走音、唔啱音

走音、唔啱音，兩者聽落好似冇咩分別，但係諗深一層，係有分別嘅！

先講走音，如果你唱一小段曲，基本上都唱啱左，祇係有些句子的音階有偏差，我認為此屬於走音。出現這些情況，有以下可能：

一. 唱者本身高音未得，每遇到「反、六、五」甚至更高的音階唱唔倒，便不自覺唱低左！又或者女平唱者(女人通常低音較差)，遇到要唱「仩、伬、仜」呢啲低音嘅時候唱唔倒，又不自覺咁唱高左，便出現走音的情況。

解決方面是練好啲高音同低音(講梗係易，做倒先得架)，響未練得倒之前，另一個方法係遇倒自己唱唔倒嘅高音或者低音嘅時候，用對沖嘅方法---即是高八度或者低八度唱，咁「反、六、五」便唱成「仮、合、士」、而「仩、伬、仜」便唱成「上、尺、工」。

某些人認為要忠於原唱，老倌咁唱就要跟到足，否則便有所不足。需知道，每一個人唱歌嘅高低音領域，某程度係天生嘅，當然後天訓練可以改善，但係始終有所局限，盲目咁跟人除左係未了解個人嘅天賦條件外、亦顯示此人唱歌技巧上有所不足！某些時為左曲情而改用高或低八度唱(唔係唱唔倒先咁唱)，呢啲先至係唱功！

即使係耳熟能詳嘅名曲，原唱係咪一定係最好呢？早兩年跟師公研究「落霞孤騖」呢首歌，師公講(當然，你有權唔同意)：如果佢唱平喉果段「反線中板」妹情深....，原唱係用高音唱，佢會選擇用低音唱，並即時示範唱俾我聽。聽後我都認同用低音唱會更能表達唱者當時悲痛心情。可惜我不是唱平喉，否則有機會我都會試吓唱讓大家評論吓！

我咁講並非對聲哥唱法不認同，祇是如果今時今日，聲哥再唱都可能會改變唱法也未定！任何人學任何嘢都唔應該停留響同一個地方，要不斷鑽研、不斷改善先至會有進步。

二. 唱者未能運用丹田之氣，所以唱到句尾經已冇氣唱，那個音階便變了音！改善之法梗係要練好用丹田唱歌啦！呢樣係唱歌必須嘅，用唔倒永遠都唱唔好！權宜之計，搵多啲抖氣位，咁唱到尾咪仲有氣唱囉！問題係唔可以俾人聽倒你嘅呼吸聲。

至於「唔啱音」，我會認為係唱者全段曲都冇跟譜唱！如果唱者係跟啲鷹鸚鵡式教學嘅老師或者跟錄師父學唱歌，自己完全唔識睇譜，每遇到一些「散板」嘅唱段，便很難唱得好！如果唱者耳軌好，或者尚可憑聽覺唱得啱，但能夠做倒嘅人唔多；如果唱果個識睇譜、但係唱出嚟嘅音跟譜完全唔相同嘅，那便是唔啱音！一次聽曲友唱「七夕銀河會」，子喉一開始有句「散板」，我聽完同佢講：「你句散板唔啱音喎！」

佢答：「散板唔一定要跟譜唱架馬！」

我：「啱！唔一定跟譜唱嘅意思係中間嘅拉腔，你拉多幾粒音、或者拉少幾粒音都冇問題，但係去到尾你都要跟番人地個音，而且唱「散板」雖然係好自由，你拉個腔都要似一個腔先得！」

有些時聽一些自己未聽過、亦唔識唱嘅歌，你都會聽得倒唱者唱得唔啱音----因為唱到古古怪怪，聽落唔似係一個腔！

所以，個人認為「走音」一定係「唔啱音」，但係「唔啱音」並不等如「走音」！