NO OT CULTURE IN MY TEAM

大家有無試過收唔到工，仲要比老闆反問：「點解大家重唔收工呀？」

六點三走出房間，眼見全公司所有的同事，都差不多收晒工，我心入面大叫一聲，good job，因為我最怕我的員工，有OT既習慣。

回想當年，我還是一個小小的Assistant Manager，我是過著只有返工，沒有收工的日子，不單是我，而是整條line，凶手是誰，正是李老闆。

老闆本身是一個工作狂，日日想拼博上位，因此很喜歡做一大堆沒用的東西，讓大老闆覺得他能幹，但代價就是我們下面一班手下，只要比佢見到你準時收工，佢就會覺得你好得閒，然後就會諗多兩三件工作比你跟。

我相信聰明的讀者，應該會估到故事發展，當有第一個同事A準時收工，老闆就會比多幾樣野佢做，然後A就要OT，當A OT時，其他同事就會顯得早收工，比老闆見到後，工作便會接住黎，到最後，無論我地有無野做都好，我地都唔敢早過老闆收工。

於是大家日日一係做到死，一係扮做到死，結果都係只有一個結果，就係無得收工，一年365日，大家都變成無朋友無家人，跟足外面 BIG4 （四大會計師樓）文化，當時只能安慰自己，人工好在比BIG4高幾個開。

而其中最正既係老闆的經典對白，他每逢五點半，就會大大聲問我地：「點解大家唔收工呀？你地快D走啦！」我心諗：「李老闆，你問你自己啦！」我認當時我天真我傻，以為老闆係出自佢既良知，而問呢條問題，但人大左之後，你會知道問題背後，老闆只有三個可能性或動機：

1.     扮關心同事，人前一個好老闆。

2.     要比人地知道因為有佢英明既領導之下，佢隊team最勤力。

3.     佢真係白癡到，唔知點解我地收唔到工。

如是者過了年半的時間，老闆終於去左第二隊team，而我地一班手下，命硬的就好似我咁，死唔去又捱得過，頂唔順的，走得就走，但最可憐的是一位新婚的女同事，因為不知道自己已懷孕兩個月，因而小產了。

過完呢年半地獄式生活後，我便很怕公司出現慣性OT既現象，所以由我第一次做人老闆開始，我既組織文化守則，第一條為「NO OT CULTURE IN MY TEAM」，因為我深信，如果團隊有慣性OT文化，同樣地只有三個可能性：

1.     同事能力出現問題，不能於工作時間內完成工作。

2.     老闆（即係我自己）有問題，不懂簡化團隊工作。

3.     人力資源管理有問題，計錯HEAD COUNT。

「我走啦，唔好比我知道你地OT！」