鮮菇燴蝦仁豆腐

好少買豆腐煮餸，除左煲湯！原因係響街市買果啲用嚟煲湯，煮餸我鍾意超市果啲；但係超市好抵死，成日要買兩件，一次用唔晒、分兩次嗎？豆腐唔襟擺，冇理由餐餐食豆腐架！

終於見倒啲再細舊啲嘅豆腐賣，都係要一次過買兩舊！但係咁細舊，隔日食埋佢都冇問題啦！

煮咩嘢？咪呢個「鮮菇燴蝦仁豆腐」囉！食譜係李錦記嘅，不過煮完我自己又覺得可以改良吓。我講明係參考人地嘅，唔似得有啲人咁衰，將人地寫嘅歌加一段/減一段就話係自己作嘅咁冇品！

材料：

滑豆腐(我用左一舊迷你豆腐)切粒用鹽水浸過

蝦仁120克

本菇50克

蔥粒

做法：

一. 蝦仁下麻油、栗粉拌勻(食譜要加蛋白，我試過覺得唔用冇問題，無謂嘥左隻蛋---雖然我用左剩番果啲沖滾水蛋飲)。

二. 用一湯匙油將蝦仁炒熟。加入本菇和豆腐粒，小心炒勻，下水1/4杯，生抽2湯匙、麻油1茶匙及糖1/2茶匙，煮滾一會，見本菇軟身，洒上蔥粒(咁啱冇，所以冇落)打芡上碟。

註：

一. 本菇在街市一盒盒賣，約八蚊一盒；街寶叫「蟹味菇」，賣六蚊一盒，十蚊兩盒。其實一盒我都太多，所以好學唔學學「阿蘇」咁嘥嘢囉---淨係要大粒果啲，BB咁大粒果啲我放棄左。

二. 本菇食真啲，其實有點苦味。所以我鍾意買全白色果隻菇食。不過，呢味餸用本菇個樣靚仔啲，當然可以用鮮冬菇代替啦，餸飯一流！