好介紹

一向對罐頭食物冇咩好感，有新鮮嘅梗係食新鮮嘅嘢啦，特別係罐頭食品通常都係偏咸，唔啱我口味！

我之前都介紹過759阿信屋(又介紹啦！唔知佢會唔會俾番啲回佣我呢)，尋日去左附近較大間嘅阿信屋(兩三條街之隔開左兩間，大果間係一間超市嘅面積，所以話佢遲早做埋超市架啦)。主要唔係貪佢大，而係阿信屋最唔好嘅地方係---你響果度買過一啲嘢，覺得好，下次去買又買唔倒！

我之前響果度買左隻喉糖叫仙喉爽(成份寫到明、反而龍角散祇寫住係中藥，但冇寫明係咩嘢中藥)，我覺得好過朋友介紹果隻「龍角散」，而且價錢平，一包有成廿一粒(龍角散$9十粒)，早輪新開張七折，十蚊都唔駛----抵食！但係依家兩間店行勻都冇得賣！

仲有呢罐吞拿魚，我買左一段時間；一排三罐。一般吞拿魚罐頭啲魚肉都比較「鞋」，但係呢種罐頭魚好滑，我覺得隔左啲油拌沙律醬搽麵包、或者煎蛋用佢做餡料都唔錯---唔咸，不過依家又唔見有得賣！

尋日見有細細包鍚紙包裝嘅秋刀魚賣----有三種味：醬油、味噌同泡菜。我唔食泡菜，所以買左醬油同味噌各一包。夜晚口癢開左包味噌嚟食，原本都冇咩寄望，誰料一食有點驚為天人！味増我原驚過咸，但係呢啲一點也不咸，有點偏甜添，我諗用佢嘅汁嚟煮菜、煮完撈埋啲魚一齊食都OK。

果包醬油味我未試，不過今早急不及待去買多幾包味噌味----因為隔一段時間，分分鐘又買唔倒！

價錢嗎？會員價$9.9一包。份量好少咋，不過間唔中加吓餸、或者睇電視口癢果陣食都幾好架。