成語雜談_合訂2

7.最難消受美人恩! 呢七個字流傳已久, 相信人人都耳熟能詳! 坊間流傳以來, 對佢既認受性置於極高評價. 當然既事呢! 試想想, 有邊個能夠承受到異性投以推心置腹既愛? 有邊個能報答得了情義雙全既捨命維護? 要知道好難令絕色絕代美人青眼有加! 所以, 唯恐承受在前辜負在後; 更怕終身難成大器至令報答無從!!

不過, 此美人既唯一解釋是用在女性身上? 深入研究一下, 看似未必盡然! 美人兩字泛指女性係不爭既事實; 但美人既美字不一定單指女性. 當有人處事存心公正; 磊落光明; 不畏強權; 不欺弱小; 外無愧天地鬼神; 內無負祖宗父母! 以純真純善純美既心待人處事接物; 不求回報, 只知耕耘, 咁樣能當得上美人兩字!

8.新曆年一月一日起至十二月三十一日, 有好多節日, 既係假期, 又係同家人團圓既日子. 農曆正月初一日至年底, 同樣有好多節日可以歡渡, 名為過節! 不過, 有甲乙兩丁友反目成仇, 互不瞅睬; 老死不相往還, 呢種又係叫做過節! 同係兩字名詞, 出黎既關係掙咁遠!? 前面既開開心心走埋一齊; 後面攪到十足水溝油!

其實, 企係修養立場, 要將呢兩個字拆開! 過係指凡事過唔過到自己良心一關? 過到就做; 過唔到就唔好做, 免得過終身後悔! 節係指調節! 用[竹]既正直黎改[即]時唔好既念頭同行為! 節都有調校既意思! 所以, 我地一生人每日二十四小時, 唔好懵下懵下烚下烚下至得! 每個想法[過]唔到良心, 就要竹直黎調[節]!

9.人人都有對手! 除了是天生殘疾; 或後天因病患或意外而喪失一隻甚至一對手之外, 其他康健人士確實真有一對手! 呢一對手可善可惡; 有塑造性亦有毀滅性; 能救人亦能殺人. 以上一半一半既情形, 要睇雙手既主人係持著點樣既心態來使用佢地! 要知道, 手跟其他可資運用物件一樣, 本身並無善惡, 但求用者存心.

人人都有對手! 不論係高手低手; 天才庸才; 聰穎人或愚鈍人! 有高過自己既; 有低過自己既. 高過自己會招來自我既妒忌心; 低過自己既同樣招來狂傲心. 前者存殺機毀滅性; 後者存輕視睇唔起! 當對手出現時, 內心第一時間計算得失利害, 或從未有存過尊重對手既心. 所以, 真正對手是內心世界不易覺知既黑暗面.

0.勾引呢兩個字, 未讀過書既人, 都有機會碰上! 唔係比人勾引, 就係自己勾引人地! 講實在既一句, 牛唔飲水, 任你點用力, 佢都唔會低頭! 所以話, 東窗事發既時候, 人係危急關頭, 為求自保, 就會彈出呢兩個字, 證明係身不由己, 全部都係某人勾引. [早知後果嚴重, 批我個頭都唔咁做]諸如此類既卸膊卸責行為.

其實, 成件事不在於結局係點, 亦唔需要太介意個過程係點樣發生; 最重要既係開始既時候, 點解會咁易比人勾引! 如果身冇屎, 就唔會發臭. 比人容易勾引, 最大可能係自己既思想唔正直, 而係孿曲! 就因為孿曲, 形狀成個勾, 自然比人一勾, 咁就搭上線路, 自然會同流合污; 自然連祖宗老豆老母姓咩野都唔記得.

11.[患難見真情]! 講得好聽! 真係講得好好聽! 依程度而言, 有親既或者仲可以共下患難; 冇親既都唔該借歪唔好阻住地球轉! 更何況, 有親既千祈唔好有份分身家, 否則一面兩行眼淚, 內心寸土必爭咁激死親人, 何必做到咁假? 難在只得親人揸權揸勢而自己冇得揸? 咁既患難法, 你患埋我個一份都得啦! 同錢有仇咩?

真正能夠患難既人, 係同心同德既人; 係實踐中庸不偏不倚既人! 睇下個[患]字點樣寫? 係兩個中疊埋一齊同處心上! 即係話兩個人既心目中只有正直; 只有仁恕; 只有包容; 只有厚道. 待人處事無愧自己個良心, 兩個同姓或不同姓或有親或冇親既人先至可以一條心; 先至可以唔受唆擺; 先至可以唔受誘惑出賣自己.