與食店談戀愛……霸王山莊

我自己有一個奇怪的習慣, 就是每當我試過一間餐廳, 覺得它的出品好味, 我就會好像愛上了它一般, 腦海中不停環繞著它的影子, 無時無刻都想回去回味一番, 甚至介紹我的朋友給它認識; 就好像談戀愛一般, 當你處於蜜月期, 你會很想你另一半時常陪伴左右, 形影不離, 甚至介紹給朋友認識, 和他們分享你的喜悅……不知道這是因為自細受家人的影響, 還是, 自己的與生俱來的一個特性……

近日愛上了一間食店, 經常和朋友三五知己一齊去食下午茶或宵夜, 因為它的食物質素出眾, 而於下午茶或宵夜時段, 價錢相宜, 實在令人回味無窮……這間食店就係霸王山莊

經過小弟反覆驗證, 覺得以下幾樣食品值得向大家推介:

紅油抄手

紅油抄手的雲吞做得皮薄餡靚, 肉質鮮嫩, 結實彈牙, 尤其那個特製醬汁, 黑漆漆襯上明亮的紅油, 散發著濃郁的醬油和蒜泥香味…...當嫩滑彈牙的雲吞遇上香氣四飄的醬汁, 簡直就係絕配, 令人垂涎三尺……

小籠包

小籠包做得皮薄多汁, 最緊要係皮薄得來唔易穿, 一口咬落去, 大啖肉汁從包裡湧出, 口腔內充滿著濃濃的肉香, 與熱騰騰的口感相映成趣, 令人矛盾, 一方面想享受那種滿口肉汁的熱辣辣刺激, 另一方面又怕燙傷條脷仔……但就算燙傷…我諗我都唔會放棄咁正嘅美食

蒸素餃子

這個素餃子絕對適合女士們嘅口味, 餃子餡料全部用青菜切碎而成, 難得嘅係佢不似一般青菜水餃充斥着濃烈的草腥味, 好味得嚟, 又清淡健康, 啱哂注重健美的人士享用

紅袍大千雞配黑金剛麵

川辣惹味嘅雞肉, 配上柔滑爽口嘅黑金剛麵條, 少少辣, 多多滑, 配合得剛剛好……值得一提嘅係, 這裡的麵條全部自家製作, 根據每種麵條嘅口感, 分開幼滑…扁滑…粗豪…健康…黑金剛五種, 客人可以選擇自己喜歡嘅口味, 又或者一次過試哂五種…如果食得哂的話……

除咗以上幾款菜色, 它的翡翠水餃, 花彫醉雞, 冰糖小圓蹄, 片皮鴨, 乾燒明蝦球, 鍋貼鳳尾蝦, 擔擔麵都有一定嘅水準; 但係有幾樣食品就有待改進:

-         生煎窩貼煎得唔夠香脆

-         芝麻蝦因為底層餅皮太厚, 完全感受不到有蝦肉的存在

-         千層峰爽脆但唔夠入味

-         捧捧雞粉皮雞肉太少, 缺乏口感

-         皮蛋豆腐醬汁特別, 但皮蛋唔係糖心, 加上全部切成粒狀, 比起傳統地道做法, 欠缺那清淡遇上濃郁的神奇鮮味

到現時為止, 我相信我和它仍處於蜜月期, 因為我仍然時常心思思要去見見它, 得閒就約埋一班朋友和它把酒談歡, 希望這情懷可以延續落去, 而我亦都唔會咁快 ”移情別戀” 啦?!