PLAYGROUP大解構
6個月就玩得? PLAYGROUP真係有魔力咩? 拆解下先:
睇左段片, 6個月既BB, 聽到PINK BALL識得拎個粉紅塑膠波, 聽到BLUE BALL識得拎個藍色塑膠波, 個重點係佢眼前得兩個塑膠波。而個PLAYGROUP導師俾個BB認字卡, 有兩張卡, 一張係PINK, 一張係BLUE, 個BB聽到PINK識得拎張PINK卡, 聽到BLUE識得拎張BLUE卡。呢D練習屋企都做得到。
同樣係果個6個月既BB, 另一段片係計數。有張卡, 上面有7個點, 之後張卡係「+」, 後面係一張有5個點既卡, 之後係「=」, 個導師問個BB: SEVEN PLUS FIVE EQUALS... 個BB自己選左一張數目正確既卡做答案。
呢個練習幾有趣。重點係一對一喎。如果大家唔使返工, 可以嚮屋企同自己個B玩下。
跟住有段片, 係個2歲小朋友, 玩左PLAYGROUP 3個月。佢係要讀出字卡上面既英文字, 好似SHOULDER, BELLYBUTTON果D。
之後段片係K1既小朋友。但冇講到個小朋友係3歲定4歲, 亦冇講係剛剛讀K1, 或者讀左半年, 或者讀完咁, 保守D你就當佢4歲, 否則你會俾到壓力你個小朋友。段片入面, 個小朋友讀出一個故事, 而下面個CAPTION話個小朋友經歷過認字、學習PHONICS之後, 了解到語音關係, 所以讀得幾流暢, 大概係咁。至於語調, 都讀得幾好聽架! 不過係咪全賴個PLAYGROUP, 我就質疑。都幾肯定佢家長花既努力更多。
PLAYGROUP原來有好多種架喎:
(1) 音樂
(2) 體育
(3) AQ
(4) 常識
(5) 科學
(6) 英文
(7) 職業治療
(8) 小司儀
(9) 社交遊戲
(10) 普通話
而以上既課程會包括: 算術、解難、英文遊戲、PHONICS、閱讀、推理、親子健腦操、專注力、配合音樂律動、學習守規、茶點時間(係群體生活!)等等。而選擇PLAYGROUP既時候, 要配合自己小朋友既成長同發展, 選擇各種類型既PLAYGROUP令佢地可以全人發展。你都可以同自己小朋友一齊唱遊、講教事、跳舞、玩手工、整小食, 以及玩D體適能活動, 幫助佢地手眼協調、訓練佢地既小肌肉, 而同其他大人、小朋友交流、玩集體遊戲, 就可以促進佢地既社交發展。有D PLAYGROUP 30人, 有D就限於幾個家庭, 選擇之前要留意價錢、時數。
WIKIPEDIA記載, 外國既PLAYGROUP仲包括夜間遊戲、參觀公園、參觀動物園、小劇場同埋其他戶外活動。事實上一班人一家大小一齊去旅行, 都可以做到呢個效果。
以前有個做左媽媽既同事, 佢就話小朋友其實唔需要去上PLAYGROUP。個同事係教PE既, 相信佢既小朋友過得好開心, 因為媽媽識PE, 爸爸又會陪佢去參加親子歌唱比賽。
睇到篇野, 話家長應該多D鼓勵小朋友探索周圍既環境, 如果樓下有遊樂設施, 帶佢去玩韆鞦可以訓練佢既「前庭覺」同埋刺激佢既「本體覺」, 呢D學名唔需要深入研究, 總之係幫助小朋友發展架啦。
1-2歲既小朋友, 好奇, 對周圍事物亦敏感, 好似毛髮, 佢地會用黎做探索世界既工具。1-2歲會開始想自己食野、穿衣, 就俾佢試下啦, 否則4-5歲就開始產生依賴習慣, 缺乏自理既動機, 要改就難好多。(我上網睇返黎架咋)
以下係其中一個市面上英文閱讀小組既特色:
大概1.5至2歲, 小朋友同家長一齊聽導師講故事, 留意字詞發音、學習簡單字詞, 培養翻看故事既習慣。聽完故事, 佢地會有多元化既延伸活動, 包括塗鴉, 以及同故事既角色互動(係咪搵人扮果D人物呢)...
到2歲至3歲, 除左同家長一齊聽故事, 小朋友仲要完成簡單既指令, 以及一齊玩D創意活動(可能係剪紙、畫畫、將D物品放黎放去、Q & A、故事改編咁掛...), 而且小朋友會開始學習群體生活既精神
3歲以上, 小朋友唔再需要家長陪同。小朋友會從故事中學習生活規則, 以及與人相處同分享之道, 以利佢地適應幼稚園生活。果個網頁仲話, 呢個階段既小朋友, 鐘意自主咁探索事物, 開始對事物產生鮮明既喜惡, 而呢個時期適合培養小朋友既自理能力, 以及訓練社交。
雖然我已係註冊教師、基準達標, 嚮小學做到咁多年野, 但結婚之後, 唔係咁想做全職。昨日考慮讀個PLAYGROUP導師課程, 但老公話讀書對我黎講係個無底深潭 (由幼稚園開始, 我不斷讀, 07年冇讀一年, 但之後都係讀POSTGRADUATE, 又再進修、考試咁樣), 佢叫我都係唔好再讀。睇到有D導師課程大概萬三蚊咁, 好似讀5星期就可以, 但我之前嚮IED都學左好多野, 再讀又真係重覆。唔知憑我既資歷、學歷, 再加埋多接觸讀緊K1既姪女, 嚮不久既將來有冇機會做PLAYGROUP導師呢?
老公又話, 我有年暑假做托管班導師, 果個咪就係一個PLAYGROUP囉... 咁又係喎, 同D 2-4歲既人仔上堂, 教普通話、睇英文卡通片... 做PLAYGROUP導師情況可能差唔多既。再研究下先。
備註:
姪女當年都冇上PLAYGROUP, 只係每星期去學一堂畫班; 而其他時間, 佢會睇電視、玩玩具、落樓下識其他BB, 包括當時已讀幼稚園果D, 我媽會去認識呢D媽媽, 獲取升幼稚園既資訊。而我媽冇我既學歷, 卻有女人既智慧, 識得送D親戚拎返黎既圖書俾其他媽媽, 等幾個BB, 同埋幾個「 女麻 媽」組成小圈子, 繼續分享資訊。我終於發現, 原來女子唔讀書, 仍然有才有德架!
