入行10年大創作 薛凱琪：學懂開心做人
2013/12/09 08:42:18 網誌分類: 生活
| 薛凱琪Fiona是我們的公主，人靚女又愛笑，跟她合作很開心，我發覺她做事認真執着，凡事力求完美，這是優點也是缺點，每當她徹夜失眠時，我便感心痛，縱使我曾下令不准她幹太多，但她總是堅持苦幹，為紀念入行10年，Fiona特意為新大碟《Tenacious》包辦曲詞製作，「我知好多人鍾意《周末畫布》和《諸葛亮》，但對我來說，無一首歌是sideplug，所以9首作品都會有MV，有些更是自己執導，封套都會有三、四款選擇！」Fiona笑言下周五（19日）的新碟迷你騷是明年紅館演唱會熱身，再一次祝福她，希望她能享受每一刻。 主持：黃柏高 統籌：林永匡 協力：彭燕燕 攝影：袁東亮 化妝：JessicaChan 髮型：Jo@SalonQueensPrivateI 場地提供：北京老家（電話：34622518） 記得對上一次訪問薛凱琪，她好像有點憂愁，後來經過年多的合作，我發覺她是太過用心工作，導致經常失眠，看到也心痛，「你唔好再睇我微博啦！我已盡力做令自己relax的事，但做完已天光！」 包辦全碟創作 在大家合作的過程裏，很開心，得知她為紀念入行10年出碟花盡心思，希望讓大家更透徹認識她，「入行10年，我覺得個天好錫我，每件事發生都有原因，簽新公司（太陽娛樂）得到很龐大的支持，今次好多瘋狂idea，因為我實在太興奮，10年的紀念，又好耐無出大碟，所以包辦前期後期的工作，沒有特別請形象設計師，全部造型自己搞，連道具都係同助手去買，因為有啲誇張造型需要試幾次，希望大家喜歡，這是我過去10年的總結，新碟會有三、四個不同封面，會造9首MV，因為對每個歌手而言，無一首歌係sideplug，個個都係仔女，無話鍾意邊個多啲，有Wyman和林若寧幫我填詞，自己亦有作曲填詞，如要我揀，我係唔會揀的，所以每首歌都會有個MV，《周末畫報》去了台灣拍攝，亦有三、四個MV是我自己做導演和形象，真的好攰，十年做一次是好的，我的經驗是，那件事唔辛苦你唔會記得，人只記得辛苦和痛苦，如這種苦令我開心，我是好願意去付出。」 愛情自白書 事實上，《諸葛亮》也是不錯的作品，我看到Fiona唱歌感覺愈來愈進步，能打動別人，曲色上仍有待進步，「雖然《周末畫報》好多人鍾意，但我亦好鍾意《諸葛亮》這首歌，想不到Wyman會覺得我是諸葛亮，這個軍師頭腦清晰，連皇帝想做咩都要問過佢，好清楚知道自己要甚麼和可以得到甚麼，Wyman說就算我多聰明，但去到愛情，所有聰明都幫唔到。剛派台的《宮若梅》由林若寧填詞，曲式凄美，是說一代宗師的愛情故事，如你愛一個人，你可跟他走在一起當然開心，但有時要看天時地利人和，可能我又愛你你又愛我，但你卻選擇不走在一起，可能是最好，因為你要付出的愛更多，這種愛最偉大，可能只要知道每年聖誕或生日，你是身體健康的，你活得開心的，我就好滿足。」能參與創作，Fiona把想說的，投放入歌詞裏，「《復原》是我送畀去了天堂的貓貓，叫牠不要驚，快啲走，我知牠一定黐實我，我唔想佢唔捨得走，這次我們搭造了一個人造雪景，要多謝幫手的朋友，真的很辛苦。」 不發放負能量 Fiona是永遠瞓唔着的人，她會朝着目標努力前進，但我想說，做人真的不用太執着，應要放鬆和開心，今日你滿足20萬人喜歡你，但其實你係要做200萬人，那是無止境的，「我係隻牛，只懂盡力做好本份，真心說，如果只得100人喜歡我，我無所謂，第一我做好自己本份，第二是我選擇唱的歌和拍的戲是憑良心去做，既可賺到錢養家又可做自己喜歡的事，畀好多正能量我的歌迷，入行10年，我學懂一件事，你唔可以要求全部人喜歡你，如要去強求，我自己會好辛苦，做人唔可以違背良心，唔可以太直接，以前我是有嗰句講嗰句的人，學懂這世上太多人做唔到自己想做的，有幾多歌手可以keep住每年出一張碟？我由一個健康的女仔，至有病，到康復，講真，你病了，觀眾和媒體可以唔理你，現在我會接所有戲，唱所有歌，堅持不花時間去做啲有負能量的事，所以我不會拍鬼片，太負能量的歌也不想造，唔係話這類別唔好聽，巿場上都有好多人做，我只想做開心的，學識有甚麼新聞關於我的，學識唔好睇文字，只睇相，靚就開心，不值得為任何新聞唔開心。下星期的音樂會，明年想去紅館開演唱會，希望是平時在紅館做不到的，比如一個舞台劇形象出現。」 黃柏高 |
 | |
 | |
| |
 | |
| |
 | |
 | |
| |
 | |
