陸羽仁覆網友

幪面馬仔:建行唔一定會跌到5元，買唔到唔好怪我啊。人人都想買平股，但風險是買唔到，都有風險架。

依家控股:美股若只是調整，最易受惠的是美債。

到印銀紙的泡沬終極爆破，極有可能伴隨利息上升，到時全世界升得多的東西都可能爆，美債，美股，各地樓市，接著的問題是資金何處去? 可能係分段爆，例如債市先爆，債價急跌，好快就跌到平衡水平，資金可以回路入債市，由於無咗聯儲局每月850億美元的資金，國債可以有較多人買都唔升，因為聯儲局退市的規模都好大。

同意你講「所以大陸樓爆香港一定陪爆, 香港樓爆大陸樓未必爆」。但樓市流通性不如股市，跌起上來唔係你想沽就沽得到，我唔知你年紀多大，有無見過低一兩成都無人吼的日子。

孖女:如何計股票價值的問題，我遲啲寫篇文答你。

孖女:你問我建行、工行值幾多，呢個問題唔易答，如果要以股神估值方式，起碼要估佢十年現金流，當中最難的假設是估佢地盈利升、跌、抑或持平? 若估佢地盈利唔跌，每年只有1、2%的增長，其價值折現都可能比現價高三、四成，去番10倍PE。但你唔好話我估佢會升三、四成，前題係佢地盈利可唔可以保持呢?對呢個問題外資睇淡，中資睇好。

但你要做半年的中期投資，唔使答上面的值值「一億問題」，等佢地比現價回深啲(起碼一成，最好兩成)時，買入持有半年沽出就得。

閒人甲:四大行之中，農行是我最不看好的一隻，因為建行、工行規模大本質夠強，中行較細但市盈率低派息較高，各有捧場客。農行本質最弱，最遲上市，在上市三年的「輔導期」有阿爺保障盈利，之後食自己，要小心，第一季數據亦不突出。

包括國指在內的恒指正展開一個大規模反彈，但我不認為咁快轉勢，宜觀望。

你問「內銀長遠可以安心持有嗎」，如果等如你想唔理唔睇，盲揸十年的話，我唔敢答係，但如講一年半載，我又話衰極有個譜喎。

依家控股:你的分析我大體都同意，但有一點有保留，同意大陸股市唔掂香港唔掂，唔同意大陸樓市唔跌香港樓唔會跌。香港樓市起落有週期，好多時同利息週期掛鈎，今年美國空前低息，遇啱香港供應少，所以喪升。大路估利息週期回頭，或金融巿場出大問題時，樓市就會爆，而爆的基礎是升得太脫離現實的負擔能力。結論係大陸樓唔爆香港樓都可以爆。

另外分開來講大陸樓市都可能爆，但大陸發展水平如香港九十年代初，由於人民收入水平增長仍快，城鎮化又快，所謂剛需較大，佢爆咗回復亦較快，好似香港87年股災樓市爆一爆，89年六四又爆一爆，92年改七成按揭加打擊炒樓又爆一爆，都係兩年左右又彈番上去，大陸情況亦似。