B餐換意粉唔該
2014/04/16 08:45:23 網誌分類: 生活
講普選好多人想食無篩選的A餐，但泛民和阿爺各不相讓，隨時拉倒，結局反而是硬食維持現狀的C餐，照目前嚟睇出現呢個狀況成數不低。
相比之下，B餐衰衰地都叫做有得普選，還有溫和泛民參與。我昨日寫完「CY、林鄭、張炳良競逐」這個例子之後，好多人打電話畀我，話溫和泛民都唔少，不止張炳良，寫寫其他人得唔得，例如去過上海的民主黨單仲偕，或者民協馮檢基，都可能屬於阿爺所講「愛國愛港的泛民」，一樣去選得。我形容好似去茶餐廳食餐咁，叫句︰「B餐換意粉唔該」，雖然唔係完全換甚麼也可以，但你食飯、食意粉、甚至食公仔麵都得，在有限的選擇中有得揀。
講起民協基哥，佢?家係泛民飯盒會召集人，搞民主三十幾年，找他選特首亦不失禮，若然他能夠拉幾票出來支持一個妥協方案，令政改方案可以在立法會通過，更可以因推動普選而留名歷史。
不過一講起「拉走幾票」，其實就觸及泛民內部的敏感話題，李柱銘要去美國，其實就是想喝住部份想同阿爺講數的泛民（用我的講法係想食B餐的泛民），你不要胡亂妥協，要企硬，要爭取最純粹的普選（即是上述的A餐），無就不如拉倒，不如上街，迫到有為止。李馬丁對幾年前政制改革時，民主黨幾票走去支持政改方案，特別反感。
有政圈中人形容，這是李柱銘和司徒華的路線鬥爭，李馬丁要企硬，不完美的東西情願唔要。華叔較現實，有幾多食幾多，食完再爭。當年華叔尚在，民主黨才夠膽妥協。如今華叔一去，馬丁一喝，民主黨就要歸隊企硬。
你估企硬阿爺就頂唔順要大讓步，還是你企硬他與你鬥硬？我覺得泛民企硬好難迫到阿爺讓步，反而好大機會係拉倒兼政制原地踏步。泛民同共產黨打交道咁多年，難道看不到這種結局嗎？
wh.lo@bastillepost.com
盧永雄
回應 (0)
我要發表