士工慢板

「士工慢板」係正宗粵曲裡面嘅梆黃唱段之一。早期嘅粵曲全部祇有梆黃(例：胡不歸慰妻)，大家所熟悉嘅粧台秋思(帝女花之香夭主題曲)、潯陽夜月(劍合釵圓主題曲)....之類嘅小曲係後期才加入粵曲度唱。

所謂梆黃，係響固定格式裡面可以好自由咁運用唔同嘅唱腔，祇要合乎規格便沒有問題！所以，同一段「士工慢板」、相同的曲詞，唱者可以好自由咁發揮！

尋日提到我覺得「觀柳還琴」、「文姬歸漢」和「金石緣」(全是第一段)裡面的一段「士工慢板」，你便可以聽得出可以用好唔同嘅唱法演繹出來。

當然，唱者亦可以用一般「士工慢板」的唱法；祇要合乎規格----即是規定那一句結尾要收咩嘢音便可。但正如一些聽眾所言：「唱「觀柳還琴」唔跟仙姐嘅唱法，不如唔好唱！」

當然，我同你都唔係仙姐，無論如何我地嘅聲線都唔會似佢---尤其是仙姐喜歡用鼻音拉腔，呢樣嘢唔係人人做得倒！不過，呢個世人一定有人把聲似佢嘅、但係唱功又未必如佢，所以祇能夠盡自己能力做到最好便算！或者你有能力將仙姐嘅唱腔再發揚光大都未定！

講咁耐，唔識粵曲嘅根本唔知我講咩，識聽粵曲嘅即駛你唔知果一段叫做「士工慢板」，都一定聽過，學過粵曲嘅、所知可能比我多！

今日再上載另一首「觀柳還琴」，是再世紅梅記的插曲之一。此曲我唱於兩年前，亦曾在舊網上載過！但係果個粵曲網頁經已結束，冇得再聽啦。我祇係東施效顰，千其唔好將我同仙姐比較。