知識產權

2013/12/06 15:05:57 網誌分類: 粵曲理論
06 Dec

天下文章一大抄、熟讀唐詩三百首,唔識吟詩也會偷。好似粤曲情節咁,好多都相同-----淨係梁祝樓台會呢一節都有超過十首。講真,甘樣冇問題架,人地啲曲牌編排得好、旋律優美動聽咪得囉;反正聽落你吾會覺得佢地有互抄嘅情況。

不過,越嚟越多人鍾意明目張膽咁抄襲,跟住就話自己係原創,呢啲人真係一字寄之曰:「衰」{#icons_girl4}

早幾年開始,有位仁兄成日鍾意將啲舊曲加一段、減一段,跟住就話自己係作者----老作果個「作」吖馬!據講仲係博士嚟,應該叫佢做「搏士」先啱,係搏懵果個「搏」!連尊重知識產權咁簡單嘅嘢都唔識。

半年前曲友芳芳同我講,佢地教緊「揮淚別南唐」,問我要唔要曲詞?我知首歌係我最唔鍾意果位仁姐唱嘅,我答:「你明知我唔學同唔唱佢啲歌架,攞嚟問!」

芳芳:「其實首歌都唔好聽,有八成曲牌同曲詞都係抄「去國歸降」嘅!」

我:「咁咪係!我最憎抄襲呢啲行為。要學不如唱好啲首「去國歸降」啦!」至今我都冇正式聽過呢首歌。不過,平心而論,同一個情節好難避免將李後主所寫嘅詞加入曲詞內,如此便難免會與後者出現似曾相識的情況。

早兩日北上,學生whatsapp問我,佢依家學緊「血濺未央宮」,問我學完幫佢執「揮淚別南唐」好唔好?如果我冇問題,佢便買份曲詞俾我。

我一口回絕佢:「你明知我唔鍾意果個人、亦唔唱佢啲歌!上次你決定出騷唱佢另一首歌,我經已免為其難幫你執,你又嚟?」

學生:「哦!冇問題,我諗過第二首啦。」

尋日上課,唱到「血濺未央宮」段「士工慢板」,我對學生講:「十首粵曲、少說有六首有「士工慢板」,至今我覺得白雪仙的「觀柳還琴」、冼劍麗的「文姬歸漢」和蔣文端的「金石緣」所唱的「士工慢板」可說是表表者。所以,能夠唱好一段「士工慢板」,基本功經已唔錯!你究竟想學基本功定係想學多幾首歌?」

學生:「梗係想學基本功啦!」最終佢決定學唱「文姬歸漢」。

一般人上「私鐘」都係因為要「出騷」,執吓出騷首歌。我個人覺得上大棚課時,老師冇可能就唔同學生水平教學,所以教完首歌,學生唱唔唱倒、或者唱成點不得而知。上「私鐘」係要因應學生現有程度調節一首歌嘅唱法---譬如佢高音有問題,如何改變唱法、又或者一些特別難唱嘅腔,佢唱唔倒,又如何調節令佢唱得倒。即係話,要針對學生現時嘅程度改變一些唱法,令聽眾聽落唔覺得佢有問題。

如果人地真係唱唔倒高音,你偏要佢跟原唱,唱果個辛苦之餘、聽果個仲辛苦!不過,呢啲係我個人見解啫。

好奇怪,學曲嘅人鍾意學新曲,尤其是那些經已有廿年曲齡果啲。所以,我聽聞有位老師最近連續教左幾首舊曲之後,啲學生明顯流失。

但係,你話我守舊都係咁話啦!依家啲新曲多如排山倒海,有幾多首係見得人架?淨係得個「長」字經已死得啦!我份人係貴精不貴多嘅,好聽嘅歌唔駛長架。

:上文提及「金石緣」一曲,今日經已上載。

 

回應 (1)
我要發表
2013/12/06 21:57:21 回覆

我聽左啦,好好聽呀! {#iconb_325}

user