番禺爆笑兩天遊（下）

星期日，六人之中居然是我最早起。

與老婆買完涼茶，吃完麥記早餐，才施施然的回酒店。大夥兒到一間西餐廳吃「早午合併餐」，我叫了一個70元的set lunch，包括：兩塊午餐肉般大和厚的鵝肝醬！！雖然有點over，但仍然極之Juicy的牛扒！！好濃縮的忌廉磨菇湯！！OK但蛋糕底略嫌太厚的士多啤梨慕絲蛋糕！！挺不錯的一杯咖啡～～以上種種加起來，如果是在香港高級餐廳吃，隨時要一千元，而現在盛惠$70！！而且質素還很不錯呢！！！其他人的食物都挺好，意粉口感拿捏得極佳，老婆讚不絕口。海南雞亦有不俗水準。

怎料，跟我叫了一樣套餐的Maggie，竟接受不了鵝肝醬的味，Fanny、Ili、臭虹也吃不慣；老婆不願一大早吃得太heavy；我又已吃了自己的兩塊鵝肝醬。於是，兩塊恍如午餐肉般大的鵝肝醬，就這樣被丟在碟上了，真折墮呀！

吃完飯，再買多一次涼茶，就去按摩了。大家早就說過要在這天按摩，以紓緩星期六去上水樂園玩樂後的疲勞。但，我們六人包括中山人Maggie都是初來番禺，人生路不熟，見到一家在商業大廈裏的按摩店，$98雙鐘，OK啦，就興高采烈的上去了。

在深圳，我是地膽，哪些骨場「可以去」，哪些「不可以去」，我都知之八九；但番禺……

沒錯，一時大意之下，我們領野了……

首先，電梯一打開，知客即叫道：「歡迎幾位老細」須知道，「老細」二字，在深圳正場多是去到Locker位才聽到的，很少會有知客叫「老細」。不過，各處鄉村各處例，話唔定番禺係咁呢……

邪場confirm度：5%

在大堂坐下，四周掛了幾幅油畫，懶藝術有野睇，被淫審處評為「二級不雅」那種呢～～

邪場confirm度：20%

我問個知客：「你地呢度有冇女賓部架？」「有……男賓部在這邊，女賓部……等等……」

邪場confirm度：90%！！！！！！！！

我跟旁邊的Ili說：「呢度好似邪邪地喎」
Ili：「你都覺呀？我都覺呀！」
我又跟老婆說，天真的老婆話：「應該唔係卦……」唔．係．卦？90個%喇唔係卦！
旁邊的Maggie謂：「唏～個個場都有正有邪架啦，睇你幫襯邊種唧～」此言差矣……確實有很多100%清純的正場的。

有個女主任傻傻戇戇咁走出來，又白白痴痴咁走番入去，話要搵經理來。隔了一會，經理來到了……

邪場confirm度：200%！！！！！！！！！！！！

一個阿叔，
一個比詹瑞文更詹瑞文的阿叔，
一個有二撇雞的阿叔，
一個二撇雞得黎仲要著「夏老威」的阿叔！

頂！你個額頭真係鑿住「爸爸生」三隻字呀～～～～～～

呢個時候，照計就應該起身走人至係。查實，只要班女仔是但一個話想走，我就會即刻起身。不過……當時的情形，係咁：

Maggie完全唔care

臭虹好high，成日催人快D

Fanny直頭躍躍欲試，一野除甩件衫就要按咁款

老婆 & Ili雖然聽到我話呢度係邪野，但都冇話要走。

而我……喂，拖男帶女去邪骨場按正骨喎，咁抵死既經歷，真係可一不可再架嘛～

至於個夏老威二撇雞爸爸生，無他既，想做多D生意咁解唧。

於是，「男男女女齊齊去邪骨場按正骨」如此神奇的事情，就這樣發生了。

我跟「爸爸生」說：按摩技師呢，要手勢好既（潛台詞：唔使靚同身材好架喇），仲有，我同我老婆一間房做按摩（潛台詞：清純呀，明啦？）

Maggie都不忘加多句：「佢地註冊左結婚架嘛，冇問題喎。」醒目！咁又係呀，「夫妻」都有分「註冊左」同「唔使註冊」兩款架嘛！

一如正常按摩，首先我去到更衣室，放好東西，洗澡，出到休息區，飲杯水等她們。我一再叮囑「爸爸生」，待女士們換好衣服後就帶她們來休息區join埋我。

這時，一個都算係幾靚仔的主任走過來。
靚仔主任：「老細你想按邊種骨呢？」哈哈，呢句真係正！邊種骨~~
我：「有冇泰式？」呢句擺明寸佢架啦！
靚仔主任：「我地呢度得中式同日式推油，其實乜野中式泰式，『名』黎既唧。」嘩！你咁都得？
我：「咁我做中式得啦。」
靚仔主任：「點解唔做日式呀，日式舒服好多喎……」（以下下刪一大輪對話，總之就係不停游說我做推油，而我就堅持做中式。）
靚仔主任：「咁，又或者你講低你有乜野要求，例如係要邊種『性格』既『靚女』，等你『下次黎』既時候，我地可以配合你。」
我：「唔使喇唔使喇，按左今次先啦。」超，你估我下次仲會黎？

等左一陣，女士們換好晒衫沖好涼出黎。我同老婆八卦了一下，得知以下要點：

要點一：五個女仔被人帶左去一間「導師教授室」，內裏附設廁所浴室，五個女仔輪流沖涼。
要點二：冇Locker，所有野就放在那間房裏。
要點三：女仔所換的衣服，跟我穿的一模一樣，都是男裝。

明白晒……

呢個「爸爸生」果然犀利！為左要做成呢一單生意，居然可以在咁短既時間之內，咁有限既條件底下，無中生有咁「生」左一個女賓部出黎！Bravo！

跟住就係去按摩啦。我同老婆一間房按（就係果間「導師教授室」），其餘四個女仔就去第二間房按。但原來五個女仔都不堪游說，全部都做推油！

唉……呢D場，$98雙鐘按摩就係呃你上黎既promo唧，真正賺錢當然係靠「特別服務」啦。而今次佢冇得提供特別服務，自然就會推銷其他野，let's say百幾蚊既推油，總之就唔會畀你$98埋單落樓咁解唧。呢班女人平時shopping格價鬼咁醒，反而呢D婆仔數都唔識計……

好喇，萬眾期待，按摩師登場～～

ha~le lu ya~~
ha~le lu ya~~~
ha le lu ya~ha le lu ya~
hale~~luya~~

神之山谷出現！！！！！

超級大Deep V！！！！

嘩，呢兩位小姐，你地有冇咁X誇張呀！！！！！！！！～～～～～

大到好似假既咁喎！！！！

我老婆都睇到唔識眨眼，事後佢話：嘩，真係好勁抽！

好，發完顛，平靜下情緒，繼續講……

咁冇乜野既，咪就係按摩咯，講真，按我果位姐姐，真係按得幾好喎，唔會差得過正場既按摩師，認穴準，手力夠，推拿技巧不俗，真係按得幾舒服，繃緊了的肌肉都得到紓緩，特別是背脊和肩膊，完全鬆晒。

但選擇推油的五位女士們就各安天命了……

老婆：佢擺明唔識推油架喇，只識得按摩，都算佢有良心，一路推油一路按摩，五分一推油，五分四按摩，都舒服既。

臭虹：按得我好好喎，好舒服喎（又話推油既……原來又係「按」）

Maggie：幾好咁啦

Fanny：班女就真係堅咯，件衫跟本就係舞女衫，Deep V到呢（喂，你咪掛住望女先得架，推油推成點呀？又唔講！）

Ili：慘……好慘……佢唔識推油，又大力，係咁捽係咁捽，仲用成五條毛巾黎捽，度度都唔捽剩係捽背脊捽左粒幾鐘，皮都俾佢捽甩咁滯，好痛……我幾想同佢講：你咪再捽喇，夠喇～（咁你又唔講）我唔好意思講嘛……

按完摩，我去大堂等她們。這時見到有個女人獨個兒上來，爸爸生同佢講：「我地女賓部而家full左，但佢地換緊衫架喇，換完就到你呀下～」喂，咁好生意，索性真係做正場罷啦～～

等了一會，就聽到Maggie嘈喧巴閉的出來，這時她已跟爸爸生混得很熟（真不愧是Maggie），還硬要爸爸生送我們六盅湯，喝完才肯走，我都俾佢吹脹～～沒記錯好像是竹絲雞湯同秀珍菇湯，聽講話幾好飲添喎…我？車，我都唔飲中湯既～

按摩後回祈福乘直通巴，第一次經文錦渡過關，也因此錯過了買免稅煙的機會。一路無話，去到沙田吃完晚飯，各自歸家去也。