【出師表】古惑仔版

世侄，你伯爺出嚟行，點知半路就去咗賣鹹鴨蛋，睇個勢，依家個地盤分成三嚿，益州睇嚟遲早都係保唔住嘅喇，以後個世界睇嚟都幾難捱！

好在你伯爺身邊，留低班細嘅都幾忠心，叫班懵仔出去劈友，連命仔都唔要，呢D都係睇在你老豆份上，以前又俾錢又俾女，依家想報答返你啫。

嗱，唔好話阿叔唔醒你，你要醒醒定定咁做人，搞掂你老豆嘅遺願，等班兄弟有得駛、有得威，千祈唔好將自己變成一嚿叉燒，辜負左我地班手足嘅期望。家下班兄弟都係自己友，你想鬧邊個摑邊個都得，不過要公平一D。

唔俾心機做野嘅，成日係度搞三搞四嘅，就交俾保衛科，應該斬手嘅就斬手，應該斬腳嘅就斬腳，冇人敢嘈；份人忠忠直直嘅，應該升職嘅就升職，咁樣做就表現到你對大家都係公平嘅，你千祈唔好幫埋一面，對班兄弟大細超。

郭仔、費仔同董仔幾個，份人都幾老實，做野又交帶，你伯爺在世嘓時，就已經特別睇得起佢地，臨死前又叫佢地要好好咁扶持你，會裏面大大細細嘅事情，都可以交俾佢地做，包你冇後顧之憂！

嘓個散仔盲炳，人心地好，又好生猛，劈得又玩得，你伯爺都話佢掂，你得就提拔一下佢，我覺得收陀地劈友嘅事，就交俾佢做，一定可以搞大我地個地盤，以後就冇人再敢惹我地架嘞。

我地舊陣時，個堂會點解會咁強勁呢，就係因為一直收埋D猛人，趕走D呃飲呃食嘅廢柴；但後嚟又點解會搞到咁衰落，就係因為剩番班口噏噏當秘笈嘅廢柴，你伯爺以前次次同我傾計，講起呢單野都赤赤痛。

依家做緊侍中、尚書、長史、參軍幾個兄弟，呢幾條友，都係阿叔我斬過雞頭滴過血嘅好兄弟，你一定要信佢地，我地個堂會重振雄風之日，就指意哂你嘞！

阿叔老喇，我只係個耕田佬，係南陽本來有幾塊田耕下，係呢個人督人嘅時代，我唔想隊人，又唔想俾人隊，於是就歸隱田園。

你伯爺唔嫌棄我，三日唔埋兩日，就走去我屋企搵我出嚟傾計，問我點搞好個會，阿叔我就感激到標曬馬尿，咁就跟左你老豆出嚟打天下。

後嚟我地個會唔妥操爺，同佢講唔掂數，開哂大片，點知衰左，靠阿叔我撐住成個會，到依家都廿幾年囉。

你伯爺知道我醒目，所以賣鹹鴨蛋之前，就將大事都交托哂俾我，自從換左你做阿頭之後，我就日日失眠，擔心辜負左大佬嘅遺願，所以五月個時，就帶住班手兄開船過河，去南邊嘓個山卡啦嘅地方，搞掂哂佢地，依家無人再敢係度搞三搞四。

我地班靚，人強馬壯，依家先要清理門戶，將D冇本心嘅二五仔，通通做低哂；再將D忠字頭嘅，扶番起身，然後將中原打番嚟；咁樣我就算對得住你伯爺喇。至於要點搞，冧橋呢D野，就交俾攸仔、褘仔、允仔佢地去搞嘞。

呢一次可能係阿叔最後一次出山，帶班兄弟去劈班契弟，劈唔成嘅話，你話點就點啦。如果搞唔掂個會，你就搵攸仔、褘仔、允仔佢地，我信佢地唔敢食碗面反碗底。

世侄，你應該揾個時間，好好咁諗下你伯爺嘅話，阿叔我就好欣慰嘅喇。時間唔早啦，嗲到D度夠喇，要出去劈友喇，男人老狗，話得出做得到，唔好好似個女人咁，係度標曬馬尿，都唔知自已係度講乜。

摘錄自網上【出師表】：神級廣東話古惑仔版，與眾同樂！