎?

chanreborn
chanreborn 2012/11/21 18:53:31 回覆
2012/11/21 14:30:33 回覆

Kaka:你好,其實別人說什麼也幫唔到你,但我希望你注意身體,別太累壞自己,才可照顧老人家及家人,忙裡偷閒,等自己可以小休一會,回回氣再拼搏過,祝福你

2012/11/21 11:18:26 回覆

persie,你知道我現在既處境後可能會令你冇咁想做(嘜嘜)既衝動。希望幫到你少少。

我真係好黑仔,A工人約滿走咗,新工人大肚走佬,依家連 B 工人都病埋入咗醫院。 冇囇工人,我得一對手,點做到咁多嘢呀!唔通送囇二個老人家入老人院咩!

最慘都唔係依啲,係二個星期前比有二十年好好感情既家人指責,把所有佢哋不付責任既行為反過來指責全部都係你錯!我當時真係傷心到想死,比佢哋大吵大鬧後結果去咗急症室大修。

現實真係好殘酷,往日吃喝玩樂好容易好開心,但要長期照顧話知你係親生父母都當係負累。而我做唔出把二個老人家送入老人院,奶奶以前對我好好,唔忍心真係唔忍心,就算我落手落腳幫佢沖涼換片抺大便我都好樂意去做,我當佢係八十幾歲既大 BB 來照顧,病已經好慘,有比人嫌棄既感覺仲慘。好彩自己有能力靠自己,有能力照顧自己所愛的人係福氣!感恩!

我要我會冷靜面對今次困境。努力!加油!

工人姐姐病得好重,點算!

瀏覽更多回應 正在載入...
user

已關注

最新回應

幪面馬仔
幪面馬仔 2024/02/12

有緣人

{#iconb_282}

李聯廣
李聯廣 2024/02/12

恭喜發財!

有緣人也在此祝各位龍年行好運, 身體健康,萬事如意!

幪面馬仔
幪面馬仔 2024/02/11

{#iconb_210}

有緣看見的,

身體健康

幪面馬仔
幪面馬仔 2023/12/20

又到聖誕,又到聖誕

{#iconb_259}

來年大家,開開心心。