盡信書不如....

依家學粵曲，除左練聲之外，便是練「視唱」。

何謂「視唱」？即是睇倒曲譜寫咩嘢音就唱咩嘢音。一般來說，如果係「鸚鵡式」教學方法，學生未必識得曲譜寫嘅「工尺」係咩嘢音，祇識得學口學舌----模仿力高、聽覺好兼音階唱得倒嘅咪唱得倒囉！否則，可能祇學倒五成，隔一段時間唔唱，便唔記得點唱。

學左「視唱」，即使一首曲隔段時間冇唱，睇番譜、哼幾次就會唱倒！就算係新歌，睇譜都唱倒九成！

我伴奏班位老師成日話我地班同學學緊「視奏」-----平日響屋企唔練習，上課時「視」倒啲譜先至「奏」！

正因如此，每次練唱，我都會搵啲有齊晒「工尺」嘅曲嚟學----近幾個月都係學唱嚴淑芳嘅獨唱歌。上星期唱唱吓，我同老師講：「我覺得嚴淑芳好鍾意響「底叮」之後快擸唱---不論係兩個字定係三個字。」(註：咁樣唱係冇錯嘅)

老師：「係呀！呢個係「梁家軍」唱歌嘅特色。不過，我覺得你唔應該盡跟原唱，應該一些時快擸、一些時慢擸。」(註：呢個講法，我不止一位老師同我咁講，原因係聽起上嚟有啲變化)

我：「個人嚟講，我一向唔會跟足原唱！原唱我通常聽一兩次，有個概念便跟譜唱。」

老師：「啱吖！你剛剛拉果個腔仲唱得好過原唱---粒粒音都好清楚、但係又好連貫！反而原唱拉長腔好平，冇高低之分！你能夠做倒咁(佢仲即時用呢個方法唱一次，等我可以比較吓)，第日遇到要拉長腔嘅時候，嘗試吓搵啲音用呢個方法唱，聽落完全唔同架！」(註：我好尊重原唱，不過每個人唱歌都有每個人嘅特色，我希望有朝一日我可以唱倒van腔啫；呢樣嘢我個仔叻過我，佢一早識唱雲腔)

無可否認，原唱出得唱片，唱功都有番咁上下架啦-----我講緊以前咋！

最近同曲友食飯，我好感慨講：「依家啲人出騷，永遠唔會諗自己啱唔啱唱某首歌，通常老師啱啱教完果首歌，個個打崩頭要揀果首歌出騷！」

曲友：「係囉！我地下個月有個騷，三pair爭住唱「血濺未央宮」，一來啱啱教、二來一個二個自信會唱得好過原唱喎！」

呢個咁新穎嘅講法，我都係第一次聽！如此類推，難怪「泣血水繪園」會上左流行曲龍虎榜咯！