689、759

689、759？

唔好以為我講緊「摩斯密碼」，佢地好有江湖地位架！

759，我諗大家都知我講緊「阿信屋」掛！林老板：「我又幫你宣傳啦！係咪應該有啲表示---俾啲股份我、或者日後我幫趁嘅係咁倚收我半價，當係敬老都應該啦。」

未收山前，同三位豬朋一年打兩三次麻雀，收山後打得密左----兩個月一次！佢地仲響江湖打滾。我諗佢地原本係一番好意，諗住老娘退左休、便密啲送零用錢我駛嘅(以我咁衰嘅人，無功係唔會受$嘅)，誰料自己唔爭氣，成日封番利事俾佢地！

尋日又係我地兩月一次嘅聚會。除左響麻雀檯度拚搏之外，當然少不了交換吓情報(我地係「長江一、二、三、四號」嚟)；老娘離開左江湖啫，唔代表我不問世事架！

尋日嘅話題，點樣都會提吓「港視」單嘢，我話：「阿689....」

A問：「邊個689？」

我同阿B同時：「你唔係馬？689都唔知係邊個？」

我：「咁759你識唔識？」

A答：「759阿信屋囉！(死未？原來759嘅知名度仲高過689！)呀！(如夢初醒)我知你講邊個啦！係因為佢當選時所得嘅票數。」

我以前成日同啲同事講：「你地最驟忌係響公眾場所批評啲地區人士，因為你唔知附近有冇佢地嘅朋友；如果真係有必要講嘅，都要搵個大家都明嘅代號！」不過689呢個代號通街都知，同直接講佢個名冇分別。

B：「不如第日叫佢做「衰過759吖」！以得票嚟講689票少過759喎。」

我：「抗議！衰過759即係759都係衰、不過佢仲衰咁解啫。但係759都冇做錯事，我地唔應該咁誣蔑佢。」

A：「據講759想發展化妝品同莎莎爭市場喎！」

我：「咁我又唔知，佢遲早變超市我就知----附近有間759有菜賣啦。」

喂！越講越遠，我地唔係講緊689嘅咩.......