水浸眼眉無知覺

無知又無覺

存心想發作

聖旨一頒下

到處人頭落 

日前歸本法護法慧豬師太在午睡時、忽然發開口夢揭露施威開罪地膽霸權以致處處受制之後、一眾地膽個個被氣得暴跳如雷、除了怒斥慧豬師太假借夢話妖言惑眾之外、並派遣四口幫主在公仔箱之前當眾兜口兜面的再狠狠的摑施威一巴、看看誰再敢胡言亂語。呢嗱、咁又確實好難怪人家激氣嘅。事關城中時常有謠言指地膽霸權與講嬰娛業夾手夾腳把督爺當木頭公仔咁舞、搞到人人仇官、個個仇富、無日安寧。最豈有此理嘅就係、所有傳聞都只是口講口賠、根本無真凭實句、但偏偏有人信到十足十吖嘛！難怪人家反指施威之所以辦事不力、係佢自己是非太多、唔好賴人啦！ 

回想當日樓王發在行企會狂呻、本城只有官不聊生、而無民不聊生。當時聽起來確實十分哽耳、但從近年社會大氣候變化看來樓老所言亦有其道理。例如當年老董搞八問五明明是益街坊之舉、但結果是好心遇雷劈、搞到他忽然腳痛跌鬼咗落台。和曾煞停公賣屋計劃、擺明是劫貧濟富架啦、但他偏偏可以嘆盡海陸空、甚至連綠林道上朋友在馬埠開派對都要預他夫婦一份。反之、施威一上台便向地霸狂噴雙辣椒噴霧、向奶霸下制奶令、搞到班友仔個個喊咁口、但班窮街坊不特止不領情、而且還要日日對着他喊打喊殺。如果你問我點解事情會有咁嘅發展、那就真係考起喇！ 

目前城民面對嘅問題並非別的、而是自己想點？當年有人認為寧願同隻豬結婚都唔肯嫁畀隻狼、理由是豬雖然蠢、但勝在性格夠溫馴容易操控、然而狼卻是天生野性難馴、更可怕的就是據說他的底色竟然是紅色的。由此可見人們寧願食貴米也不肯被染紅。這足以證明、無論在洗腦或在攻心兩方面而言、阿爺都不及對手。有人話由於寶島尚未回歸、故阿爺絕不敢對紫荊城來強。不過在下卻有點想不通、到底何爺幾時講過、一定要在你情我願之下才會拿回寶島的呢？