知其一不知其二_續

有人問咩野叫做[知其一不知其二]?! 無他; 一是數之基石, 萬有從一開始! 一之極數為九, 九之極數為八十一, 所以成語有[始終如一]! 係象界裡面, 一係絕對, 二係相對; 所以成語有[獨一無二]! 從機會分析, 一係奇數; 二係偶數, 所以成語有[無獨有偶]! 將一既頭尾連接而成圈[O], 從中間一刀兩段, 拉直而成二!

所以佛家講[二由有一], 就係咁既道理! 從說文解字去睇, 二字上短下長, 即係個上字; 二字上長下短, 即係個下字! 二有上下之分, 即有尊卑之別. 可以當天地去睇, 可以當陰陽去睇; 可以當日月去睇; 可以當父母去睇; 可以當男女去睇! 所以, 一係絕對, 二係相對. 既然相對, 即係對立! 何況二可以解釋為異變!

二其實係由兩個一組成! 所謂物極必反, 所以生出異端異變種種難以預算既情形! 二之上一為天; 下一為地; 中間為陰陽交感而成氣, 故能孕育萬物. 所有萬物一係負陰抱陽; 一係負陽抱陰! 人生於大陰陽之間; 身體亦成為小陰陽既共同體. 所以異字係[共][田]既合成字! 異既字義解作變化; 但係共田卻解作不變!

變與不變集於一身, 即係一同二亦都集於一身! 從儒家角度, 一係天性; 二係行為! 天性原屬於抽象物, 無形無狀, 睇唔見, 摸唔到; 難以形容. 當天性藉住行為表露喜怒哀樂, 言行舉止等等動作既時候, 就會有人際間交流; 情感交流; 學術交流; 文化交流! 或從佛家角度; 一係佛性; 二係肉身; 無一(即係冇咗靈性)就可以死得!

(12年4月稿)