阮世生承接十年前爆笑之作 阿Sa伊健演活夫婦成最佳組合
2012/11/26 08:41:41 網誌分類: 娛樂
| 那年那天的《我老婆唔夠秤》成為一時佳話，賣個滿堂紅，10年後，阮世生、鄭伊健、蔡卓妍這個鐵三角再次碰頭，合拍延續篇《我老公唔生性》，破天荒演盡港男港女十年前後對愛情與婚姻的睇法與變化，一部橫跨十年、造就最佳組合的愛情喜劇，勾起你與我的共同回憶，你們又豈可錯過﹖在此，我先要預祝電影票房節節上升。 主持﹕黃柏高 統籌﹕林永匡 協力﹕袁東亮、龍婉琪 場地提供﹕新斗記 並不是每一套電影都能夠翻生拍續集，雖然鄭伊健搭蔡卓妍，單睇牌面已夠煞食，但十年後再次推出續集仍能引得人人期待，就絕非易事。可能抓緊觀眾的心魔，與選取合適時間，正正就是導演獨有的觸覺與專業。 阮世生：「《我老公唔生性》靈感來自『係時候嚟個Gathering』，恍似Call返中、小同學出嚟玩咁！去年諗起十年前拍咗套《我老婆唔夠秤》，????家係時候叫返佢哋出嚟聚舊，從而衍生今次續集。」 續集延伸 鄭伊健：「其實Timing好緊要，而導演揀咗呢個時間，我覺得非常好，食正大家情緒，我同阿Sa一聽到開續集都覺得，好喎，覺得個時間好恰當，若果導演喺兩年或之前提出呢個建議，我諗大家都未必想拍。」 蔡卓妍：「我知道之後，第一反應係『好喎﹗』，因為好難得有一個角色可以再食返條水，一來並非每個演員都有機會得到呢啲角色，二來一定係個角色有價值先會有人想再開拍續集，加上我同伊健有一定程度的化學作用，所以一聽到開續集都非常贊成。」 十年前，導演大膽將多種不協調的元素混在一起，又以老夫少妻作為Gimmick吸引觀眾眼球，結果成功引起迴響；十年後，導演再一次掌握到時代的步伐，將現今的婚姻問題拋出來讓觀眾反思，作為續集的延伸。 蔡卓妍：「我嘅角色就係一個十年來都無任何進步嘅女人，所以個老公就開始頂佢唔順，當我同伊健鬧離婚時，一方面佢同女學生有微妙嘅關係，而我亦被安排巧合地遇上一位原來已經暗戀咗我二十年嘅男人，雖然佢做咗好多伊健一直唔肯同我做嘅事，但畢竟唔係愛情，所以最後我都想再次挽救同伊健的婚姻。」 鄭伊健：「電影入面，我係一個Professor，上集係研究女人，今次係研究婚姻同愛。戲內我同阿Sa經常為小事爭吵，結果有一次忍唔住，大家嗌離婚，其間更出現一位有學識，而且樣貌娟好嘅女學生，與我發生另一段關係。」 阮世生：「其實套戲絕對係承接上一部《我老婆唔夠秤》嘅成長版，圍繞大家十年以來的變化。戲內角色有角色的成長，戲外，我亦覺得兩位成熟同開心咗好多，所以拍戲時，兩位不單止比以往成熟、開心，更係投入﹗」 心力交瘁 人人都說小孩、動物、海洋都是電影界最難拍攝的場口與事物，事實上情緒起伏極大的吵架爭執與哭罵場面一樣難於揣摩與控制，難得導演對兩位男女主角的演技有讚無彈，難怪眾人皆說是次拍戲印象深刻。 阮世生：「嗌交戲係一個我最擔心同時亦好深刻嘅場口，因為嗌交對演員嚟講係非常嘥力，加上拍戲唔係一Take就搞掂，同一場口需要拍攝唔同角度，而且既唔可以讀錯對白，感情拿捏又要到位，一口氣好激動咁與對方不停爭辯，所以我好深刻佢哋嗌交嗰場，而另一場喊戲，我都好鍾意，眼見佢哋好用力咁攬住對方喊，眼淚鼻水長流，場面非常感動。當中欣宜、張歆藝的演出亦非常好，令我好深刻。」 蔡卓妍：「我覺得喊同嗌交戲真係令我哋好難忘。????家好多電影拍攝嗌交戲時都會你一句我一句咁互相接下去，但其實根本唔似嗌交，因為嗌交時，大家根本唔會聽到對方講咩，只會為一件事不斷重複又重複嘈落去，所以今次呢場嗌交戲我覺得好寫實，而喊嗰場戲，亦係我第一次能夠感受埋對手嘅感覺，一路講對白一路起雞皮，個心一直夭住痛，個感覺好實在好深刻。」 最佳拍檔 默契對一對演員來說尤其重要，難得闊別多年，再次攜手合拍《我老婆唔夠秤2我老公唔生性》仍能產生當日的火花，相信這是緣分加以化學作用，所調校出來的一種獨有關係。 蔡卓妍：「雖然伊健好鍾意寸我、玩我，但我同佢合作非常舒服，好似呢個就係我哋獨有嘅溝通方式一樣，同佢感覺好似屋企人，想講咩就講咩，唔會擔心佢會嬲會唔鍾意，我覺得係一種緣分，加上我同伊健喺呢個角色上好有化學作用。」 鄭伊健：「我同阿Sa的確係好有化學作用，加上好多唔同動作、畫面，都唔夠我同佢就咁企喺度來得有夫妻嘅感覺。記得第一次合作，外界話o靚妹配阿叔，得唔得㗎，我自己都好懷疑，殊不知呢個組合原來真係得，所以今次再拍續集時，變得更有默契之餘，亦拍得更舒服。」 |
 | |
 | |
| |
 | |
| |
 | |
 | |
| |
 | |
| |
 | |
| |
| |
多謝 !