Le Menu自助餐

三月生日月份仲有幾日就結束，下個月開始真係要認真節制吓食量，否則六月場「騷」件戰衣分分鐘著唔入！

呢一個月內食兩次自助餐，平時兩年都食唔倒一次！前日私人機構幾位舊同事約我過灣仔食晏，因為遷就我下個約會地點，揀左響W Square間「阿里郎韓國餐廳」，佢地由公司行去都要行十條八條街，可惜係果度嘅食物係我食過咁多間韓國餐廳最差果間---唔係一人意見架，係四個人一致公認：食物全無味度！連我一向最欣賞嘅頭盆菜都冇一碟見得人(八碟：大豆芽、綠豆芽、薯仔、豆腐、酸青瓜、泡菜、有啲唔知係咩！總之慣常食開嘅銀魚仔、豆腐卜同韓國炒粉絲都冇)，淨係白水灼熟便上檯，無味、無油...雖然我食得都算淡，但係我叫果碗牛肋骨湯、啲湯都係好似淡鹽水咁嘅味(牛肉味？欠奉)；我唔食泡菜，同事食完嘅意見係：得個酸字。我地三個另每人叫左杯凍紅棗茶，又係淡到不得了！無叫飲品果位同事問：「係咪因為啲雪溶左溝淡左呀？」

我：「梗係唔係，我一嚟就飲左啖先，唔出聲等你地飲完先俾意見咋！」

果餐晏平均每人$105，絕對唔值、一次過，以後冇交易！反而洛克道果間「新高麗苑」中午啲餐又平又靚----我唔知依家幾錢，年多前應該係$45左右，依家最多咪$50！但係佢啲前菜整得好好食，我食完前菜都好滿足！

尋晚公務員幾位舊同事約左響六國酒店西餐廳Le Menu食自助餐。我未去過，以前我去六國都係去粵軒食中菜。我問住響果區位同事，點解揀呢間？佢答：「抵食囉！一口價$280。」以晚餐嚟計，真係便宜----而且食自助餐對我嚟講，祇要有幾樣啱我食就OK架啦，又唔食得好多！

食後評：佢提供嘅食物冇月初響尖東間「海景嘉福酒店」多---冇即開生蠔、冇鮮青蠔、龍蝦仔..但係上次響果度食嘅海產，總之係響海度攞上嚟嘅都係咸到不得了！當時我問：「係咪響死海度攞上嚟架？」

而且，果次除起上嚟都要每位$500(我師父經已係會員)。兩者揀其一，我寧願嚟Le Menu-----剌身夠新鮮、亦有燒牛肉、瑞士雞翼、白切雞、炒飯、炸排骨、....羊架整得好食、最得意係甜品可以自制「窩夫」、仲有häagen-dazs雪糕！對我嚟講，有幾樣我鍾意食嘅嘢經已冇問題，反正都食唔得太多，梗係在乎食精啲啦！

尋晚侍應仲話每位送杯飲品，可以揀紅酒、白酒或者汽水。雖然啲酒得一pat倒，都算有啲誠意吖！佢地另有橙汁、雜果賓治、蜜桃茶同蒸餾水任飲，我飲左蜜桃茶，偏淡！不過好過飲蒸餾水吖。

最滿意係個中湯「蟲草花煲排骨」。我地四個都覺得好好味，蟲草花又多！我叫佢地用蟲草花代替金針蒸雞，因為大家都覺得蟲草花好食過金針！

下個月開始逢星期二自助餐時間仲加插魔術表演添！

不足之處，坐位排得頗迫！