【五】鼻無可避

中停包括眉、眼、鼻。鼻因為主宰人一生很多東西，所以十分重要。

鼻為夫妻宮，又係財帛宮、疾厄宮。

女人個鼻好重要，嫁唔嫁得到好老公都係睇個鼻，如果個鼻樑生得夠高、夠長、夠直，就容易嫁到好老公。

鼻為財帛宮，又為財星，睇人一生是否有錢。鼻頭叫準頭，主正財，兩邊鼻翼為蘭台、廷尉，睇偏財。

鼻又係痴厄宮，兩眼中間，鼻樑之起點為山根，鼻樑中間年上及壽上，睇身體及健康以及災劫。

睇相要靈活，因時代而有所調整，以前有云：「鼻細女人易作他人情婦，叫二奶命。」近代生活環境較好，大部份人的鼻都不太差，所以好多有錢人的二奶及情婦，個個鼻都咁靚。

順帶一提，在相學中要判斷一件事，絕不能單靠一兩個部位，一兩個特徵而莽下定論。要結合多個部位，認證多個啟示，才可下定論。古語又云：「鼻大藏財。」其實鼻大無偏財，鼻大並非代表有錢，只是衣食無憂或者頂多豐衣足食。古代又云：「豬膽鼻有錢。」此講法相信好多人都聽過，豬膽鼻因為鼻如豬膽，不見鼻孔，藏財而已。但今日要靠節儉儲蓄去致富，就祝你好運。但有一樣是對的，不見鼻孔，為人孤寒，用錢有道，不胡亂揮霍。而兩邊鼻翼薄者，鼻孔微露及鼻略細，為偏財鼻，瘦人要鼻長才有機會有錢。有錢人多數鼻長，但肥人有錢可以鼻短的，肥人好少有個長鼻子，所以不同人有不同的睇法。

鼻睇健康，要整個鼻樑去睇，由山根開始，山根低陷，身體好極有限。山根代表肺、喉嚨、氣管等，山根生得低、窄，或者有紋侵痣破，都係代表呼吸器官容易出問題。而且對婚姻及感情都有影響。山根最好夠高夠闊主較健康及婚姻少波折。鼻樑為年上、壽上，這兩個部位差不多相連，合稱為疾厄宮。當有病及厄運時，鼻易現黑氣及青氣。青筋攀鼻樑，無事喊三場。指小孩多病，身體差，所以凡兒童鼻樑現青筋，身體都係比較差，鼻樑大斑，肺弱、氣管敏感，易患哮喘。

有很多人鼻樑會有節，有鼻節o既人疑心重，容易婚姻出現問題，外間有說法為女人鼻樑有節匬夫，其實並不正確。因為有鼻節主脾氣暴燥、疑心重，性格剛硬，以玫一生感情容易出現問題，容易離婚。所以有鼻節的女人即使不用離婚丈夫都係極難相處，分分鐘炒大鑊，貌合神離者多。

鼻亦可以睇好多個人性，鼻頭有肉，心肝無毒，為人正直，少害人之心。鼻高鼻大鼻直的人，自尊心強，自我為中心，難納他人意見，喜以自己作標準去衡量他人。相學上叫孤峰獨聳，主孤獨，尤其晚年更甚。這種人難轉行，亦唔容易轉工，而鼻特別細之人，容易缺乏自信，易受他人支配，無主見，鼻大人固執，鼻扁無自信。

若女人個鼻又扁又細，是否注定一世捱窮呢？當然未必，世事無絕對，上天好公平。咁嘅女人要有錢，就要同個老公一齊捱，會捱到好有錢，通常幫個老公做生意，做得好出色，辛苦過老公，就會好有錢。所以鼻扁唔緊要，要配合顴高而有肉，下巴圓厚，腮骨有力，一個捱得既相，實會有錢。

41歲-山根，42歲-精舍，43歲-光殿，44歲-年上，45歲-壽上，46歲-左顴，47歲-右顴，48歲-準頭，49歲-蘭台，50歲-廷尉。

此文曾於頭條日報專欄「玄學人」中刊登，由於報章版面有限，不能足本刊登，現將全文重新刊載在Blogcity與讀者分享，如有植字方面的錯漏，敬請指教。