師父、老師

呢個話題我響舊網都講過，又翻炒啦。

學唱粵曲和伴奏班的同學，習慣稱呼老師為「師父」，但係我對呢個稱呼很不以為言。

以前學粵曲/學做戲不那麼普遍，學呢啲嘢通常都係正式拜在某些紅伶門下，甚至作為入室弟子；這些經過正式拜師儀式而入門者，與這位紅伶便建立了「師徒」關係。

以前有講：唔窮唔學戲！通常細時便拜師入門係，希望學一門手藝以便將來可以搵食。

果陣時拜左師學藝唔駛俾學費，分分鐘師父養埋個徒弟！當然，果陣時紅伶亦認為拜師者是可造之才，才會收入門下，傾囊相授；同樣，有權利當有義務，為徒者樣樣要以師父為先，日後負責佢嘅生養死葬！

近呢廿年學戲同學唱粵曲才那麼普遍，學者主要是為興趣！好似「阿立」話齋：以前唱粵曲係「賣唱」，依家唱粵曲係「買唱」。

點解？以前唱或做得好嘅，咪入戲行或者歌壇唱歌/做戲搵食囉！依家你學完想公開有得俾你唱或做折子戲(俗稱「出騷」)係要俾錢架！幾錢？幾百至幾萬一首都有----響會堂仔唱咪幾百、響康文署文娛中心咪幾千、請埋紅伶同你唱咪幾萬囉(要俾埋對方份錢、俾介口同利事)。所以，依家要公開唱歌，係要俾錢買先有得唱架！

嫌貴？去廟街唱囉！一百幾十有得唱、亦一定有聽眾----祇要你唔介意企街、亦唔怕俾人掟雞蛋！再唔啱，報名「街唱」啦，唔駛錢，不過你要唔怕高空擲漒水至得！

依家粵曲導師多到數唔出晒！都講左呢啲叫做「班」啦，咁上課果啲同老師嘅關係咪係「師生」、唔係「師徒」囉！兩者關係是：前者要俾錢、後者唔駛囉！

但係，唔知點解？上粵曲班果啲個個叫老師做「師父」！你試吓唔交學費睇佢教唔教你？你試吓非上課時間問佢樂理睇佢答唔答你？呢啲咪係老師同師父嘅分別囉！

我師父(真係拜左師)個老豆，我自然稱之為師公。但係，我師父亦有不少學生，佢地個個叫我師父做「師父」、因此，亦稱我「師公」為「師公」！同樣地，師公有好多徒弟，佢地所收嘅徒弟或學生亦稱師公為「師公」。

嘩！如果咁樣計起上嚟，師公啲徒孫真係有排數！但係，可以講，佢真正嘅徒孫祇得兩位，我係其中一位。