屈臣氏、萬寧、藥房

尋日起身，無情情自己眼角撞左落門邊，痛當然有痛，但係又唔見有瘀，因此冇理佢。

今朝起身洗面時，觸及眼角發覺仍然是有少少痛。因為過幾日出騷，最擔心係過幾日啲瘀先浮出嚟，雖然橫睇掂睇我都唔係樣靚之人，不過都唔希望瘀左一撻見人吖！

心諗：一於買枝「喜療妥」用吓啦！

早前保險公司寄左張五十蚊萬寧禮劵俾我，今早去巡一巡，見細嘅賣$42, 大嘅賣$97, 仲標明係特價。

心中有數，食完早餐再去佢隔離間唔相熟嘅藥房問，大嘅標價$80，老板仲自動打個九折俾我，即係$72買左。

所以，如果買一些藥房有得賣嘅嘢，最好真係格吓價---一枝藥膏差廿幾蚊，夠煮個餸囉！當然，呢啲嘢係我呢啲窮家小女人做嘅，富貴人家就可以不理啦！

每次我姪女來港，好多時都會去屈臣氏買嘢。我問佢：「萬寧比較近，何必要捨近求遠？」

佢答：「因為萬寧啲擺設企理啲，感覺上啲嘢會貴啲！」(心諗：歪理！以前「卓越俾我嘅感覺都係擺放到亂七八糟，那時我幾乎入都唔入佢啲鋪；佢依家俾人嘅感覺係好乾淨嘅、再加埋係響我屋企附近，所以我經常會入去光顧)

實際上，同一樣貨品，屈臣氏與萬寧響價錢基本上一樣----可能佢地有人經常檢查住對手嘅訂價掛！

依家網上經常有人利用Whatsapp發放一些虛假消息以打擊商業對手，又真係有人信而將呢啲未經證實嘅消息亂傳，引起公眾恐慌。尋日又收倒一單傳左幾年嘅嘢，有朋友感嘆寫左句：「傳左兩年，咁都還有人信！」

原本我睇完都算，結果都係忍唔住答左句：「因為未遇倒智者，因為天下未亂！」