熟悉的陌生人
也許, 一場發牌風波,香港電視網絡未能發牌,令一眾支持者,明白到突區政府出現了問題,旗下的職藝員也面臨失業,其中有不少人來自TVB,佔大數都是一些甘草及綠葉演員,他們都是電視台的中流砥柱,如果沒有他們, 整套劇一定會失色,不如看看兩日前一份免費報章的介紹.
試諗吓，如果套套警匪片，只有主角們如同正義化身刀槍不入嘅警察，而無作惡多端奸到出汁嘅壞蛋，又點會好睇？點會襯托出主角嘅威武呢？再好嘅劇本，都要有綠葉嚟襯托主角。而佢哋，就一直默默安守己份，演好每一個角色。
有啲演員，往往因為個樣生得比較有霸氣，而被認定為惡霸；又有啲演員天生一副富貴相，有錢人嘅角色，非佢哋莫屬。因為被定型，佢哋未必可以擔正做主角，但佢哋嘅出鏡率分分鐘比當紅小生更多更頻密。或者你未必記得佢哋個名，但你一見到佢哋個樣，就一定會講得出係屬於咩角色。
文：77合作社
鄭子誠 有陰謀
鄭子誠同「有陰謀」幾乎劃上等號，由《真情》入面飾演睇到人想打爆部電視嘅忤逆仔李子浩開始，幾乎成為TVB嘅御用奸人，演親都係奸角。近年更榮陞為高登男神，獲「陰謀誠」美譽，講到佢做乜都係有陰謀。更有網民戲稱，佢連做電台節目《音樂情人》主持都係有陰謀，佢奸角嘅形象，未免太深入民心喇！
駱應鈞 大反派
駱應鈞可謂大反派嘅代表，由古裝嘅反派大壞蛋，至時裝嘅奸商，以及專呃屋企人錢嘅衰親戚都好似佢做晒咁。佢絕對係實力派嘅甘草演員，奸到入型入格，一出場就知佢準備做衰嘢。不過佢上年已經轉投HKTV，想喺TVB睇到佢嘅演出，就只可以靠煲舊劇喇。
秦沛 大當家
秦沛爸爸可謂天生配角命，無論電影抑或電視劇，都係演配角居多。佢曾經多次獲提名香港電影金像獎最佳男配角，仲喺1987年憑《癲佬正傳》同1994年嘅《新不了情》獲獎。劇集方面，通常飾演主角嘅爸爸、大老爺、大當家、集團主席同大師傅呢類有氣勢又有壓場感嘅角色。
周聰 永遠嘅外公
除咗胡楓，外公爺爺嘅角色通常都係由周聰包辦，特別係傻傻懵懵、患有老人癡呆兼有一大班乖孫錫嘅慈祥外公就更加拿手，好似《溏心風暴》嘅常峰(飾鍾嘉欣外公)同《溏心風暴之家好月圓》嘅鍾泛達(飾陳豪及林峯外公)都非常深入民心。唔講唔知，佢後生嗰陣係「光藝影片公司」力捧嘅靚仔小生，可惜其後電影市道唔好，曾一度到觀塘銀都戲院做經理。近十幾年先返TVB拍劇，同客串吓電影角色。
許紹雄 幽默綠葉王
有Benz雄之稱嘅許紹雄，係觀眾心目中嘅綠葉王，幾乎次次都係做配角，從未坐正，不過就因為演出嘅角色以幽默搞笑見稱，氹得觀眾非常開心而深入民心。最令人印象深刻嘅莫過於响電影《新紮師妹2美麗任務》中飾演督察「方中sir」，令觀眾笑到停唔到。
朱咪咪 搞笑奶媽
到底朱咪咪做過幾多次奶媽角色呢？真係數唔晒喇！無論係電影定係古裝電視劇嘅奶媽，十居其九都係由佢扮。憑住豐滿嘅身形同搞笑嘅演出，令佢深受觀眾歡迎。早前，網上瘋傳佢後生時候嘅相，網民驚嘆佢索過G.E.M.，成為一時佳話。
李成昌 發錢寒親戚
通常都係做舅父、表叔、大哥等嘅發錢寒親戚，角色大多被塑造成密謀呃親朋戚友錢嘅壞人，一無橋就摸吓個光頭幾乎成為指定動作。《溏心風暴》嘅姦夫常在德同《巾幗梟雄》嘅彭鏗，都令人睇到咬牙切齒！而佢奸到出汁嘅演技都受到大家肯定，上年就喺TVB攞咗個傑出演員大獎，都叫做奸得抵啦！
羅浩楷 闊少變公公
早年嘅角色通常都係做闊少、太子同高層等等，不過自從喺《皆大歡喜》飾演凌零發──一個武功高強嘅公公，扮得維妙維肖之後，就由闊少變公公，大多飾演陰聲怪氣嘅啜核角色。
羅樂林 咩角色都死
講起「同是天涯羅樂林」，大家一定記得佢一日死五次嘅經典事，仲成為國際新聞添！由《洪武三十二》、《女拳》、《七號差館》、《布衣神相》到當時重播嘅《皆大歡喜古裝版》，古裝到民初劇，統統都要死！睇怕佢都係「死」得最多嘅甘草演員！除咗「死」到揚威海外，佢以前都好巴閉㗎！做過《神鵰俠侶》嘅楊過同《大時代》嘅股神葉天，角色都為人津津樂道。
林敬剛 兇神惡煞嘅壞人
粗眉大眼、皮膚黑黑實實，個樣夠晒霸氣嘅林敬剛，唔使問，一定係做壞人、黑社會成員、收數佬同以暴力解決問題嘅惡霸代表！《鐵馬尋橋》嘅壞人胡師傅、《巨輪》嘅龍頭大佬豹哥同《秀才愛上兵》嘅殺人犯都係佢，幾乎佢一出場，觀眾就知道，佢又出嚟作奸犯科！唔講唔知，其實佢係畢業於警察少年訓練學校，同喺「萬能影業公司」做過副導演！上年仲同Tommy(E-kids嗰個)合資，開咗間鄭氏娛樂製作公司！
陳曼娜 不可一世嘅有錢人
可能佢本身都係小富婆嘅關係，鍾意打扮得花枝招展，又閒時跳吓拉丁舞咁，散發出有錢人嘅氣勢，搵佢演有錢人角色就更有說服力！記得《十月初五的月光》嘅闊太萬朱莎華嗎？呢個八婆角色將乞人憎嘅程度推向極至，從中亦可欣賞到曼娜姐嘅演技。
戴耀明 搞笑嘅傻佬
戴耀明面圓圓，天生一副福相，充滿喜劇感，經常擔演搞笑角色。而佢扮傻佬或者精神有問題嘅角色都好到位，因此傻福、傻強同黐線佬佢都做過好多次。雖然佢往往戲份唔多，但經常行先死先，令人印象深刻。
鄭家生 大惡霸
四肢發達、一身肌肉兼把聲夠洪亮嘅佢，難免被定型為大惡霸。山賊、囚犯、強盜、蠱惑仔、強姦犯、收數佬同殺手等等，你講得出嘅壞人佢都幾乎做過晒！出鏡率極高嘅佢，閒閒哋一年都有三、四套劇搵佢做壞人。佢嘅大惡霸形象更由電視延伸到電影。除咗幕前演出之外，佢都有參與幕後嘅工作，有武術底子嘅佢不時擔任武術指導。
余慕蓮 善良醜角
以醜見稱嘅余慕蓮，演技誇張得嚟又唔搶戲，每當有三姑六婆、大妗姐、接生婆、清潔女工、村姑同街坊等嘅角色都會搵佢做。醜樣背後，佢有著一顆善良嘅心，2005年嗰陣，佢將TVB頒俾佢嘅長期服務金，捐咗俾貴州山區興建當地第一間小學。之後喺《向世界出發》節目入面，同攝製隊一齊去探望一班小學生，只有小學畢業程度嘅佢，被一班小朋友圍住叫佢做余校長，場面感人。
楊英偉 縮骨老闆
可能因為楊英偉眼仔細細，一副私私縮縮鬼鼠樣，搵佢做縮骨老闆可以話係入木三分！佢最為人認識嘅角色可以話係《真情》入面嘅林木川，成日粗粗魯魯，講嘢聲大夾惡，但實情係個好緊張細妹嘅好大佬！之後嘅處境喜劇《同事三分親》都係做尖酸刻薄嘅高層角色。
王偉樑 精神病常客
大部分時裝劇，佢都係扮演精神病患者，又或者心理變態嘅罪犯；反而古裝劇，佢又搖身一變，成為御醫、絕世高手同探子，個個都有特殊技能。不過點都好，始終都係扮精神病患者最令人難忘，好似喺《火玫瑰》入面做海潮(溫碧霞飾)嘅精神病細佬，同《當旺爸爸》入面嘅傻仔咁。
每當有電視劇上演，大家只係會關心邊個做主角，甚少有人會留意一啲必需要，但唔多起眼嘅角色，例如每個家族總有個二世祖，每齣警匪片都梗有社團大佬，古裝片就好大機會有皇帝，老竇身邊實有個小三。就算你唔關心邊個演員做，但一見到佢哋出現，都會好自然咁話「乜又係佢做呀？」
皇帝-李龍基
或者你會諗起江華，不過有個人做皇帝仲多過佢，就係李龍基，佢喺鄭裕玲版《鍾無艷》、《聊齋(貳)》都係做皇帝，喺《尋秦記》飾演秦王，《天子尋龍》就做唐朝開國皇帝李淵，就連喺劇集《西遊記》系列都係做眾神地位最高嘅玉皇大帝，所以見到皇帝，點會諗唔起佢？
老姑婆-苑瓊丹
喜劇實有一個嫁唔出嘅老姑婆，佢哋例必心胸狹窄、牙尖咀利、小事化大，仲要見到男人實流晒口水，試問邊個夠苑瓊丹演得出色？現實中佢早已經係幸福少奶奶，不過《皆大歡喜》嘅紗紗邵主，《男親女愛》嘅梅日仙，全部演得唯肖唯妙，更加難忘電影《大內密探零零發》入面「龜婆又係我」一角。
神父/傳教士-河國榮/布偉傑
梗係河國榮！佢喺無綫撈咗廿年，《太平天國》、《鳳凰四重奏》、《亂世佳人》同《蘭花劫》都係做神父，就連著名歷史人物，比利時傳教士兼天文、地理學家南懷仁，都俾佢喺《天子屠龍》入面飾演埋，不過佢早已離開電視台，過多十幾年，呢類角色應該會由布偉傑取代。
表哥-張堅庭
講起表哥就會諗起張堅庭，呢樣嘢真係好難解釋，事關佢執導嘅《表姐，你好嘢！》系列入面，主角係表姐鄭裕玲，佢頂多只係表弟啫，不過當年電影以搞笑手法道出中港文化矛盾，就掀起一陣表姐熱潮，亦啟發佢開咗間食肆叫做「表哥茶餐廳」，有咩辦法唔記得佢就係表哥？
問米婆-陳立品
回望過去電視電影業，當有關靈界題材仲好蓬勃嘅時候，總有一啲搵靈媒跟先人溝通嘅劇情，而問米婆、靈媒、打小人嘅角色，基本上被「品姨」陳立品包攬，加上佢演技精湛，無論演慈祥嘅老婦，定係演刻薄嘅大嬸都冇難度，不過佢喺1990年病逝，隨住鬼片絕跡劇集，相信問米婆已後繼無人。
社團大佬-李家鼎
社團大佬定係窮兇極惡嘅歹徒，李家鼎「鼎爺」嗰副不怒而威嘅外表，加上開親口都中氣十足，行出嚟經已入型入格，不過唔好見佢個樣咁惡，其實好愛錫屋企人，佢曾經為咗養家，有主角唔做，轉行做武師，同樣又為咗養家，放棄參加奧運騎術比賽，呢啲就係真正嘅鐵漢柔情囉！
二世祖/惡少-張松枝
近年你可能會話係王浩信，不過穩坐呢個位嘅暫時仲係張松枝，事關佢自從喺九十年代一演《茶是故鄉濃》嘅榮耀祖，就奠定咗佢嘅惡少地位，往後每年梗有三、四套劇搵佢做惡少或者二世祖，可惜演技有，機會無，諗住轉去HKTV(王維基嗰間呀！)會有新發展，可惜唔獲發牌照，希望佢好快搵到新出路！
三姑六婆/麻雀腳-黃鳳瓊
做三姑六婆一啲都唔容易，例如講說話要好似惟恐天下不亂，故意講是非又要扮不經意，俾人踢爆又要扮唔好意思，黃鳳瓊就拿捏得非常好，未聽過佢個名？個樣就一定認得，電影《唐伯父點秋香》入面，佢就係周星馳芸芸極品妻子中，第一個出場搶銀両嗰個。
正所謂遲到好過無到，得到觀眾嘅肯定同支持先至最重要嘛！好似以下呢幾位演員咁，一直默默耕耘幾十年，由小生小花做到滿頭銀絲，演活過好多唔同嘅角色，係唔少觀眾嘅偶像，偏偏年過半百先至攞獎。呢個春天，的確嚟得遲咗啲。
盧海鵬 第三十一屆香港電影金像獎最佳男配角《奪命金》
獲獎年齡(70)
對於鵬哥嘅印象，好多人仲停留喺《幾許瘋語》、《蝦仔爹哋》同試咪，實際上佢演技一流，上年仲拎咗金像獎最佳男配角。由1974年參演TVB劇集開始，佢一直活躍於香港演藝圈，角色以諧角居多。努力咗38年，終於憑住《奪命金》扮演市儈放數佬而奪獎。
鮑起靜 第二十八屆香港電影金像獎最佳女主角《天水圍的日與夜》
獲獎年齡(60)
鮑姐雖然唔係有慣性收視嘅電視台演員，不過大家對佢嘅演出，相信一啲都唔陌生。好似當年令TVB受到收視威脅嘅《再見艷陽天》同《肥貓正傳》兩套劇，佢都擔演要角。通常演慈母角色嘅佢，喺《天水圍的日與夜》都唔例外，縱使無大型動作場面同精彩嘅CG畫面，不過就以溫馨細膩嘅感人嘅演出而深得觀眾歡心。
廖啟智 第二十八屆香港電影金像獎最佳男配角《証人》
獲獎年齡(55)
事隔16年再度奪得最佳男配角，絕對係對智叔嘅再次肯定。自從喺1993年憑《籠民》獲得最佳男配角後，一直留喺TVB拍劇，事業未見有大突破，最令人印象深刻可能係騎呢作《大冬瓜》。反而後來全身投入影圈，拍攝電影數量增加，戲份亦愈來愈重，仲多次獲提名角逐最佳男配角。
蘇杏璇 第三十一屆香港電影金像獎最佳女配角《奪命金》
獲獎年齡(61)
以往經常飾演母親角色嘅蘇杏璇，代表作有《新紮師兄》系列、《義不容情》及《壹號皇庭》，佢後來息影，多年後復出客串電影《奪命金》，立即勇奪最佳女配角，可惜當時佢臥病在床，唔能夠親身領獎，今年6月亦因病離世。
羅蘭 第十九屆香港電影金像獎最佳女主角《爆裂刑警》
獲獎年齡(66)
後生擅長演潑婦，後來變成「龍婆」代言人嘅羅蘭，年屆66歲高齡，憑《爆烈刑警》成為香港電影金像獎史上最年長嘅影后，得獎後佢喺訪問中講過：「但得夕陽無限好，何須惆悵近黃昏」，道出佢積極、樂觀嘅精神。
夏雨 2008年萬千星輝頒獎典禮最佳男主角獎《溏心風暴之家好月圓》
獲獎年齡(62)
當年《溏心風暴》再次掀起趕返屋企追劇嘅熱潮，造就一班資深演員出位機會，夏雨、李司棋、米雪及關菊英成為焦點，Summer Rain就更加擊敗一眾小生，奪得視帝名銜！一向飾演搞笑滑稽角色嘅佢，竟然打破電視台只捧小生花旦嘅慣例，都算突破。
邵音音 第27屆香港電影金像獎得獎最佳女配角《野．良犬》
獲獎年齡(63)
早年嘅性感女星，喺1978年憑《官人我要》參展康城影展，被外國傳媒讚美為China Doll，因翻譯成「中國娃娃」而被台灣政府誤認為間諜。直至2007年，演出電影《野．良犬》，飾演同孫仔相依為命嘅宏婆婆，獲頒最佳女配角獎。後來憑《打擂台》再下一城。
離開前,我們又看看資深演員郭鋒的專訪
郭鋒喺電視圈打滾咗42年，由剛出道擔正做主角，到後來變做配角，成為甘草演員，眼見TVB劇集質素下降，做到心灰意冷，於是離巢他投，點知HKTV又不獲政府發牌，搞到作品面世遙遙無期。不過對於佢嚟講，其實要求好簡單，只要有好劇本、好角色，俾佢過下戲癮，無論任何平台，佢都已經好滿足。
文：TheBe 圖：黃文山
睇自己
好多甘草演員，來來去去都係做某一類型嘅角色，結果被定型。郭鋒慶幸自己可塑性高，有能力飾演唔同性格同身份嘅角色，仲可以透過角色，深入認識自己，同時又令觀眾更認識愛演戲嘅郭鋒。
am=am77 郭=郭鋒
am：霍景良(創世紀角色)！喺我心目中，對你最有印象嘅角色，一定係奸到出汁又霸氣十足嘅有錢佬霍景良，呢套亦係我第一套認識你嘅劇集！你自己又點睇？
郭：哈哈哈(霍景良上身)，咁你都幾後生，嗰陣我同阿姐飾演一對，佢真係好有戲，同佢合作好有火花。當時成套劇嘅對白都好精警，劇本又好，每個角色都好立體，其他演員亦好有戲，迸發出好多火花。不過，如果由其他人演霍景良，可能仲做得好過我呢！功勞主要係個角色寫得夠好！
am：唔係喎！你真係演到霍景良嗰種又惡又奸！咁你演過咁多角色，有冇邊個你最難忘又最鍾意？
郭：其實每個角色我都好鍾意，好難揀喎……比較難忘嘅，當然係1976年喺麗的拍攝嘅《無語問蒼天》，因為呢套劇，我認識到太太歐陽佩珊，當時我擔正做男主角㗎！仲記得張瑛做我老竇，佢係一位好好嘅前輩，我喺佢身上學到好多嘢。仲有《智慧的燈》我都係做男主角，當時飾演一個染有性病嘅大學生，題材都幾大膽，當時社會都有唔同反應！《浪子》我嘅印象都好深刻，因為係我第一套拍嘅電視劇，第一次做男主角，擔大旗。不過好可惜，當年嘅底片大部分都冇晒，俾火燒晒。
am：出道嗰陣就擔正做男主角，但你近十幾年嘅角色大多數都係配角，甚至出場次數唔多，有冇唔開心呢？
郭：講真，唔會完全冇(唔開心)，由主角變做主角哥哥，到後來喺《誓不低頭》演大反派，再去到做人老竇，點都有啲心理關口要跨過。不過我好快就放低咗，有唔同角色、新嘗試其實都唔錯吖！最緊要我做得開心咪得囉！
am：戲份愈來愈少，會唔會覺得自己唔重要？
郭：雖然我只係一個甘草演員，不過我所演嘅角色都好重要㗎！因為我通常做「Keyman」嘅角色，喺劇情入面具關鍵作用，帶動劇情。
am：喺電視圈嘅發揮足唔足夠？
郭：其實我覺得自己都好幸運，冇被定型，演過好多唔同嘅角色，好似有錢佬、情緒激動嘅潮發記(情越雙白線)、惡霸周偉威(老友狗狗)等等，好多唔同性格、唔同背景嘅角色，我可以探索唔同人。好多角色都好有人性同人情味，可以反映社會現況嘅真實角色、小人物咁，發揮空間就更大。
睇行家
演出超過120個角色，合作過嘅演員多不勝數，見證過唔同電視台、唔同年代嘅變化，對於圈內，佢有自己一套睇法。出道時有一班電影出身、製作認真嘅前輩教路，自然對所有事更認真看待。佢知道，圈子入面，其實有好多臥虎藏龍嘅好演員，同樣等待一個發揮機會、等待大家嘅賞識。
am：你最想同邊位資深演員合作？
郭：好多都好想喎！好似同我同期、好friend底嘅程可為，仲有甘國亮同許紹雄(Benz雄)都好似未正式合作過。可惜好難夾到時間合作！
am：同你合作過嘅資深演員，邊位係你最欣賞，印象又比較難忘呢？
郭：張瑛、King Sir(鍾景輝)、馮淬帆等嘅前輩我都好欣賞！同佢哋合作好開心，好多前輩都係拍電影出身，嚟自邵氏同其他大型電影公司，以拍電影嘅認方式真製作，喺佢哋身上真係學到好多嘢！
am：你又欣賞邊位年輕一輩嘅演員？
郭：周家怡同郭卓樺都好好戲，我好欣賞佢哋！其實TVB本來有好多好叻、好出色嘅演員，好似郭卓樺咁，佢除咗係一個成日飾演惡霸嘅演員之外，仲係一個資深汽車特技駕駛員，以及英國皇家舞蹈教師協會嘅拉丁舞導師，好好叻仔㗎！我第一次見佢跳舞都覺得好驚喜，佢跳得好好，仲同陳曼娜一齊表演！我有提議過當年《舞動全城》搵佢拍㗎，不過佢哋(TVB)淨係捧啲一線小生花旦，冇辦法！
am：近幾年有趨勢由資深演員擔正劇集主角，例如米雪同夏雨，觀眾都好受落，你點睇？
郭：咁當然係好事啦！香港電視圈文化都好似好少由資深演員擔任要角，依家叫有番啲機會。你睇下年輕一輩，佢哋往往為咗形象，怕流失fans，限制咗自己嘅發展，唔肯去作出改變，將自己變到太商品化。林峯其實好好戲，係實力派演員，但同時又係偶像派，要保持靚仔形象，喺個框框入面，角色有所局限，發揮咪少咗囉！不妨俾多啲經驗豐富嘅資深演員，同啲小生花旦合作，大家磨合下，互相帶對方入戲、為劇集帶起高潮，相信會有好好嘅火花。
睇行業
離開是為了回來。多次離開再重返TVB，講到底，郭鋒都係樂於做好本份，落力演出，因為佢最愛始終都係做戲。上年佢再次離開TVB，但無封自己後路，從來冇講唔再返娘家，但眼見TVB製作質素下降，難免心灰意冷。有競爭先至有進步，如果只係一味認定觀眾慣性收看，又點會做出更有質素嘅節目？「我唔係話要講TVB有咩唔好，只係想提醒佢。」鋒哥苦口婆心咁話。
am：點解會離開TVB？
郭：自從佢哋2000年上市之後，行政有所改變，為嘅只係賺錢，走自己認為最賺到錢嘅模式。好似見到某啲題材好有noise，某啲演員拍嘅劇集好賣座，就一式一樣好似倒模咁製作。好多時開會講嘅劇本同真正拍攝時可以唔一樣，因為開拍嗰陣未必有完整劇本，只會一路拍一路「飛紙仔」。故事線已經偏離本身構思，走歪晒，為咗令捧緊上位嘅小生多啲戲份，咪改囉，甘草演員嘅戲份自然變少。製作變得好趕、好快。
am：情況有幾嚴重？
郭：試過有一次，打開個rundown睇，時間係00至35，即係凌晨12點開工，收工係後日朝11點！一日拍成三百幾個鏡頭，大家都會攰，為咗減低成本，製作自然變得粗疏，冇時間去double check布景，又要趕拍下一場，咪成日都有穿崩位囉！以前大家有時間慢慢研究，點樣令到場戲配合台前幕後，做到最好，認真先至專業，依家都冇時間俾大家去認真研究。講資源，其實TVB係好足夠，但因為太趕，幕後都有心無力，打燈、背景都轉唔切。好多嘢都係同一個模式，唔及以前有好好嘅劇本、好認真嘅製作、同台前幕後嘅火花少咗、滿足感又少咗，我都做到心灰意冷。
am：點解唔考慮下北上發展，搵真銀呀？
郭：其實keep住都有大陸劇組搵我上去拍劇，但當時同TVB有合約在身，佢哋唔肯放人，你知啦，一套劇需要咁多甘草，同期又要開好幾組劇，時間都夾唔到。返上去一拍就起碼兩星期，都冇時間走盞。講開收入，真係差好遠，好似二、三線演員喺香港拍一集，有三、四千已經叫好多；返上內地，拍一集可能已經有成三、四萬人民幣！不過，當然要承擔有機會俾製作人拖數嘅風險。但其實唔係搵幾多嘅問題，主要係睇個角色有冇戲做，劇本對我嚟講更加重要。
am：你點睇依家劇集經常有強姦、搵親生仔同不死身警察嘅情節？
郭：我覺得劇集係應該反映時代背景，電視劇好入屋，好易影響下一代，所以劇集要有社會承擔，要合情合理，風氣唔可以被敗壞。
後記：
由郭鋒、姜大偉、黎彼得、白彪同李楓一眾資深演員主演嘅《惡毒老人同盟》，內容講一班老人家仔大孫大，臨老俾人蝦嘅輕鬆小品，本應上個月底開拍，但礙於HKTV申請牌照落空，以致被迫停拍。一眾資深演員擔正做主角好夢落空，郭鋒坦言失望，原因唔單止係少咗個好劇本、好角色嘅發揮機會，更重要係對政府失去信心。對於前路，佢笑言自己已經係半退休狀態，只係追求工作上嘅滿足感，「一個演員嘅價值，絕對唔係用人工嚟衡量，因為我唔係明星，我係演員。」
