知己知彼

唱粵曲、猶其是係要出「騷」，一定要先了解自己擅長唱咩嘢歌，咁先至可以揀首可以表現自己最好一面嘅曲嚟唱！

當然，如果你認為自己係萬能老倌，冇嘢難得倒你嘅，咁樣就唔駛再睇落去啦...

世上沒有十全十美嘅人，特別係唱歌，即使係老倌都不可能沒有缺點，問題係：唱咩嘢歌可以突出自己嘅優點、或者隱藏自己嘅缺點。

有些人唱曲拍子穩，但係唱不倒高音，那末遇到要唱梆王，可以設計一些避免高音的唱腔去唱。不過，如果是小曲(固定旋律，不能擅自更改：如「妝台秋思」的「落花滿天.....)，你不能更改唱腔的時候，遇到高音便祇能以低八度唱出。如果唱者死唔信邪，硬要死谷去唱，唱果個當然辛苦，其實聽果啲人重辛苦！相反，遇著低音翳喉便以高八度唱出。如果發覺用高八度或低八度唱出嚟嘅效果唔好，咁咪揀過第二首歌出「騷」囉！

不明白坊間部份導師，硬要要求學生跟足原唱？你唔係芳姐、女姐，亦唔係任姐或者聲哥，佢地做得倒嘅唔代表你都做得倒！而且，佢地入碟嘅歌都年代久遠，佢地嘅唱法或者唱腔其實有好多地方可以改進嘅，即使係同一首歌、如果佢地再唱都會唔同----猶其是係梆王，因為自由度很高。

再者，雖然佢地粒粒都係大老倌，佢地都有唱錯字的情況，導師都要佢地跟住錯，咁係對下一代唔負責任嘅表現。以前入戲行都係為左搵食，書讀得唔多，唱錯字在所難免，亦不應深究；依家既然知道錯而唔去糾正，如何為人師表？

大棚上課為左要統一唱法，要學生跟足原唱尚無不妥，但係老師如果發覺學生做唔倒，最基本都應該話俾佢地聽可以用高八度或者低八度唱---除非個老師本身都唔識啦！當然，唱梆王要度過個唱腔、唔係人人都識，更加唔會響上大棚課嘅時候花時間咁做！