福祿壽出招派笑彈曾志偉：過年最緊要開心

2013/02/05 08:42:18 網誌分類: 生活

05 Feb

        新年賀歲檔猛片如雲，我已選定曾志偉主理的《我愛恭囍發財2013》，福祿壽埋班做膽，再有息影多年的葉玉卿出山，玩大堆頭賀新歲，粒粒星玩到盡，「過年最緊要開心，香港人太多怨氣喇，不如睇吓阿倫冚個屎塔上頭、卿姐跳印度舞好過！」志偉細說拍攝點滴，齋聽已笑到拍爛手掌，怎能不入場感受下那份笑中有淚的喜悅？在此預祝大家新年快樂！身體健康！恭囍發財！

        主持：黃柏高
        統籌：林永匡
        協力：彭燕燕、袁東亮

        最緊要開心，過去三年，曾志偉率領邵氏旗下藝人跟觀眾度新歲，從《家租客》開始，每到新年例必call齊人馬上陣，今年埋班大前提是要掃走港人怨氣。

        曾志偉：「過年要開心吓，一家大細去睇戲，記得有年戲院上《門徒》，心諗，嘩，過年喎，咁沉重？點帶小朋友入場睇呀，在邵氏支持開拍鼓勵港人的電影，那一年發生菲律賓人質事件，香港人很沉重，我們拍下《家租客》和《我愛》系列，屋邨、世界末日後，今年考起，無題材，一整年都是壞消息，選舉抹黑、嗰個又僭健，唉，特首都救唔番，邊個救我哋？咁就神仙打救囉，搵得福祿壽就一定要有女仔陪襯，君如毛毛都俾人攞走晒，好在仲有個卿姐拔刀相助，我想講，這部未必是最好睇，但就肯定最感人，拍攝現場見到大家眼濕濕的。」

        葉玉卿：「夾啱時候啫，我戲癮起被蟲咬呀，哈哈，其實我覺得拍戲最好無壓力下進行，當日君如來美國探我，講開有人話我復出拍劇，我就話『拍乜鬼劇咁辛苦，拍戲好過。』，點知樂小姐和志偉就來搵我傾合作。」

        阿倫增磅上陣

        福祿壽上陣，觀眾叫好，肯定爆笑連場，貴為巨星的譚詠麟孭飛演出，造型上更來個大突破，讓人拍案叫絕，曾志偉這次確實碌爆人情卡，去到盡。

        譚詠麟：「志偉問我福祿壽賀歲點睇？我諗好喎，點知阿叻原來只得三日戲，不過唔緊要，好寫實，反派角色好啱佢做，直頭做番自己，一樣咁膚淺；至於我個造型完全按照八両金個頭去搞，但我就崩少少，叫六両半，哈哈，當初收到指令要我身材發福至吋腰，心諗『死喇，點得呀？』埋位前唯有盡力而為啦，今次拍攝幾考演技，頭三個星期我都有睇Bosco（黃宗澤）做戲，模仿他的小動作，幾考功夫。」

        曾志偉：「我覺得徐子珊做得幾好，第二就係卿姐，跟住有欣宜，然後就阿倫，都唔錯，話說阿倫來試造型時，班服裝個個讚佢讚到不得了，『好難得的，天皇巨星拍戲都咁鬼用心，戴假髮都自己試，又戴個肚兜整個大肚腩！』，我話『唔係喎，係真大肚腩喎。』幾㜺鬼，有次機場遇到阿倫的粉絲，直頭俾佢哋鬧我，做乜搞到阿倫個造型咁核突，冚個屎塔上頭，哈哈。」

        卿卿跳肚皮舞

        早已息影移居美國的葉玉卿「復出」拍戲，影迷得福，須知道，這位靚太狀態十足，舉手投足魅力爆燈，就連拍擋譚校長也讚不絕口。

        曾志偉：「睇卿姐真的要讚歎，真的好嘢，那part印度舞真係精采，到依家都仲咁fit嘅，有冇生過呀，點解條腰仲咁幼？」

        葉玉卿：「志偉找我拍賀歲片，好喎，得知拍擋係Alan，直頭唔使諗，總之兩個星期內拍完我的戲，我就可以搞得掂，勸得服我的仔女。講真，又唔係為生活去拍戲，純為興趣，我無理由自己開組戲搵班人陪自己玩過戲癮的，今次好多謝志偉搵我，拍戲好講對手，大家要有交流才交到戲。」