練聲

唱歌好得意，有啲人一開始唱歌，就用啱左發聲位置，所以佢地唱得倒！但係你問佢點樣發聲？唱唔倒高音點算？唱唔倒低音又點算？佢地一概答你唔倒！

我最初學唱粵曲，聲弱！當時果位導師都係不斷叫我發力...

我好用力架啦！但係導師都係話我唔得。音樂師父叫我盡力嗌啦、嗌到沙聲，瞓醒覺冇事又再嗌，嗌嗌吓就得架啦！

唔好意思，我用盡力嗌左五年，一樣唔得(唔得係把聲唔夠響、唔夠亮)！最終明白，唱粵曲係要知道正確嘅發聲位，加以鍛鍊，先至可以達到聲亮及高低音都唱得倒而唔會俾人覺得你唱高音刺耳。

不過，坊間教唱粵曲而又識得教發聲嘅導師真係鳳毛麟角。佢地唔識，咁點教？

佢教你唱歌啫，冇責任教你發聲架！呢啲係另一樣嘢嚟。

教唱歌，最簡單咪跟卡啦OK原唱囉！卡啦OK最唔好係原唱點唱、你便要點唱，完全冇自我發揮唔同唱法嘅機會；不過，如果你天賦好，學倒原唱冇九成、有七八成都好好架啦！

另外嘅教法係跟曲譜唱。一般係導師示範唱一段，學生跟住照唱，冇咩嘢大錯(即駛唔跟足譜)都過關！跟住繼續教落去。呢種教法唔注重「工尺譜」，所以學生唔識睇譜，祇識死記！不過，隔一段時間再唱同一首歌，便好像失憶咁，唔記得點唱。

比較嚴謹嘅教法係要學生跟足「工尺譜」學歌。呢個教法教出嚟嘅學生根基比較好(當然都要果個學生本身嘅求知慾好高先得)，不過唔係人人接受！點解？好多人學粵曲、甚至跟好多唔同嘅老師都係為左多啲出騷機會，呢啲人學歌不求甚解，點教都係嘥氣！

早幾晚操曲，之前同音樂師父(亦都係粵曲導師)同曲友食飯。我問果位導師：「有人同我講，唱唔倒高音，祇要搏命嗌、嗌嗌吓就得！係咪呢？(雖然我都肯定唔係)」

同檯幾位(包括果位導師)大叫：「梗係唔係啦！咁嗌法、把聲好唔襟玩啫。」

以前成日聽人講，粵劇老倌要朝朝吊桑子；我在演藝上粵劇課程時，某導師亦講過(佢係內地來港，年青時在內地接受粵劇訓練)：「在國內上課，每天都要走上山練聲----」但係佢地係先教左佢地點發聲，然後跟住個方法去嗌聲，唔係搏命嗌就得！

我用正確方法都練左差不多年半，老師話齋：「你得天獨厚咋！如果唔係，嗌左五年可以收皮啦。(講得俗左，不過佢真係咁講)」