娛己娛人

2014/03/03 13:51:42 網誌分類: 粵曲理論
03 Mar

唱歌原本係用嚟娛己娛人嘅,但係如果唱得唔好,仲要公開演唱,就變成娛己「愚人」啦,呢句說話係我其中一位老師講嘅!

 

呢位老師份人都好執著:佢堅持學生唔准稱佢做「師父」,佢係老師就係老師,唔係師父----我之前都有講過「老師」同「師父」嘅分別。祇不過,坊間教唱粵曲嘅老師,又好鍾意學生稱佢做「師父」,感覺上好似高人一等咁!

 

以前學戲(當然包埋學唱啦)的人通常都會拜師學藝----真係要做足拜師儀式架!師父照計要傾囊相授,你學唔倒係你嘅問題。學成下山就靠所學嘅嘢搵食啦!日後生活有著落都係靠之前學得嚟嘅嘢。有權利、梗係有義務啦---義務可能係要負責師父嘅生養死葬、最緊要係佢在生時聽教聽話----佢講東你唔准講西(即使你心裡面唔認同)

 

最近有件事發生響曲友身上,令我覺得依家嘅老師、可能因為啲學生稱佢做師父,佢就真係當正自己係師父囉!竟然因為其中一位學生年晚唱局後叫左好多曲友去宵夜、而冇叫佢最愛錫果位曲友、而遷怒於呢位召集人,要佢從今消失,唔好響佢度學嘢咁話(即捕即解)

 

我冇份參與果個活動,事後聽番都覺得奇怪;如果果位學生響出面有啲咩嘢言行影響倒曲社聲譽嘅、咁做都無可厚非,但係事件可說是私事一宗,真係關卿底事咩?

 

講番正題。一般業餘嘅唱家,我地實在唔應該對佢地有太大要求,但係企得出嚟、起馬都要做到啱板啱拍(當然,有陣時在台上受到其他影響而差左少少(顧住擺甫士俾人影相就唔抵可憐),不應深究);因為現今業餘唱家要公開演唱,係要「買唱」---即係要俾錢先有得唱!至於俾幾多?視乎你參與果場個主辦機構屬咩嘢團體、食水幾深囉!如果你要搵老倌同你唱嘅、當然要俾埋佢果份錢兼夾要俾「介口」(老倌酬金。幾多因人而異,通常幾千至幾萬);而且老倌唔會再花時間同你操曲,即使肯操,你都要俾埋佢果份操曲錢加埋利事(冇利事邊鬼個肯花時間陪你?係你要操啫、又唔係佢)。

 

間中我去睇「騷」都見倒一啲演唱者其實唱得唔錯嘅,錯就錯在揀錯左歌出騷。即使係大老倌、都唔係首首歌都啱佢唱;當然,如果係業餘唱家請佢唱,梗係俾錢果個話事唱咩嘢歌啦!業餘唱家祇要有一定基本功,而又揀自己啱唱嘅歌,便可以將自己嘅優點發揮,達到娛人娛己的作用;反之便變成自暴其醜,娛己愚人。

回應 (10)
我要發表
2014/03/04 23:24:14 回覆

我以為今日係五號呀!哈哈

2014/03/04 17:16:47 回覆

多謝各位網友!其實係聽日至真。 {#icono0_3}

2014/03/04 13:52:08 回覆

1生日快樂!

2014/03/04 12:48:44 回覆

原來Van今天生日,Happy Birthday!

{#.jpg}

2014/03/04 11:23:10 回覆

祝生日快樂,青春長駐. {#icono0_51}

2014/03/04 10:56:03 回覆

嘩!阿仔:你想謀殺阿媽呀,咁大個蛋糕!

2014/03/04 10:26:21 回覆

{#201203020715146800_600w.jpg}

2014/03/04 10:23:18 回覆

祝你生日快樂,歌聲響亮!

2014/03/03 17:50:38 回覆

知己知彼,祇要拍子準,揀自己啱唱嘅歌,便可以避重就輕!如果連拍子節奏都唔啱嘅,就留番嚟自娛好啦!

2014/03/03 17:21:04 回覆

自知功力唔夠,所以唔想愚人。

老師最好不要插手的私事,同學間不一定要成好友!人結人緣!

user