自有公論

無線尋晚46周年台慶，有人呼籲熄機抗議，為港視爭取發牌有所行動。

我唔會響應呢個行動，唔睇係因為年年台慶節目均千篇一律，冇睇頭；當然，亦唔認同阿叻咁自大！

作為觀眾，睇唔睇首先考慮是某台的節目有沒有吸引力；作為廣告商，會否在該台落廣告亦視乎那些節目能否吸引廣大觀眾，才合符經濟效益！

政府未決定新的電視牌花落誰家，港視經已用高薪挖角，搶去無線大部份不同部門的員工。那些因高薪而蟬過別枝嘅、實屬無可厚非---正所謂人望高處、水望低流嗎！不過，佢地過檔時亦知道，港視未必一定可以獲得發牌(如果曾生年代，有人口頭應承左嘅，咁我呢個局外人不得而知)，那麼，他們過檔前便應該有心理準備，為左高薪而賭一鋪！唔好彩，結果輸左。

從常理而言，多個台對觀眾而言係多個選擇；對藝人及有關行業者亦是多條出路。依家大件事啦----稍為有啲演投嘅走晒，剩底果啲好多都係演技欠奉；再者，依家啲編好唔掂！兩者加埋，就出左最近果套「法外風雲」囉！

欠情理：

一. 律師響公眾地方，應該好注重自己言行---劇本寫到陳豪同黎耀祥兩位大律師響醫院公眾地方因為爭先，而攪到碌晒落地，唔合邏輯！啱啱過左果集又影佢地打拳洩忿，雖然響室內，但係理論上都有其他人睇倒架！

二. 馬賽個角色不知所謂，連一叮點普通常識都冇，竟然可以做模特兒經理人！佢嘅表現似做「媽媽生」多啲！兩個模特兒偷錢當場俾人打到豬頭咁，因而冇左個工作，咁都可以作為理由問打佢果個人攞廿萬！馬賽佢唔係馬？

三. 之前睇「幸運摩天輪」，都唔覺得陳智燊演技咁屎---可能果套劇佢祇係做番自己掛！今次演律師仔好唔掂---似個傻仔多啲！連做律師最基本嘅冷靜都做唔倒(老細同其他律師開緊工作會議，佢竟然無厘頭搭爹！真係以為自己同老板有親？)！最離譜係剛剛做完果集：黎耀祥同岳華關埋房門傾計，佢唔敲門便走入去問人有冇嘢要幫手？老板有嘢搵你自然會叫你入去啦！如果我係佢老板，我會同佢講：「麻煩你幫幫手，出番去、順便關埋門！仲有，幫我手睇住唔好俾啲閒雜人等衝入嚟。」

四. 馬賽角色根本便是貪慕虛榮之人，一開始佢便有心嫁個有錢仔，祇不過當知道個有錢仔會娶陳法拉，另一方面陳智燊個傻仔又對佢死心塌地，所以搵佢攝住場先啫！觀乎佢嘅表現，日後有更好條件嘅人，一定飛走陳智燊！佢俾人強姦屬「死冇餘辜」。

五. 一開始對岳華個角色都有好感，但係當馬賽單官司輸左後，佢嘅表現又唔正常啦，竟然特登開倒頭車撞個有錢仔部車(大律師嚟架)！撞鬼？邊個寫劇本架？

講咁多係：無線會唔會執笠，視乎佢製作嘅節目質素得唔得！其他電視台一樣啫----ATV咪一早比低左囉。