溫故知新(下)

成日數人地，因咩鬼唔數吓自己啫？我份人比較禮讓，尋日講完人地，今日要數臭自己！

一些出過騷的歌，當年覺得自己唱得唔錯架啦(梗係咁講啦！如果出騷果陣都唱得唔好，點對得自己住)，但係依家聽番，真係有好多進步空間架。咁因何當時唔練好啲至唱？答案好簡單啫：當時嘅功力祇可以唱倒咁！

幾年後，對樂理知識多左，聲線改善左，對自己要求高左....

所以，好希望有機會再重唱曾經出過騷嘅歌(甚至再出騷)，睇吓再唱會點？祇可惜，搵拍檔難：一係唔識、一係識都唔想唱----嫌呢啲歌太舊！

有些時我啱啱學識一首歌，明知某曲友識唱，但係對方答案係：呢首歌佢十幾年前唱過！

咁又如何？係咪經已唱到無懈可擊先？即使係大老倌唱嘅歌，十年後如果佢再唱都唔會一樣：以前唱錯左音嘅字可能改正番、以前唱嘅腔可能依家知道用另一個唱腔會更合曲情、唱歌嘅拍檔唔同都會有唔同火花...當然，我假設事隔十年果位唱開子喉嘅老倌仲未駛改唱平喉、甚至子母喉...

又要假設，果位老倌係一位不斷求進步嘅人。君不見依家好多老倌唱歌，越嚟越行貨，回塘啦！我都係最近睇番亞視「歲月留聲」個節目先知某位大老倌當年唱歌咁有水準！依家見佢？幾熟嘅曲都會甩曲、行台步又錫身...

咦！衰左啦---又數人！