拆餐飽！

電腦哥哥果然係有承擔嘅男人，應承我今日搬番部電腦嚟就真係做得到，仲唔收錢添！

移民美國嘅大佬、大嫂今個星期三晚回港，佢地個女(即係我嘅姪女)亦趁住十一黃金假期響同一日由上海飛返嚟，響機場一齊匯合先入住酒店。

果晚十點幾姪女通知我佢地到左酒店，叫我出去一齊宵夜。其實佢地食左飛機餐架啦，祇不過搵個地方坐低傾吓計啫，於是去左佐敦白加士街一間叫「順德人」嘅地方食米線，大佬叫左條蒸魚、我祇係飲左個湯，食物質素欠奉----一句講晒，經濟實惠囉！

第日係中秋節，姪女早上十一點先whatsapp問我去唔去離島行？想食海鮮。佢地想去南丫島或者長洲。我話食海鮮梗係去南丫島索罟灣啦！不過果晚要響老人院接阿媽出嚟做節，索罟灣船期疏，結果去到中環碼頭，剛剛走左班船；咁啱長洲船等十五分鐘便開，於是去左長洲。中午餐飯是是旦旦叫啲嘢食---四個人食左二百幾蚊海鮮連兩枝藍妹啤酒，你都唔會認為啲海解會好食啦，祇可以話一句：抵食囉(個樣幾見得人架)。

不過，沿途有間屋騎樓掛左好多個特大花燈，好得意！

做節食咩？好難估架啦，又係食日本餐呀！點解？第一：阿媽鍾意食魚生、第二：老人院附近冇咩選擇！

追月果日，姪女問我有冇興趣去行淺水灣同赤柱？講真，我個人好怕晒，早一日經已行完長洲、仲行淺水灣？真係Day Repair, Night Repair都唔掂呀。我答：你地去啦！晚飯至嚟啦。

晚餐去左圓方嘅「百樂潮州酒樓」：服務質素非常好！食物質素祇能說是及格。

今晚約左親朋戚友食飯，在紅磡稻香。食嘅都係大路嘢，冇咩驚喜咁啦(影漏左一味餸---正常丫！我成日要個姪女提我先記得影相)！

大佬一家原本訂左機票星期一飛星加坡玩一星期，依家撞啱打風，班機經已取消左啦！依家唔知點算？