錢樹良
錢樹良
錢樹良

金鑊鏟偷樑換柱

2012/11/08 08:42:38 網誌分類: 經濟
08 Nov
        潘錦,四邑人氏,精於廚藝,人稱「金鑊鏟」。早年神州戰亂,潘錦輾轉來港,在上環地痞酒家揸鑊鏟。潘錦敬業樂業,雖廁身地痞酒家,從不胡胡混混過日晨,每一張廚房單,縱然普通到「蝦醬通菜牛」,亦落足心機去炒,做到料靚鑊氣正。期間,其拿手者,乃「蒸魚腸」及「炸子雞」,聞名遐邇。

        一般以為,地痞酒家叻極有限,食客多是販夫走卒而已,難有闊佬幫襯。此言差矣,早年上環、西環闊佬,十之八九禾稈冚珍珠,幫襯地痞酒家,揾啲好嘢食下,飽飽口福,司空見慣。反觀今之新發財,每多叻唔切,錦衣夜行摎明星,出入五星級酒店擺款,已非同日而語。

        當年,有闊佬何富戶,喜食蒸魚腸,嘗試過潘錦之廚藝,認為一絕,讚不絕口,常打電話事前預訂往品嚐。

        一個人行起運時,擋亦擋唔住。一夕,何富戶與好友陳二叔往食蒸魚腸、炸子雞。潘錦親自下廚不在話下,更執禮筵前,甚得何、陳二人歡心。席間,陳二叔說是何富戶乜嘢正行生意亦做過,單獨未做過酒樓,既然好美食,何不開間酒樓,交由潘錦打理,屆時想食乜都得。

        何富戶乃問潘錦意下如何?潘錦難得有闊佬睇起,打本做生意,焉有不應承之理。遂盡以半生積蓄作為投資股本,在何富戶、陳二叔支持下開酒樓。何富戶為鼓勵潘錦做好檔生意,𠄘諾賺到錢分紅時,潘錦多分一成,作為獎勵。

        時來風送滕王閣,酒樓在潘錦主理下,在何富戶及陳二叔之人脈影響下,做得有聲有色,每歲盈利數以億元計。幾年間,潘錦分得紅利,可以買幢唐樓收租。

        有云:兵無常勢,水無常形。正當萬眾沉醉娛樂昇平,此地政局突然肘腋生變,人心惶惶,酒樓生意一落千丈,連月虧損,一發不可收拾。

        潘錦有見於此,徵得何、陳二人同意下,施展「偷樑換柱」財技,把酒樓營運結束截數,派發員工公積金及遣散費後,把剩餘下來的公司儲備作為資本,在原址僱用原有的員工,沿用舊字號,註冊新有限公司再開業,實行睇餸食飯。惟是時局未靖,加上新派粵菜崛起,業界競爭大。潘錦審時度勢,以僅有之資本,委實難以維持長久,遂再施「偷樑換柱」財技,把酒樓賣枱,遣散員工,自己跑入新界經營魚塘。

        何以潘錦看好養魚業?無他,他認為動盪局面終會平定下來,一旦經濟復甦,便會帶動飲食業復甦,屆時酒樓、食府、家庭對海鮮之需求必然大增,生意不愁。果然,時局平靖後,海鮮市場空前興旺。潘錦平時與飲食業關係良好,行家喜向他攞貨,魚塘收益不少於當年做酒樓。

        潘錦面對兩次難關,能從容對付,全仗財技「偷樑換柱」,發揮得宜。

        錢樹良

        
回應 (0)
我要發表
user