牛一

尋日小妹牛一，多謝各國網友祝賀；其實我一向為人低調----過年如過日，過生日更加係不值一提！

尋日中學書友仔每月聚會。我地慣常係今日聚會完左、便夾下次聚會日期，上次左度又度，最終揀左尋日，我先至係咁倚講：果日我生日喎！

平時我地多數係下午開始竹戰，晚飯在會所食。上次其中一位書友仔話佢「金域假日酒店」個會藉三月尾到期，食嘢有七折，建議我地響果度食晏(食晏便宜過食晚飯吖馬)，商量後我地決定幫趁果度間意大利餐廳O'steria，因為我喜歡佢地果種半自助餐----頭盤沙律、凍肉任食，主菜、甜品任食、咖啡/茶。我早兩三年前響舊網誌都有介紹過響灣仔世紀酒店果間Pepino，午餐都係食類似嘅嘢，我最鍾意食佢地嘅生牛肉、火箭菜同煙三文魚；不過，果度都有三年冇去過，唔知依家質素如何！

尋日見呢間冇生牛肉，都有啲失望，好彩煙三文魚都幾好食、火箭菜唔夠新鮮。呢度有個好處係可以淨係order食頭盤，雖然祇係較成個餐便宜四十蚊，但係反正食唔倒咁多，我地七個人祇要左四份全餐，另外祇食頭盆，經已飽到連晚飯都食唔落！

食完午飯，成班人落酒店地下間法國餐廳買麵包。跟住步行去會所開檯，我份人貫徹始終，冇橫財命---又輸左廿幾萬！隔離檯低B班書友仔問我：「今日戰況如何？」

我：「你睇我個輸樣(唔好讀錯音呀)就知啦！」

四點幾，開生日會。嘩！心型嘅生日蛋糕呀：

好大......個呀！

吹完蠟燭，我最老友果位書友仔好似有啲唔開心！我問：「咩嘢事？」

書友仔：「我都係呢個月生日。」

其他書友仔：「何解上次唔講？」

我：「哦！佢上次早走，我地約日子果陣佢唔響度。其後係我whatsapp通知佢時間嘅，我梗係唔會同佢講我尋日生日啦！」

另一位書友仔：「咁不如我地以後同一月份生日嘅一齊慶祝啦！」

跟住咪各自報上自己嘅生日月份囉！雖然果位書友仔同我同月生日，尋日先知佢大我足足一年----我都話我中學畢業果陣未夠秤架啦，大機構唔請我做嘢呀！係我阿媽嚇我：再搵唔倒嘢做、去工廠做！

最後我咪搵荐人館幫我搵份工做囉！頭一個月啲人工要俾佢地做介紹費架！