沽貨心比買貨大
大市再跌，散戶繼續冇路捉，唔知美股幾時跌，睇到都呆晒，閒閒地４００點，５００點都好似睇慣晒’
講過中國食品價格不斷急升，我就搵左幾隻食品黎做個比較，３２２康師傅，５０６中國食品，１０６８雨潤食品黎估，不過記住我唔係叫人買，我係估佢跌定升，咪見到我講兩講就傳出去，睇到呢篇文既人睇過就算，唔係叫人買的，唔好誤會。
３２２康師傅為中國大陸消費食品市場中之主要企業之一，主要於國內製造及銷售方便麵、夾心糕餅及包裝茶飲品。（抄番黎），由０５中開始被炒起，最高上到９．９５，去唔到１０蚊就跌番黎，其下既產品方便麵不斷滲入中國農村市場，根據佢地０６年既業績，佔有市場６５％既平價麵，近日內地公仔麵加價，再隨住外圍走勢，呢類股會比人沽，外圍走勢令市場汰弱留強，中國內地會係０８奧運前會調控番食品價，距離奧運仲有成年，冇可能不斷升１２個月，唔係到０８年８月都唔知點算，不論升跌，食品價格上升左一排，製造成本增加，其實要炒差唔多已經係尾升，佢既股價由高位跌落黎跌左唔少，再比人翻炒機會不大。
５０６中國食品自從分拆了６０６後股價都係繼續跌，又係由差唔多１０蚊插落黎冇好過，又再因為外圍走勢，原材料價格上升，加上公司內部其實幾混亂，大家係６０６同５０６之間都唔知邊個前景較好，６０６曾表示會將５０６部份既業務慢慢轉入，又傳注資，混亂既消息已經影響晒大家，再加上６０６受阿爺禁制，相信跟佢，一齊走既５０６都難免受影響，股價可能會繼續受沽壓／牛皮係度。
１０６８雨潤食品又係曾差唔多見１０月，４月份公佈業績有盈利增長，不過一早俾人炒定，之後見光過後急挫再回升，最近雖然食品價格上升，但係股價亦隨外圍大幅下跌，犘通由「中性」至「增持」，目標價由９．６元調高至１０．８元。究竟信唔信就自己決定，電視日日話中國豬肉牛肉加價同時亦影響埋香港，聽到人都驚，我就憂慮阿爺打壓措施，令股價下跌，如果博佢低位反彈唔係唔得，不過記住賺到就走人，輸左要１０％止蝕。
依家環境，大市比較沉，呢類股唔會俾人帶頭炒，但可能帶頭跌，阿爺出招冇聲冇色，但國內街市超市響晒警告，連香港都差Ｄ話豬肉牛肉荒，博撈底，食品股風險好大，再加上大市環境，沽貨心比買貨大，小心。
