謝小B誕生！

由於還未知道名字，況且，就算知道名字我也只會用花名，所以，這個B，下稱謝小B。

6.8磅謝小B順利出世，真好，首先嘛，張X芝個身形大家都知道，睇佢個pat，就知道唔多好生養。咁細個樽，咁大粒糖，可以倒出來而不碎，多麼難得！

謝X鋒一生活在鎂光燈下，由誕生之初已踏在銀色的地氈上，他深切的明白到「因父之名」的可悲。既然他可以禁止謝X婷入行，自然更不會讓謝小B入行，走自己走過的路。然而，世事無絕對。第一，爸爸反對唧，爺爺好贊成喎；第二，媽媽向來都有帶家人入行的習慣，那兩個不成器的弟弟張X龍、張X文都可以帶，更何況自己個B；第三，謝X鋒之所以賣身，傳聞就係要幫家人還債；張X芝個屋企更加唔使講，真係陷家靠佢養架嘛！睇番謝X鋒、張X芝，兩個都係大花筒……第四，父母都係靚人，DNA遺傳下來，斷估都不會差到哪裏去，再加上後天栽培，想必也是靚仔一名，唔做娛樂圈，你話幾浪費！

好喇，咁假設謝小B會入行，咁會發生乜野故事呢？作為八卦的一群，我們當然想故事戲劇化一點（查實鋒芝戀都已經戲劇化得好誇張）。而最最最戲劇化的發展，莫過於謝小B遺傳了謝X鋒鋪癮－－戀母情結癮，見到條女，第一件事就係問人幾歲，細過自己免問，大過自己即刻埋牙。（唔係同你講笑，張X芝雖然年輕，原來都大過謝X鋒幾個月架。）

再戲劇化一點，佢會搵著邊位呢？張秋Katie梁？肥膩白雪公主？一唔係被《一本大便》評為「初熟」的忌廉女？唔好喇卦，姊弟戀咋，唔係母子戀呀！計我話，最佳選擇當然是：X嫣－－X菲跟李X鵬的女兒！

不是嗎？年紀相差不算非常遠，仍在姊弟戀的範疇。而且鋒菲戀不果，有負當年的「情侶紋身」。十多廿年後，謝小B跟X嫣延續各自父母那沒結果實的感情。X嫣話：「我以前兔唇喎，你都愛我？」謝小B一野掟爛支結他，好Rock咁話：「Who Bloody Cares！」來個深情一吻幾十秒，「what a sexy lips, my sweety!」忽然又殺出一個程咬金，原來係竇X童，X嫣同母異父個家姐，二女爭夫，最後畀個家姐爭贏左，兩姐妹係個女廁度相遇，竇X童話：「阿妹，唔抵得我年紀大過你呀？」然後謝X鋒撐個仔，張X芝氣頂話唔認呢個新抱，李X鵬話你唔娶埋X嫣我唔黎飲，X菲一邊話唔想同謝X鋒對親家，一邊又靜雞雞同謝X鋒翻撻，新娘房入面老爺同岳母攬埋一舊……陳X東無啦啦做左神父主持婚禮，忽然婚禮上有人跳出來，一睇，原來係陳X春，佢話原來我先係謝小B個親生老……句野都未講完，幾廿個黑社會跳出來捉走陳X春，個個都有鬍鬚兼且好勇，佢地話，山雞，我地係你fans，狂迷果隻，可唔可以簽個名～

忽然，我覺得我有做編劇的潛能……