如魚得水！

唱粵曲嘅人最開心係遇著一棚靚音樂，咁樣就唱得開心、玩音樂嘅又玩得開心！以前上大棚課，間中都會響老師嘅唱局度操曲；不過，果陣要返工，要請假先可以出席唱局，每次又祇可以唱一首(唔值得)，所以我極少出席。

響老師攪嘅唱局，理論上一定唱番老師教過嘅歌啦。因為老師鍾意改人曲，而佢同其他師父都玩慣左佢改左嘅譜，所以響佢個局操一般都好安全。不過，如果係唱錯左，你會見倒老師即時眉頭皺！呢啲係同學講俾我知嘅，因為我未試過囉。通常我唱，都祇係見倒老師眼都嗡埋、搖頭擺腦、一副「淋」樣咋，嘻嘻！

我有陣時都幾同情深圳曲社啲音樂師父架！上去操曲嘅八成係業餘嘅，唱錯係應份嘅----唔係駛咩俾錢操啫！但係遇著啲拍子又唔啱、唱到走晒音、拉埋啲唔知咩嘢腔嘅，要拍和呢啲人先更高難度----唔係咩？佢時快時慢，跟得多、久而久知，唔知會唔會連自己節拍都差埋！但係音樂師父又要盡可能做到唱錯左果位仁兄、仁姐唱完都沾沾自喜，唔覺得自己錯喎，你話幾高難度吖？

上月某位曲友攪嘅唱局，主要係因為佢另一位我唔識嘅曲友想同佢出騷唱「水漫金山」，叫左佢好多次，佢咪建議上深圳操吓首歌先囉！果日我唱完要趕返香港、佢果位曲友又遲嚟，佢嚟果陣我唱緊歌，唱完出嚟打個招呼我便走，聽唔倒佢地唱。

隔幾日，曲友whatsapp我，佢話聽番同果位曲友操首歌(雙子歌)，認為兩人聲線太相似，聽眾聽唔出！佢建議對方搵我出騷。

我whatsapp佢：「咁大整古？」

曲友：「唔係整古。你試同佢操吓吖！我講左你唔介意出會堂騷架，你俾電話約佢吖。」

我：「我唔係介意響咩嘢地方出騷(企街都冇問題---祇要係合法同埋安全)，但係我最介意係啲音樂唔得！響會堂唱，一般唔會捨得花錢請好嘅音樂師父，掌板又要炒三味(一個人負責幾廿樣嘢)，跟本唔適合唱大鑼大鼓、好似「水漫金山」呢類歌！我地上次開個群組咪有我個電話囉，佢搵我先至算啦！」

可能曲友講左俾果位曲友知我嘅意思，所以佢後來都冇搵我。