週身刀----

週身刀之後----咪係「冇張利」囉!仲有，我江湖仇家多，吾排除我第日都係週身都係刀、兼且張張利!

曾經有一段頗長時間，我係工聯會「業餘進修中心」常客----插花班、剪髮班、半寶石串珠班、化妝班、各類烹飪班、電腦班、司儀訓練班;其後響類似嘅中心上投資班、晚妝髮型設計班----幾好學!可能因為讀完小學之後，差點連中學都冇得讀！因此，到自己能力負擔得嚟，便盡可能自己補償番掛!

自問有一對巧手，手工藝呢樣嘢難吾倒我。2004年提早退休時，曾經考慮過日後試吓做生意，經營網上訂花或半寶石串珠手飾生意，不過此念頭轉瞬即逝----插花同半寶石串珠，最主要係果啲設計式樣；但係啲式樣一旦在網上曝光，便會有人抄襲，結果便無利可圖。至於插花，假如唔同時賣埋花，每次入貨量少，售價自然又較人家貴---等執笠！

講來講去，最好都係打工。我個好姊妹好幾年前經已情商我幫佢手攪食肆，當時我婉拒左！(即使我依家回心轉意，佢隨時都歡迎我加入)理由係：我係習慣早睡早起嘅人(雖然退休後都比較夜瞓左)、加上佢果度太遠(雖然佢歡迎我入埋去住)、最主要係我越嚟越怕困身囉！

豬朋同書友仔見我間中寫吓食譜，問我會唔會出書？我答：「梗係唔會！依家上網咩嘢食譜都搵倒，我自己都唔會買書嚟睇！有地方都放歌書啦。」

去年正式退左休，曾經再報讀工聯會嘅班---中阮初級班同一個粵曲有關嘅班。唔知係咪依家個人年紀大左，亦唔知係咪見識廣左，總覺佢依家啲班好唔掂！兩個課程我都係上左四五堂便離開。以我呢個見錢開眼嘅人，如果我覺得上課有少少得益嘅，我都會捱埋佢，但係呢兩個班，唉！真係....

中阮初班：因為初、中、高班都收唔夠學生，所以變成混合班。正因為個個學生程度不同，老師要續個教----個別教授咪仲值錢？係！但係每堂祇教你兩分鐘、計起上嚟便很貴。而且，每次上課要背住個中阮去，你話幾悽涼？所以上左幾堂走夾唔抖！

果個「粵曲感情訓練班」更加不知所謂----名稱與教授資料不相稱(唔知可唔可以去消委會告佢呢)！

果位導師堂堂學我阿仔咁做老鼠(每課最少有三十分鐘響度自讚自)、加上佢帶埋嚟上課果位女子(騷場常客，我未睇過佢出騷！不過佢上課時唱得咁鬼大聲，聾嘅都聽得出：不堪入耳。不過，佢堂堂同我地講，佢幾時幾日又同輝哥出騷啦！心諗：有幾難？有錢你想搵邊個老倌出騷都得啦)，每次上課都響度宣傳佢同老師幾時出騷，叫人攞入場劵、叫人買唱碟、叫人做慈善幫佢買佢有份演出嘅入場劵！學唔倒嘢兼且每堂都好似有機會俾人打劫咁，結果又係冇鞋挽屐走！

你話我係咪週身刀吖？

後註：聽完網友嘅經歷，有點不吐不快！工聯會教興趣班的導師，一般都係做緊生意---教插花嘅開花店、教樂器開琴行.....原本無可厚非！反正上課要用花、要買半寶石...導師收你錢幫你拎埋上課，佢有錢賺時、你又節省時間，我覺得問題不大；到選舉時佢地有人打電話叫學員投票給某些人，我都覺得問題不大---票響你手，最終投票俾邊個佢地管唔倒！(其他黨咪一樣用唔同渠道攞你嘅資料做同樣嘅嘢)我認為最大問題係啲導師掛羊頭、賣狗肉----雖然佢本人唔出口(除左自讚自之外)，但係果個同佢出雙入對嘅女人，第一堂經已叫我地去老師嘅私人唱局度操曲。當時我問：「同邊個操(個個都唔識對方)？唱咩嘢歌(一首歌都未教完)？」果位女子即刻啞左！

如果上左幾課，教完一首歌佢咁問都仲算合情理吖！