貧賤記者有理想
2007/08/31 20:37:18 網誌分類: 職場
朋友介紹我看的文章，在傳媒行業引起很大共鳴。《貧賤記者有理想》
我是同屆畢業同學中最低薪的，做老師的朋友月入多我兩倍有多。但那年代每年都有少少人工加，自己又不是十分大使，所以勉強都夠自己搬出來住。經濟最好的那幾年，反而加得少。因為經濟好，這一行競爭就大。
依家算是高不成低不就，餓你唔死也唔會發大達。我其他行業的朋友，依然賺得比我多。做這一行，要有少少火，否則你會捱不住。
我的理想??哈，自然是抱走七百萬董事酬金的傳媒界ceo大佬!!講理想都可以活得好一些掛？？
00年後入行的記者，就真正慘，認識好多行家，特別是某些報紙的，幾年無人工加一點不出奇，維持在一萬多少少，他們都是會考精英，高分入新聞系。點解講理想的不可以賺取一份讓人活得較有尊嚴的人工?那些火，會慢慢被現實蝕掉。但當你為一份高些少的人工而轉行，老板又會一副「理想已死」的眼光來看你，讓你在內疚中「死去」。
仲要養貓!!你估佢哋細食呀??
銷路少所以人工低，這是我以前好多老細的說法，然後為了更好的人工，我轉了去一份幾乎人人得而罵之的周刊，生活是過得好了，但找採訪難很多，當又轉回一本正經的報紙時，你又重新適應工時長，人工少的日子。
做嗰行怨嗰行，唯有想，還是這一行有滿足感，做記者的人多數有性格又鐘意駁嘴，有邊行可以攞正牌質人同八卦丫？
請別再跟我說為了理想要犧牲人工，說實話，做周刊時，還是出了不少好故仔的。
講理想之餘，也要食飯、養阿媽和供樓呀！！！
那些升了上神枱的人當然口響啦，要是有朝我有幾百萬年薪，我都會識跟人講傳媒理想，但可惜是，行內有多少人能成為第二個劉先生呢？
我愈覺得，記者某程度跟工廠妹無分別。
每天在山卡啦地區出入，甚麼大埔工業村？將軍澳工業區？柴灣舊區？報社毗鄰總是工廠大廈或車房，真夠頂癮！
每周趕死線寫稿，多啲來密啲手，猶如廠妹踏行衣車趕工車衫一樣。有時老細突然發癲想造件大褸，幾個廠妹便要聯手夾腳你車袖、我縫領、佢剪線頭，然後把散件交給主管聯成一件衫，再畀QC部門審核，趕在死線前出貨。
可憐做到成隻狗的，還要拖著疲憊身軀趕搭廠巴到市中心再轉車回家！
翌日貨品出街後，老細還要跟你數飛仔對數，計計你今期車了幾多件衫？幾多條褲？釘了多少粒鈕？
仲唔係工廠妹？差在未帶飯回廠食啫！
好多行業都是要不計成本、要人訓身的，但有些訓身工作的人工，卻令你半死不活，偏偏傳媒就是其中之一。
幸好只是半死，你仍然會有飯開，不是瓜直。
所以記者的流失率好高，因為社會地位又唔高，人工又唔係好。
做得好的記者，會覺得好唔抵，心想自己轉行做其他野，一樣可以適應、生存下來，但人工的回報會好得多，所以會離開。
做得不太好的記者，會覺得好無癮，心想自己做來做去都冇人工加，都係做一個最低級的記者，不如搵過第二份工，冇咁辛苦之餘，或者仲有的比自己更蠢的人低級過自己呢，所以又會離開。
呢個就係傳媒行業的困局嘞！