大出血!

尋日去牛頭角覆診，一早諗定睇完医生去要「大棧」買野，因為手持果張臨時會員咭仲有幾日便到期。

臨時會員咭要響三個月內買滿一千蚊先至可以轉做正式會員，但係我又唔食燕窩呢類貴價嘢，屋企雪柜嘅冰格又唔放得太多嘢！心諗：都幾難買夠一千蚊。

我一向去開尖沙咀果間鋪，前晚諗緊去新世紀廣場果間會唔會方便啲。尋日睇醫生途中個腦突然「叮」一聲----咦！網友阿夢講過黃大仙中心有分店喎。雖然我曾經行過果個商場唔係幾覺眼，不過曲友芳芳住響附近，佢都話見過。

由牛頭角去黃大仙中心，當然比去新世紀廣場或尖沙咀方便，之後返屋企亦較方便！啊！原來搭地鐵一出商場便是。我平日搭巴士去，佢響個角落度，所以見唔倒！

今次大出血，計埋上次啲分夠一千蚊，可以成為正式會員啦！因為我買左啲又貴又唔阻掟嘅「BB青邊鮑」。尋日特價$498一包；大隻啲兩隻一包嘅都係相差幾蚊；不過，店員講：「大隻果啲祇可以用嚟煲湯(當然煲完湯都可以食)，細隻果啲除左用嚟煲湯之外，仲可以蒸嚟食。」

而且，隔離有位婆婆，似乎買慣買熟，佢叫我睇吓鮑魚嘅底部，深色嘅好似佢咁老(一字寄之曰靭)，上面圓形果度越大越好！

見佢咁熱心、又唔似係做緊「妹」，又即管買包嚟試吓！(試過好唔好再講俾大家知)

今次仲買左海花膠(都係未食過架！祇不過屋企啲花膠快食晒、要補充啦)、羊腩、雲耳同腰果。我嘅至愛「BB雞」梗係要買啦---不過今次冇特價，$52一隻！