「做人最緊要開心!唔係話要招積晒命,但有人磅水任你玩,真係好過癮!」陳百祥(叻哥)拉隊環遊世界,以一年時間遊歷七大洲,吃喝玩樂歎到盡,能隨意跳落亞馬遜河跟海豚暢泳、在巴西街頭踢波、搭私人飛機歎萬元烤鴨,聽到都開心,這個超豪旅遊特輯《叻哥遊世界》將於今晚10點半播出,真的要擔定櫈仔跟隊見識,今天有請叻哥跟我們分享當中點滴。
主持:黃柏高 統籌:林永匡 協力:彭燕燕、袁東亮
說要懂得享受人生的,有誰真的可以夠膽話行就行?我偶像陳百祥做到了,還要call齊友好環遊世界,上山下海去到盡,別以為他的計劃很周詳,原來一切都係玩即興。
陳百祥:「真係無心插柳,自從過了25歲零唔知萬幾日後,發覺自己已跨過某個境界,不再追求名利,無枷鎖零顧忌,我天生是要娛樂大眾的,有次食飯知道節目監製蕭潮順會去巴西,心諗『中東、非洲都住過,巴西?未去過喎!』飲大兩杯就話要一齊去玩,點知翌日蕭潮順真係搵我,仲話已準備拍攝隊隨團出發,上鏡與否隨我鍾意,呢個世界邊有咁着數?南美洲又真係未去過,點知真係愈玩愈開心,在巴西街頭撩人踢波,有乜理由去到唔玩?又點諗到真係贏波?仲要二比零!成個旅程都有蕭潮順安排好,去到亞馬遜森林見到一邊係海豚一邊係食人魚,你可以跳落水同十幾條野生海豚一齊游水喎,你估海洋公園呀?開心到呢,就由巴西開始玩,環遊世界,班朋友同我一樣,最緊要開心,阿倫話『滑雪無我點得?』話要showoff,滑得好過我?大家睇片囉,其實咁講,話請你去南美洲,都唔係話去就去?時間最寶貴,話去旅行就問邊個得閒,個個毛遂自薦,人生做到咁真係開心,唔係話要晒命,而係你要做到有唔使搵錢的經濟能力,話行就行先得。」
魚子醬烤鴨
這個特輯的嘉賓,十個九個都唔易請到,譚詠麟、鄺美雲、鍾麗緹、彭健新、李純恩、陶傑等,個個識飲識食自己友,說到跟鄺美雲的上海之旅,叻哥說到停唔到口。
陳百祥:「好普通啫,一萬蚊食隻片皮鴨,大家實諗裏面裝咩?食落你就知,首先隻鴨一定烤得好靚,那位上海師傅也是識食之人,烤鴨佐料都配選好耐,用鮮蝦造成的蝦片,夾着3g魚子醬和烤鴨,食落口,魚子醬那陣腥味和蝦味好夾,剛好分解了片皮鴨的油膩感,等同你飲SingleMalt,第一啖要Straight,第二啖要加塊大圓冰,感覺係好特別,仲要因為鄺美雲的關係,大家坐在全世界只得一架、要2017年才推出的私人飛機上享受,邊個話去上海一定係食大閘蟹?夠晒招積。」
意大利午餐肉
早已遊勻大半個世界的叻哥笑言,這次有人出錢任玩,事必要玩未玩過的,歎最矜貴的,跟叻哥遊樂的超豪團自然也食得刁鑽,攀上山區牧場飲紅酒歎鹹腸,人人讚好。
陳百祥:「意大利唔一定係羅馬、米蘭,我們去了北部酒莊飲紅酒,那處四代人都造酒,酒莊連馬場,我見到練馬師就衝埋去傾偈,之後返酒莊參觀,一般人食Salami(鹹腸)係一片片的,佢哋就切成兩吋厚的,用來送紅酒白酒,哈,又係另一種境界,全部工作人員讚到不得了,其實就係午餐肉之嘛,但成個feel唔同晒,真係好過癮。」
叻哥再創神話
當年叻哥主持的遊戲節目《運財智叻星》好神奇,收視創下十五連霸之冠,主題曲唱到街知巷聞兼有本事踏紅館台板連開七場演唱會,成為一時佳話,叻哥說這次旅遊特輯的主題曲《即刻變富豪》將要再創神話。
陳百祥:「一隻靚馬都需要好伯樂,當年我首主題曲都好勁呀,互聯網無咁勁咋,我睇到那首(《江南Style》)MV就覺得好眼熟,吓?又會俾佢出先嘅?我首主題曲由鄧志偉作曲、火火填詞,畫面上我會真實點,全意大利馬房拍攝,狄易達排了隻200人的舞,做了咁多年娛樂圈,其實真係娛人娛己,成日話香港人好大怨氣,其實香港人好醒,會分析,怨氣自己儲,你憎人?你自己唔高興啫。」
|
歎萬元片皮鴨 !!!