愛與被愛

每次同學聚會，某書友仔都好似灰姑娘咁，晚上八點幾就話要走，理由係要趕及屋苑尾班村巴。

佢果個屋苑，據我地所知，差不多去屯門或元朗嘅小巴都必經嘅，所以佢每次咁講，其他書友仔都異口同聲咁講：「冇村巴咪搭小巴咯！再唔啱響荃灣「打的」都有限錢啫！」

我心想：「佢當然唔係錢嘅問題啦(要交人呀)！不過，搵個容易落台嘅藉口啫。」

我即係舉起正義之旗：「喂！你班人仔唔好咁啦，打完麻雀食埋飯都傾左六七小時咯；又唔係唔知阿？個老公咁麻煩，你地係咪想佢以後冇得到出席聚會吖？」

跟住個個冇聲出，阿？立刻雞咁腳走。

我響舊網誌曾經講過，我呢班中學同學畢業後成四十年冇見，呢兩三年陸陸續續退休，有心人士便嘗試聯絡番，最終我地搵番十個八個人；依家如無意外，每月聚一次。其他未聯絡倒嘅大部份都移左民。

讀中學時，阿？同我算係最老友嘅。佢畢業冇幾耐便結婚，兩公婆感情很好，而且佢亦好享受個老公分分鐘需要佢果種被愛嘅感覺。問題其實出於佢地仔大女大、兼且兩公婆都退休後，佢老公一向性格內向，冇咩朋友----向好處諗咪感情專一咯、唔好嘅係：依家屋企得番佢兩個人，書友仔每次一個人出街，佢老公就覺得佢唔啱，留低佢一個人孤零零對住四邊牆！因為佢冇咩其他朋友，所以佢唔識同自己安排節目！

這樣一來，阿？總覺得有種無形壓力迫著她。尋晚佢同我講：「我尋日出街前俾左啲旅遊單張，叫我先生睇吓，點知返屋企時佢告知經已上網同佢報左某個團。」

書友仔覺得佢先生冇同佢商量便報了A團，其實佢想去B團。我跟佢講：「如果你唔係想去旅行，你因何叫你先生睇果份單張？你先生雖然冇問你，但係佢諗倒你係想去旅行，佢咁快手經已報左團，佢以為你會欣賞架，冇諗過你會唔高興！」

書友仔答：「我叫佢睇份單張純粹係等佢有啲寄託，唔好一個人響度胡思亂想啫！」

唉！兩個人相處，真係少啲學問都唔得！