【七】咀咀佢

咀在下停十分重要，咀的流年歲數為60，咀又名水星，又叫正口或海口，名稱多多。

睇咀一定要睇埋人中兩旁，鼻與上唇之間，左仙庫，流年52歲、右仙庫53歲、食倉54歲、祿倉55歲，此部份宜飽滿，撲出o黎為之飽滿，忌凹陷尖削，飽滿者代表51-55歲流年運程暢順，在臨近退休之年得豐盛，有足夠糧餉過晚年。

咀，至緊要唇色紅潤，忌黑、暗、瘀或藍，女性尤甚。凡唇色瘀濁者，難有貴氣，因為男重精神、女重血氣、眼睇精神、咀睇血氣，所男人睇眼，女人要睇咀。

因此，如果女人咀唇又瘀又黑，嫁到個好老公的機會唔會好大，男仕們都係一樣。相學有云：「唇紅齒白招艷妻。」所以男人咀唇紅，牙齒又白又齊，都容易有個靚老婆。而另一個娶靚老婆o既相訣，在《何知歌》有云：「何知此人美貌妻，但看此人眼細長。」若然你夠唇紅齒白，而眼又細長，咁相信你個老婆都唔會醜得去邊。

咀，可以睇情慾，亦可睇說話技巧，首要咀唇紅潤，其次菱角分明，咀角宜朝上，忌向下。向下者為覆舟咀，主晚年孤獨。因為覆舟咀o既人不擅辭令，講說話得罪人多稱呼人少，人家唔o岩聽，自然被疏遠。因說話不夠技巧，朋友自然少，連配偶漸漸亦唔o岩傾，仔女又唔o岩傾。

再者覆舟咀咀角向下，個人容易悲觀，向壞處想，更加講親都無句好聽，所以到晚年就自然容易孤獨。若覆舟咀再加一個尖下巴，咁仲大鑊，下巴係睇60-70歲，相學中下巴闊則晚年運好，下巴越尖，就晚境淒涼。所以街上、公園裡的孤獨老人，多數都係覆舟咀、尖下巴，因覆舟咀主晚境孤苦貧窮。

但如果覆舟咀配個方下巴，咁又唔同，會特別有錢，但都係孤獨。雖然大家都係覆舟咀，都係孤獨，但下巴生得正，晚年過得好好多。

另外咀又可以睇人講o野靠唔靠得住，咀歪牙疏，尤其上唇歪，說話不可靠、信唔過。因為上唇睇說話技巧，上唇最緊要整齊，菱角分明。相書有云：「咀如角弓者貴。」咀如角弓，說話實在，上唇薄、翹，說話夠技巧，上唇菱角整齊，有口才、善辭令。咀唇有粒珠，有辯才、包拗頸，所謂：「咀唇有粒珠，嗌交唔會輸。」，可想而知。

若然菱角分明加上唇薄及唇翹，仲要有粒珠，咁o既人，樹上隻雀都畀佢（乙水）落o黎，死都講得返生，說話有技巧。但要睇人講說話靠唔靠得住，就要睇埋牙、眼、鼻，如果說話時眼神堅定、鼻樑夠直、牙齒整齊，就信得過。但若果此人咀歪牙疏、鼻歪、說話時未言先笑，或不斷眨眼，又或眼神閃縮，就信唔過同靠唔住啦。

咀唇厚，不善辭令；咀唇厚加倒及牙，就更加唔識講o野。牙睇性格，牙向內，性格內向，性格內向o既人，自然不善於表達，所以如果倒及牙，但又鍾意講o野，又係大鑊！鍾意講o野但又唔識表達，都係無句好聽，講親都唔o岩聽。

51人中、52左仙庫、53右仙庫、54食倉、55祿倉、
56左法令、57右法令、58左虎耳、59右虎耳

同樣是覆舟咀，晚年都是孤獨，分別只在於有錢、無錢。
而咀如角弓，菱角分明，上下均等是為有貴氣。

此文曾於頭條日報專欄「玄學人」中刊登，由於報章版面有限，不能足本刊登，現將全文重新刊載在Blogcity與讀者分享，如有植字方面的錯漏，敬請指教。