我是愛酒之人,對威士忌更情有獨鍾。直至遇上愛飲紅酒的「鯊魚女」陳細潔(Abbie),加深了對紅酒的認識。原來紅酒應選擇崇尚天然的法國酒,並配意大利菜一同享用,因中菜的甜酸苦辣會令酒味出現變化,浪費了靚紅酒。識飲識食的Abbie打理健康食品生意外,還積極參與公益活動,工作雖忙,但她很懂得享受人生,她笑言:「我唔可以太捱。」每年更必到外地滑雪relax一番;由高山衝下來飄飄然的感覺,令她豁然開朗,忘記繁囂的城巿生活。 主持:黃柏高 統籌:林永匡 協力:袁東亮、李佩儀 場地提供:Palco
法國酒最天然
陳細潔在家中自設酒窖,珍藏了千多支紅酒,有時收工回家,也會開一支來品嚐,十分識歎。平時她見到喜歡的紅酒,總愛一箱箱買回家,不過通常飲幾支就放埋一邊,因為人是花心的,但除了法國酒。
「我鍾意法國酒崇尚天然,就算嗰年好乾旱、天氣唔好,佢哋都唔會淋水,盡量靠儲喺泥土裏面嘅水份,因為法國政府管制得好嚴,所以佢哋啲酒唔會加糖、加酒精;但啲新世界酒如果嗰年收成唔好,就會落糖、落酒精加工,所以新世界酒飲落唔夠層次就係咁嘅原因。」
紅酒夾意大利菜
所謂「美酒配佳餚」,有指飲紅酒配紅肉是一級的享受,但Abbie覺得紅酒配鹹味食物最佳,例如芝士。而靚的紅酒不適宜配中菜,但配意大利菜就好相當Match。
「飲紅酒通常都係食意大利菜,因為夠多元化,你點整都得;如果配中菜最好搵啲較鹹嘅食物,例如鹹魚,啲餸又唔可以咁多汁,但甜酸苦辣都會令個口變酸,啲酒飲落口就會變味,所以靚嘅紅酒都唔應該夾中菜。」
產品靠口碑
明年,Abbie與胞姊劉陳小寶(Angel)創立的「雪肌蘭」健康食品公司踏入20周年,今年將全力將進軍內地巿場,早前內地遇上反日浪潮打擊了士氣,因產品全是日本製造,幸好生意沒受影響。
「其實我哋做咗好耐準備工夫,跟住又話反日,好影響士氣,好彩生意無受影響,因為我哋啲客好忠心,知道健康食品嘅效用,我哋不嬲都靠口碑,唔係靠廣告,(你已經係最好嘅實例?)係人都知我幾多歲,我都可以keep到。」
老幼同關注
Abbie對慈善一向不遺餘力,今年繼續擔任保良局的副主席,為社會服務出一分力,尤其關注問題家庭的兒童,另外亦推出了$10優惠餐予長者。
「香港嘅孤兒同在問題家庭出身嘅細路仔,全部判晒俾保良局,好似早前有個唔知由幾樓爬水渠落街嘅細路哥就係咁喇;而且最近推出咗好優惠嘅餐俾老人家,十蚊三餸一湯,我都食過,唔差㗎,仲搵人計過啲營養都ok,希望吸引啲長者出吓街,唔好成日困喺屋企。」
滑雪最開心
看來Abbie的工作都好繁忙,不過要成功,必要付出努力,所以當她忙了一年之後,每逢在農曆新年前,都愛到外地滑雪,她表示一年最開心就是這個時刻。
「我唔可以太捱,所以盡量安排自己做開心嘅事,好似滑雪咁,我鍾意佢嘅速度感,而且由好高嘅山衝落嚟,飄吓飄吓好開心;但我鍾意去啲完全見唔到黃皮膚嘅地方,最好唔使打招呼,通常由朝早9點滑到2點,然後食個longlunch,你可以放膽去飲去食,跟住去按摩,夜晚又再食過,日日如是,真係一個好好嘅假期。」 |