沙膽Van

以前每次出「騷」，當揀定左歌之後，便不斷重覆操住同一首歌。由於一般接左個「騷」至正式演出日期，通常都有四至六個月時間(社區會堂嘅場又唔同)，因此，每首要演出嘅歌操練次數冇三十次、都有廿次！故此，每次出完「騷」，跟住果幾年都唔會再操果首歌------因為操到怕左！

依家越嚟越懶啦！上次出騷果首歌，演出果次係第六次唱。一來時間唔多、二來果首係較舒情嘅歌，平子喉基本上一人唱一段，成首歌冇咩接駁位，所以即使唔埋音樂、自己響屋企唱熟佢都得-----再加上果首歌又短，所以唔難囉！不過，我位拍檔都搵同學幫佢操左十幾次。

六月果個「騷」，知道果陣都得兩個半月時間，再加上主辦機構期後想我唱多首，自己計來計去，先前決定左唱果首歌到演出係第七次唱、另一首因為要四月初(離演出之期冇兩個月)才可以決定，最多都祇係操倒兩次，計埋月前操过兩次、第五次便台上見。

呢兩首歌識是識唱，但因為我唱歌都幾濫，唔會專一咁唱住幾首歌(或者集中唱某幾個老倌唱嘅歌；)咪出現支支識、支支KICK嘅情況囉！一首歌最少都要響短期內唱倒三次先至叫做熟啲。今次阿仔抱恙，個唱開唔成，我又少左一次操曲機會，到時真係要打天才波至得！