打蛇隨棍上

早兩日師公生日，佢啲徒弟唔係忙於玩音樂(每年生日都有粵曲演唱)、便是忙於響四方城度搏命！師父話齋：最乖係我----年年都幫手接客！

今年先慘！所有啲人情都係我KEEP住----好驚呀！(以前我祇係幫吓眼啫)食緊飯都要看住，連行開去同師公敬酒都唔敢。

散席後，師公問我點解咁耐唔搵佢？我梗係惡人先告狀啦---「喂！我約過你飲茶，係你甩我底喎！我忙啫、你好似仲忙過我。」

師公：「得閒打電話俾我，同你度吓曲吖！我係星期四同星期五唔得閒啫(呢啲我都知啦)。」不過，佢冇講即駛你約左佢、如果有人搵佢北上，佢會飛起你啫！

佢既然咁講，我梗係唔會執輸。

我：「師公，你舊時咪教過我用紅線女腔唱「落霞孤騖」果段「反線中板」嘅，今朝同阿松哥傾開計，佢覺得可以轉做「乙反中板」唱喎，你覺得好唔好？」

師公：「好呀！得閒又試吓吖。」

呢兩日得閒就響屋企度吓點樣用「乙反中板」唱呢一段曲，一邊諗、一邊唱、一邊寫低啲譜。雖然師公可以同我度曲，但係佢祇會示範唱嘅方法----舊式嘅教法係佢唱，你盡量學佢點唱，記得幾多得幾多。不過，我希望將佢規範化，有譜可循，唔駛靠記！因此，我想試吓自己會點唱、再問佢意見。

首先，將原唱果段譜上「工尺」---坊間大部份「反線中板」都祇有「叮板」，冇譜嘅！

第二，憑記憶，將師公教我用紅線女唱腔唱呢段「反線中板」譜上「工尺」；

最後，梗係將我試用「乙反中板」唱出呢段曲譜上「工尺」啦！

攪掂先搵師公改正。

 隻老虎乸係我！