有計劃有部署咁打劫亞洲

老美話在亞洲搞再平衡，原來搞完歐債危機，在歐元匯價狠賺一筆後，又來亞洲搵食，QE早期暫時將美金泊在亞洲區，選擇性炒高本地匯價、樓價、股價、黃金之後，今年初各路金融打手大力唱美元加息（其實無條件大加），用盡方法唱衰新興市場，趁高割禾青糊人走食，香港資金出入容易無限制，結果今次被老外狠狠地沽，1個月打劫3千幾點好誇張。伯南克5月22日講買債金額可多可少，第二日亞洲股市即插。6月19日加多兩錢肉緊，實牙實齒講2014年中有機會全面停止買債，伯南克從未如此鷹派，今次要製造特大驚慌務要震散亞洲的股市。投資大受驚嚇，股市再大插。

6月24日星期一A股大屠殺日，上海綜指單日急跌5.3%，最低1958，距離上次調整低位的「建國底」1949不足10點，看來破底機會大，之後是1921「建黨底」。港股短線實在非常超賣，仍相信結算前港股會有一次500點以上似樣的反彈，之後仍會反覆尋底，期權較活躍是19400PUT、之後是18800。7月3日美國拍長債，上落波幅肯定唔會細。總的來說，港股走勢要轉強，美匯指數要弱，及上海拆息要回落。