戰利品
2013/09/12 15:17:20 網誌分類: 飲食
早輪介紹過響「大棧」買嘅法國BB雞食譜,個人覺得味道真係唔錯,而且搵滴油睇吓都冇果度好吖馬。早兩日又買左好多煮西餐嘅天然香料,一於再入定貨,得閒泡制佢!
今日有備而戰,帶定個保凍袋去入貨;雖然買完即刻返屋企問題不大,但係有陣時啲嘢,唔怕一萬、至怕萬一!萬一路面情況有變,一兩小時都返唔倒屋企,咁啲急凍嘢溶左雪再放番入冰格就唔好啦。
以前屋企附近有間「樓上」,我好多時都去入啲急凍食品,但係自從佢搬左之後,我真係要專登去先得;因為如果行開街,冇準備,買左啲急凍嘢就麻煩---雖然可以即刻買個保凍袋,但係如果唔係即刻返屋企、拎住咁重嘅嘢真係好麻煩。
「大棧」分店少,九龍區得尖沙咀一間,我見反正都要去尖沙咀,一於去埋隔離街間「樓上」入貨啦。
戰利品:
法國白BB雞---上次$79.9兩隻,今次$84.00兩隻(要買兩隻先係呢個價錢)
加拿大殼飼牛腩----$99.9三包(一磅裝)原本想買羊腩,售貨員推介牛腩。佢話呢個特價最後今日;反正我好多時煮牛肋條,今次買左第日炆牛腩囉!
結果冇買羊腩,因為買太多嘢雪柜嘅冰格放唔落!羊腩冬天食好啲,等下次有特價(cheap人!)先買。
原本想買包羊架試吓(一包四件,少少地,啱我),但係冇貨!售貨員叫我買羊扒,我答:「羊架同羊扒都唔同食法!」
另外買左兩包去核紅棗。我一向唔買去核紅棗用,不過因為差少少錢就可以做會員,我諗住日後好多機會幫趁,所以咪買兩包紅棗搭夠佢囉!難道買虫草、燕窩咩,我天生麗質唔駛食呢啲嘢!
響「樓上」買左咩?犀利啦-----黑松露醬呀!仲買左一PACK四罐嘅油浸吞拿魚---失梅用桃代!買唔番之前一盒三罐果啲,買呢隻嚟試吓囉!
最後,買左樽麥冬。早輪睇中醫,佢講左幾次叫我食麥冬,所以買一樽,每次煲湯落一啲,反正佢冇咩特別味。
唔駛客氣,我見咁多好嘢,又睇仲隻無油BB雞,所以上網睇,我在他們的facebook見到,https://www.facebook.com/maxchoice。
好彩冇再買咋,冰柜經已做晒劏房啦!
多謝阿夢。我上次響大棧買嘢係睇報紙推廣嘅,當時唔覺有新世紀廣場!因為果度我比尖沙咀方便,冇理由睇漏眼;反而黃大仙中心,果度我唔會去,有可能漏左。新世紀廣場早排全個商場大維修,唔知會唔會咁啱上次推廣嘅時候冇開呢?第日我都寧願去果度買。始創中心果間係「樓上」,佢地呢兩間鋪依家好似孖公仔咁,去到邊都拍住上!
靚豬:如果有羊腩同羊架推廣,請通知聲,我都好想買呀!
唔好意思,係新世紀廣場511舖先啱。
van、我最想買就係牛腩、羊腩!
亞夢、妳真好、幫查埋地址、去開始創中心睇吓先!
我上網check咗,始創中心有,黃大仙中心有。
哈哈!財散人安樂。 加拿芬道近彌敦道,好细間,好容易行过左。
阿van,好多戰利品喎,大棧喺尖沙咀邊度呀,等我出開尖沙咀又去睇吓!